လာအိုနှင့် မြန်မာ တူညီသော ကိုးကွယ်ယုံကြည်မှုများကြား မေတ္တာပွားခြင်း
ယနေ့နံနက် (၀၉:၄၅) နာရီတွင် ရန်ကုန်မြို့၊ မရမ်းကုန်းမြို့နယ်၊ စွယ်တော်ဘုရားလမ်းရှိ အပြည်ပြည်ဆိုင်ရာ ထေရဝါဒဗုဒ္ဓတက္ကသိုလ်၌ မြန်မာ-လာအို ချစ်ကြည်ရေးအသင်း ဥက္ကဋ္ဌ ဦးဝင်းမောင် ဦးဆောင်၍ ဝါဆိုသင်္ကန်း ဆက်ကပ်လှူဒါန်းခြင်းနှင့် ဆွမ်းပဒေသာပင် စိုက်ထူလှူဒါန်းခြင်း အခမ်းအနားကို ကျင်းပခဲ့ပါသည်။
အခမ်းအနားတွင် အပြည်ပြည်ဆိုင်ရာ ထေရဝါဒဗုဒ္ဓတက္ကသိုလ် ပါမောက္ခဆရာတော်ထံမှ ငါးပါးသီလ ခံယူဆောက်တည်ကာ ချစ်ကြည်ရေး တရားတော်များ နာယူကြည်ညိုကြပြီး ပြုပြုသမျှ ကောင်းမှုကုသိုလ်အစုစုတို့အတွက် ရေစက်သွန်းချ အမျှဝေခဲ့ကြပါသည်။
လှူဒါန်းမှုအစုစုအဖြစ် မြန်မာ-လာအို ချစ်ကြည်ရေးအသင်း ဥက္ကဋ္ဌနှင့် အဖွဲ့ဝင်များက –
အပြည်ပြည်ဆိုင်ရာ ထေရဝါဒဗုဒ္ဓတက္ကသိုလ်ရှိ ဆရာတော် သံဃာတော်များနှင့် လာအိုနိုင်ငံမှ လာရောက်ပညာဆည်းပူးနေသော လာအိုသံဃာတော်များအား ဝါဆိုသင်္ကန်း၊ ထီး၊ ယပ်နှင့် လှူဖွယ်ဝတ္ထုအစုစုတို့အား ဆက်ကပ်လှူဒါန်းခြင်း၊
ပြည်တွင်းပြည်ပမှသံဃာတော်/သီလရှင်နဲ့ စာသင်ကျောင်းသားကျောင်းသူ စုစုပေါင်း
၃၅၉ ဦး အား နေ့ဆွမ်း ဆက်ကပ်လှူဒါန်းခြင်း၊
ဆွမ်းပဒေသာပင်အတွက် ငွေကျပ် သိန်း (၅၀) စိုက်ထူလှူဒါန်းခြင်း တို့ကို ပြုလုပ်ခဲ့ကြပါသည်။
အဆိုပါ အခမ်းအနားသို့ မြန်မာနိုင်ငံဆိုင်ရာ လာအိုသံအမတ်ကြီး H.E. Mr. Bounphieng CHANTHAVONG နှင့် ဇနီး၊ လာအိုနိုင်ငံဆိုင်ရာ စစ်သံမှူးနှင့် စစ်သံရုံးအရာရှိများ၊ မြန်မာနိုင်ငံဆိုင်ရာ လာအိုသံရုံးမှ သံအရာရှိများ၊ မြန်မာ-လာအို ချစ်ကြည်ရေးအသင်း အဖွဲ့ဝင်များ၊
ပြည်ထောင်စုသမ္မတမြန်မာနိုင်ငံဘာသာပေါင်းစုံချစ်ကြည်ညီညွတ်ရေးအဖွဲ့ဥက္ကဋ္ဌနှင်အဖွဲ့ဝင်များ၊
ရွှေတိဂုံစေတီတော်ဘဏ္ဍာတော်ထိန်းဂေါပကအဖွဲ့ဝင်များ၊ ဖိတ်ကြားထားသော မိတ်ဆွေဧည့်သည်တော်များ တက်ရောက်ကြည်ညို သဒ္ဓါပွားခဲ့ကြပြီး အခမ်းအနားကို မွန်းလွဲ (၁၂:၃၀) နာရီတွင် အောင်မြင်စွာ ရုပ်သိမ်းခဲ့ကြောင်း သိရှိရပါသည်။