မိတ်ဖက်နိုင်ငံများနှင့်လုံခြုံရေးသဘောတူညီချက်လက်မှတ်ထိုး-ယူကရိန်း

ကိယက်ဗ်၊ ဖေဖော်ဝါရီ ၂၅

ယူကရိန်းသမ္မတ ဗလိုဒိုမီယာ ဇလန်စကီ က တနင်္လာနေ့တွင် ယူကရိန်းနိုင်ငံသည် မိတ်ဖက်နိုင်ငံများနှင့် လုံခြုံရေးဆိုင်ရာ သဘောတူညီမှု ၂၈ ခု ကို လက်မှတ်ရေးထိုးခဲ့ကြောင်း သမ္မတရုံး ၏ သတင်းထုတ်ပြန်ချက် အရ သိရသည်။

ကိယက်ဗ်မြို့ရှိ နိုင်ငံခြားခေါင်းဆောင်အများအပြား တက်ရောက်သည့် အခမ်းအနား၌ မိန့်ခွန်းပြောကြားရာတွင် ဇလန်းစကီး က ဤသဘောတူညီချက်များသည် ဥရောပတွင် လုံခြုံရေးအာမခံချက်များအတွက် အခြေခံအုတ်မြစ်များဖြစ်ကြောင်းပြောကြားခဲ့သည်။

“ယခုကနဦး စာချုပ်တွေအပေါ် အခြေခံပြီး ယူကရိန်းနဲ့ ဥရောပနိုင်ငံအားလုံးအတွက် တရားမျှတပြီး ရေရှည်တည်တံ့ခိုင်မြဲတဲ့ ငြိမ်းချမ်းရေးရရှိစေဖို့ အတွက် ထိရောက်မှုရှိပြီး လုံလောက်တဲ့အာမခံချက်ရှိတဲ့ စနစ်တစ်ခုကို အတူတကွဖန်တီးတည်ဆောက်ရမှာဖြစ်ပါတယ်” ဟု ဇလန်းစကီး က ပြောကြားခဲ့သည်။

ဇလန်းစကီးက ကာကွယ်ရေး၊ ဘဏ္ဍာရေးနှင့် နိုင်ငံရေး ပူးပေါင်းဆောင်ရွက်မှုများ ပါဝင်သော ဤသဘောတူညီချက်များသည် ယူကရိန်းနိုင်ငံ၏အကျပ်အတည်းများ တိုးများလာခြင်းမှ ကာကွယ်ရန် ရည်ရွယ်ထားပြီး ကာကွယ်ရေး ပူးပေါင်းဆောင်ရွက်မှုများကို တိုးမြှင့်ရန် မိတ်ဖက်နိုင်ငံများကို တောင်းဆိုခဲ့သည်။

ဇလန်စကီ က ယူကရိန်းနိုင်ငံ၏ လေကြောင်းကာကွယ်မှု တိုးတက်ဖွံ့ဖြိုးရန် အထူးလိုအပ်ကြောင်း အသားပေးပြောကြားခဲ့ပြီး ဥရောပ၏ လေကြောင်းကာကွယ်ရေးအခြေခံစနစ် ကိုရေးဆွဲချမှတ်ရန်လည်း အရေးကြီးကြောင်းပြောဆိုခဲ့သည်။

တနင်္လာနေ့သည် ယူကရိန်းနိုင်ငံ အကျပ်အတည်း သုံးနှစ်မြောက် နှစ်ပတ်လည်နေ့ အထိမ်းအမှတ်ဖြစ်ပြီး နိုင်ငံခြားခေါင်းဆောင် အများအပြား ယူကရိန်းကို ရောက်ရှိလာခဲ့ကြပါသည်။

ဧည့်သည်တော်များထဲတွင် ဥရောပကော်မရှင်ဥက္ကဌ အာဇူလာဗွန် ဒဲရ် လေးယန်း၊ ဥရောပကောင်စီဥက္ကဌ အန်တိုနီယို ကိုစတာ၊ ကနေဒါဝန်ကြီးချုပ် ဂျက်စတင် ထရုဒိုး နှင့် စပိန်ဝန်ကြီးချုပ် ပေဒရို ဆန်ရှေး တို့ ပါဝင်သည်။

Ref: ရှင်းဟွာ