ယူကရိန်းအရေးဥရောပနှင့်အခြားနိုင်ငံများပါဝင်‌ဆွေး‌နွေးနိုင်–ပူတင်

ယူကရိန်း ပဋိပက္ခဖြေရှင်းနိုင်ရေး ဆွေးနွေးမှုများ၌ ဥရောပနိုင်ငံများအပြင် အခြားနိုင်ငံများလည်း ပါဝင်နိုင်သည်ဟု ရုရှားသမ္မတ ဗလာဒီမာ ပူတင်က တနင်္လာနေ့တွင် ပြောကြားလိုက်သည်။

အမေရိကန်သမ္မတ ဒေါ်နယ်ထရမ့်ပ်နှင့် အချက်အလက်များစွာတွင် သဘောတူညီမှုရထားကြောင်း၊ သို့သော်လည်း ယူကရိန်းတွင် တိုက်ပွဲများကိုအဆုံးသတ်ရေး၌ ဥရောပနိုင်ငံများသည်လည်း အခန်းကဏ္ဍတစ်ခုမှ ပါဝင်နိုင်ကြောင်း နိုင်ငံပိုင်ရုပ်သံက ထုတ်လွှင့်ခဲ့သော အင်တာဗျူးတွင် ပူတင်က ပြောကြားခဲ့သည်။

ယူကရိန်းအရေး ဆွေးနွေးမှုများတွင် ပါဝင်ခွင့်ရရေးအတွက် ဥရောပနိုင်ငံများ၏ တောင်းဆိုမှုနှင့်ပတ်သက်၍ သူ၏ ထင်မြင်ချက်ကို မေးမြန်းခဲ့ရာ၌ “ဒါက ဘာမှ မမှားဘူးလို့ ကျွန်တော်မြင်ပါတယ်” ဟု ပူတင်က ပြောဆိုခဲ့သည်။

ဆွေးနွေးရေးလုပ်ငန်းစဉ်များတွင် ၎င်းတို့၏ ပါဝင်မှုသည် လိုအပ်ပါကြောင်း သူက ဆက်လက် ပြောဆိုခဲ့ပြီး စစ်မြေပြင်တွင် ယူကရိန်းကို အနိုင်ရစေလိုသော ဥရောပနိုင်ငံများသည်သာ မိမိတို့ကို အဆက်ဖြတ်ခဲ့ခြင်းဖြစ်ကြောင်းလည်း ပြောကြားခဲ့သည်။

“သူတို့ ပြန်လာလိုတယ်ဆိုရင် ကြိုဆိုပါတယ်” ဟု သူက ပြောဆိုသည်။ထို့အပြင် ဘရာဇီး၊ ရုရှား၊ အိန္ဒိယ၊ တရုတ်၊ တောင်အာဖရိကနှင့် အခြား စီးပွားရေးထွန်းသစ်စနိုင်ငံများပါဝင်သည့် BRICS အဖွဲ့မှ မိမိတို့ မိတ်ဆွေများ၏ သဘောထားအမြင်များကိုလည်း ရုရှားက လေးစားပါကြောင်း ပူတင်က ပြောဆိုသည်။

ငြိမ်းချမ်းရေးဖြစ်မြောက်ဖို့ရာ သဘောထားအမြင်များကို ဖော်ထုတ်ကြသော မိတ်ဖက်အားလုံးကို မိမိတို့က ကျေးဇူးတင်ကြောင်း၊ ထို့ကြောင့် ဥရောပနိုင်ငံတွေသာမက အခြားနိုင်ငံတွေလည်း ပါဝင်နိုင်သည်ဟု မိမိပြောရခြင်းဖြစ်ကြောင်း ပူတင်က ပြောကြားခဲ့သည်။

Ref: အင်န်ဒီတီဗီ