ဂျာမနီနိုင်ငံ ရွေးကောက်ပွဲတွင် ဗဟိုလက်ယာယိမ်း အတိုက်အခံပါတီက ပထမနေရာနှင့် လက်ယာစွန်း AfD ပါတီက ဒုတိယနေရာမှ အနိုင်ရခဲ့၍ ဂျာမနီနိုင်ငံအတွက် ရက်ကောင်းရက်မြတ်တစ်ခုဖြစ်ကြောင်း အမေရိကန်သမ္မတ ဒေါ်နယ်ထရမ့်ပ်က ချီးကျူးလိုက်သည်။
တနင်္ဂနွေနေ့တွင် ထွက်ပေါ်ခဲ့သော မဲရလဒ်များအရ ရွေးကောက်ပွဲတွင် ကွန်ဆာဗေးတစ်မဟာမိတ်အဖွဲ့က အနိုင်ရခဲ့ပြီး Friedrich Merz သည် နောက်တက်မည့် ဂျာမနီ ဝန်ကြီးချုပ်ဖြစ်လာမည်ဖြစ်သည်။
ရွေးကောက်ပွဲရလဒ်သည် နိုင်ငံ၏ နိုင်ငံရေးအခင်းအကျင်းကို သိသာထင်ရှားသော အပြောင်းအလဲတစ်ခုဖြစ်စေခဲ့ပြီး အမေရိကန်သမ္မတ ဒေါ်နယ်ထရမ့်ပ်၏ မဟာမိတ် ဘီလျံနာ အီလွန်မတ်စ်၏ ထောက်ခံမှုကို ရရှိခဲ့သည့် လက်ယာစွန်း Alternative for Germany(AfD) သည် စံချိန်တင် မဲအရေအတွက်ဖြင့် ဒုတိယနေရာတွင် ရပ်တည်နိုင်ခဲ့သည်။
အမေရိကန်သမ္မတ ဒေါ်နယ်ထရမ့်ပ်က ရွေးကောက်ပွဲရလဒ်ကို ကြိုဆိုခဲ့ပြီး ဂျာမနီပြည်သူများသည် Olaf Scholz ဦးဆောင်သော ဗဟိုလက်ဝဲအစိုးရ၏ အသိတရားကင်းမဲ့သော မူဝါဒများကို ငြင်းပယ်ခဲ့ကြသည်ဟု ပြောဆိုသွားသည်။
“အမေရိကမှာလိုပဲ ဂျာမနီပြည်သူတွေဟာ အထူးသဖြင့် စွမ်းအင်နဲ့ လူဝင်မှုကြီးကြပ်ရေးဆိုင်ရာမှာ နှစ်ပေါင်းများစွာ အပ်ကြောင်းထပ်နေတဲ့ အသိညဏ်နုံနဲတဲ့ အစီအစဉ်တွေကို ငြီးငွေ့လာပါပြီ။ ဒါက ဂျာမနီအတွက် ရက်ကောင်းရက်မြတ်တစ်ခုပါ” ဟု ထရမ့်ပ်က Truth ဆိုရှယ်မီဒီယာတွင် ရေးသားခဲ့သည်။
တစ်ချိန်တည်းမှာပင် အသက် ၆၉ နှစ်အရွယ် ရှိပြီဖြစ်သော Merz က ဥရောပကို အမေရိကထံမှ လွတ်လပ်ရေးအစစ်အမှန်ရရှိရေး ကို ကူညီသွားမည်ဟု ကတိပြုခဲ့သည်။ ရွေးကောက်ပွဲ ရလဒ်ကို ထရမ့်ပ်က ကြိုဆိုသော်ငြားလည်း Merz သည် အနိုင်ရခဲ့အပြီး၌ အမေရိအပေါ် ပြတ်သား သော မှတ်ချက်များပေးခဲ့ကာ ရွေးကောက်ပွဲကာလအတွင်း ဝါရှင်တန်ထံမှ ထွက်ပေါ်ခဲ့သော ဒေါသထွက်စရာဖြစ်ရပ်များကို ရုရှား၏ ရန်လိုသော ကြားဝင်စွက်ဖက်မှုများနှင့် နှိုင်းယှဉ်ဝေဖန်သွားခဲ့သည်။
Ref: ယူအက်စ်နူးစ်၊ အင်န်ဒီတီဗီ