ရန်ကုန်တိုင်းဒေသကြီး မြို့နယ်အချို့တို့တွင် ယနေ့ ဖေဖော်ဝါရီ (၂၄)ရက်၊ နံနက်ပိုင်းက အချိန်အခါမဟုတ် နေရာကွက်ကျား ရွာသွန်းခဲ့ကြောင်း ဒေသခံများထံမှ သိရသည်။
အဆိုပါ မိုးရွာသွန်းရာတွင် ရွှေပြည်သာမြို့နယ်၊ အင်းစိန်မြို့နယ်၊ လှိုင်သာယာမြို့နယ် အပါအဝင် မြို့နယ်အချို့တို့တွင် နေရာကွက်ကျား မိုးရွာသွန်းခဲ့ကြောင်း ဒေသခံများထံမှ စုံစမ်း သိရသည်။
“မနက် စောစောက မိုးရွာတာ ဟုတ်တယ်။ အချိန်အခါမဟုတ် ရွာတယ်လို့ ပြောရမယ်။ မိုးက ဖွဲဖွဲပဲရွာတာပေါ့။ အလုပ်သွားချိန်ကြီး ရွာမယ် မထင်ထားတော့ ထီးတွေ ဘာတွေလည်း မဆောင်ထားမိတော့ နဲနဲတော့ အခက်တွေ့ခဲ့တယ်”ဟု ရွှေပြည်သာမြို့တွင် နေထိုင်သူ တစ်ဦးက ပြောသည်။
မိုးလေဝသနှင့် ဇလဗေဒညွှန်ကြားမှု ဦးစီးဌာနမှ ယနေ့ညနေအထိ ခန့်မှန်းချက်တို့အရ တနင်္သာရီတိုင်းဒေသကြီးတွင် နေရာအနှံ့အပြား၊ ကရင်ပြည်နယ်၊ မွန်ပြည်နယ်နှင့် ရှမ်းပြည်နယ်(အရှေ့ပိုင်း)တို့တွင် နေရာစိပ်စိပ်၊ ဧရာဝတီတိုင်းဒေသကြီးနှင့် ကချင်ပြည်နယ်တို့တွင် နေရာကျဲကျဲ မိုးရွာသွန်းနိုင်ကြောင်း ယနေ့ ဖေဖော်ဝါရီ (၂၄)ရက် နံနက်ပိုင်းက ထုတ်ပြန်ထားသည်။
ထို့ပြင် နေပြည်တော်၊ ရန်ကုန်တိုင်းဒေသကြီး၊ ပဲခူးတိုင်းဒေသကြီး၊ စစ်ကိုင်းတိုင်းဒေသကြီးအထက်ပိုင်း၊ ကယားပြည်နယ်၊ ချင်းပြည်နယ်၊ ရခိုင်ပြည်နယ်နှင့် ရှမ်းပြည်နယ် (မြောက်ပိုင်းနှင့် တောင်ပိုင်း)တို့တွင် နေရာကွက်ကျား မိုးထစ်ချုန်းရွာမည်ဖြစ်ပီး ရွာရန်ရာနှုန်း (၈၀) ဖြစ်ကြောင်း မိုး/ဇလမှ ထုတ်ပြန်ထားသည်။
ထို့အတူ ပြင်ပ မိုးလေဝသပညာရှင် ဦးဝင်းနိုင်ကလည်း ဖေဖော်ဝါရီ (၂၄) ရက်တွင် ရန်ကုန်မြို့နယ် အချို့တွင် မိုးရွာရန် ရာခိုင်နှုန်းအားဖြင့် (၆၀)ရာခိုင်နှုန်းမှ (၇၅) ရာခိုင်နှုန်းအထိရှိကြောင်းနှင့် မိုးရေချိန်မှာ (၂၄) နာရီအတွင်း (၈) မီလီမီတာ (ဝ.၃၁၅ လက်မ) ခန့်ရှိနိုင်မည်ဖြစ်ဟု ကြိုတင်ခန့်မှန်းထားသည်။