သြစတြေးလျနိုင်ငံ အရှေ့ပိုင်ကမ်းလွန်တွင် တရုတ်ရေတပ်အုပ်စုတစ်ခုက ကျည်အစစ်သုံးပစ်-ခတ်မှုလုပ်နေသည်ဆိုသော သတင်းများကို သြစတြေးလျနိုင်ငံ လေကြောင်းထိန်းချုပ်ရေးအေဂျင်စီက လေကြောင်းလိုင်းများအား ဆက်သွယ်သတိပေးထားသည်ဟု အေဂျင်စီနှင့် သြစတြေးလျ အရာရှိများက ပြောကြားသည်။
တရုတ်ပြည်သူ့လွတ်မြောက်ရေးတပ်မတော် ရေတပ်၏ ဖရီးဂိတ်သင်္ဘော၊ တိုက်သင်္ဘော နှင့် လောင်စာဆီဖြည့် သင်္ဘောတို့သည် ပြီးခဲ့သည့် သီတင်းပတ်တွင် သြစတြေးလျ၏ ရေကြောင်းချဉ်းကပ်လမ်းအတွင်း ဝင်ရောက်ခဲ့ကြောင်း၊ ယင်းနောက် ယခုသီတင်းပတ်တွင် သြစတြေးလျ၏ အရှေ့ဘက်ကမ်းရိုးတန်းသို့ ထွက်ခွာလာခဲ့ပြီး သြစတြေးလျနှင့် နူးဇီလန် ရေတပ်၊ လေတပ်များက စောင့်ကြည့်ခဲ့ကြောင်း သိရသည်။
“ရပ်ဘက်လေကြောင်းအာဏာပိုင်အဖွဲ့နဲ့ သြစတြေးလျ လေကြောင်းဌာနက နိုင်ငံတကာရေပြင်မှာ ကျည်အစစ်သုံးပ-စ်ခတ်မှု သတင်းတွေကို သတိပြုမိပါတယ်” ဟု လေကြောင်းထိန်းချုပ်ရေးအေဂျင်စီ သြစတြေးလျ လေကြောင်း ဌာန က သောကြာနေ့က သတင်း ထုတ်ပြန်ချက်တွင် ပြောကြားထားသည်။
“ကြိုတင်ကာကွယ်မှုအနေနဲ့ အဲဒီဧရိယာမှာ ပျံသန်းကြမယ့် လေကြောင်းလိုင်းတွေကို ကျွန်တော်တို့ အကြံပြုသတိပေးထားပါတယ်” ဟု သတင်းထုတ်ပြန်ချက်တွင်ပြောကြားထားသည်။
Qantas လေကြောင်းလိုင်းနှင့် ယင်း၏ လက်ခွဲ စရိတ်နည်းလေကြောင်းလိုင်း Jetstar တို့သည် ဝေဟင်ပိုင်နက်ကို စောင့်ကြည့်နေလျက်ရှိပြီး သြစတြေးလျနှင့် နူးဇီလန်အကြားရှိ Tasman ပင်လယ်ကို ဖြတ်သန်းမည့် ခရီးစဉ်အချို့ကို ယာယီအပြောင်းအလဲလုပ်ထားသည်ဟု ဆိုခဲ့သည်။
စစ်ရေးလေ့ကျင့်မှုအတွင်း စနေနေ့တွင် တရုတ်ရေတပ် ခရုဇာသင်္ဘောက ကျည်အစစ်သုံး ပ-စ်ခတ်မှုလုပ်ခဲ့သည်ဟု နူးဇီလန်အစိုးရ အရာရှိများကလည်း ပြောဆိုခဲ့ပြီး အရပ်ဖက်လေကြောင်းလိုင်းများကို သတိပေးထားသည်ဟု ဆိုသည်။
ကြိုတင်သတိပေးချက်မရှိသော ပစ်-ခတ်လေ့ကျင့်မှုများအတွက် ကင်ဘာရာနှင့် ဝယ်လင်တန်တို့မှ စိုးရိမ်ပူပန်မှုများ ရှိသော်လည်း တက်စ်မန်ပင်လယ် နိုင်ငံတကာရေပြင်တွင် တရုတ်စစ်သင်္ဘောများက ဒုတိယမြောက်နေ့အဖြစ် လေ့ကျင့်ပစ်-ခတ်မှုများ လုပ်ခဲ့ခြင်းဖြစ်သည်။
Ref: ဘန်ကောက်ပို့စ်၊ ဖရန့်စ်24