နွေရာသီကာလဖြစ်သည့် မတ်၊ ဧပြီလများတွင် Hotspot အရေအတွက်ပိုမိုများပြားလာနိုင်သည်ဟု မြန်မာ-ထိုင်း နယ်နိမိတ်ဖြတ်ကျော်မီးခိုးမြူငွေ့လေထုညစ်ညမ်းမှုတားဆီးကာကွယ်ရေးဆိုင်ရာ ပူးပေါင်းဖြေရှင်းဆောင်ရွက်ရေးကော်မတီဥက္ကဋ္ဌ၊ ကာကွယ်ရေးဝန်ကြီးဌာန ဒု-ဝန်ကြီး ဗိုလ်ချုပ်ကိုလေး ကပြောသည်။
နေပြည်တော်၌ ဖေဖော်ဝါရီ ၁၈ ရက်မွန်းလွဲပိုင်းကကျင်းပသည့် မြန်မာ-ထိုင်း နယ်နိမိတ်ဖြတ်ကျော်မီးခိုးမြူငွေ့လေထုညစ်ညမ်းမှုတားဆီးကာကွယ်ရေးဆိုင်ရာ ပူးပေါင်းဖြေရှင်းဆောင် ရွက်ရေးကော်မတီ၏ (၁/၂၀၂၅)လုပ်ငန်းညှိနှိုင်းအစည်းအဝေးတွင် ပြောကြားခဲ့ခြင်းဖြစ်သည်။
၂၀၂၃ ခုနှစ်တွင် တစ်နိုင်ငံလုံးအနေဖြင့် Fire Hot-spot ဖြစ်ပေါ်မှု(၅၆၅၀၄)ကြိမ်ရှိပြီး ၂၀၂၄ ခုနှစ်တွင် (၅၁၀၉၁)ကြိမ်ဖြစ်ပေါ်ခဲ့ပြီး ၂၀၂၄ ခုနှစ် ၊ ဇန်နဝါရီလတွင် Fire Hotspot ဖြစ်ပေါ်မှုမှာ တစ်နိုင်ငံလုံးအတိုင်းအတာဖြင့် (၁၂၇၉)ကြိမ်ဖြစ်ပေါ်ခဲ့ကာ ၂၀၂၅ ခုနှစ်၊ ဇန်နဝါရီလတွင် (၁၀၅၇)ကြိမ်ဖြစ်ပေါ်ခဲ့၍ (၂၂၂)ကြိမ်လျော့ကျခဲ့သည်ဟု ပြောသည်။
ထို့ပြင် ASMC website မှရရှိသည့် Fire Hotspot ဆိုင်ရာအချက်အလက်များအရ တစ်နိုင်ငံလုံး အတိုင်းအတာဖြင့် ၂၀၂၅ ခုနှစ်၊ ဇန်နဝါရီလ၏ ပထမသီတင်းပတ်တွင် (၁၂၃)ကြိမ်၊ ဒုတိယသီတင်းပတ်တွင် (၂၀၁)ကြိမ်၊ တတိယသီတင်းပတ်တွင် (၂၈၆)ကြိမ်နှင့် စတုတ္ထ သီတင်းပတ်တွင် (၄၄၇) ကြိမ်ဖြင့် တဖြည်းဖြည်းမြင့်တက်လာသည်ဟု ပြောသည်။
” Fire Hotspot ဖြစ်ပေါ်မှုမှာ ရှမ်းပြည်နယ်က (၂၅၅)ကြိမ်နဲ့ အများဆုံးဖြစ်ပေါ်ခဲ့ပါတယ် ဒုတိ ယအနေနဲ့ စစ်ကိုင်းတိုင်းက (၂၁၄)ကြိမ်ပါ။ နှစ် စဉ် နွေရာသီကာလဖြစ်တဲ့ မတ်၊ ဧပြီလတွေမှာ Hotspot အရေအတွက်ပိုမိုများပြားလာနိုင်တဲ့အတွက် နေပြည်တော်၊ တိုင်းနဲ့ ပြည်နယ်အလိုက် ပညာပေးဆွေးနွေးရေး၊ စစ်ဆေးရေးအဖွဲ့တွေအနေနဲ့ အသိပညာပေးဟောပြောတာ၊ စစ်ဆေးကြပ်မတ်တာနဲ့ လိုက်နာမှုရှိစေရေးဆောင်ရွက်မှုတွေကို အထူးအလေးထားကြပ်မတ်ဆောင်ရွက်ဖို့လိုပါတယ်”ဟု ဗိုလ်ချုပ်ကိုလေး ကပြောသည်။
ထို့အတူ ကွင်းဆင်းစစ်ဆေးရေးအဖွဲ့များအနေ ဖြင့် မြေပြင်ကွင်းဆင်းစစ်ဆေးတွေ့ရှိချက်များကို အချက်အလက်၊ ကိန်းဂဏန်း၊ မှတ်တမ်းဓာတ်ပုံများနှင့်တကွပေးပို့ကြရမည်ဖြစ်ပြီး မီးခိုးမြူငွေ့လေထုညစ်ညမ်းမှုလျော့ချနိုင်ရန် ကုန်းမြင့်လယ်ယာဖော်ထုတ်မှု၊ လယ်ယာထွက်အမှိုက်များစုပုံမီးရှို့မှုမရှိစေရေး၊ တောမီးရှို့မှုမရှိစေရေး ပညာပေးဆွေးနွေးမှုတို့ကို ပိုမိုတိုးမြှင့်လုပ် ဆောင်ကြရမည်ဟုလည်း မှာကြားခဲ့သည်။
ထို့ပြင် ဒု-ဝန်ကြီး ဗိုလ်ချုပ်ဖြိုးသန့်မှလည်း ရွှေ့ ပြောင်းတောင်ယာစနစ်မှ ကုန်းမြင့်လယ်ယာစနစ်သို့ ပြောင်းလဲနိုင်ရန် နေရာနှင့် ရေအရင်းအမြစ်ရှိပါက ဆိုလာရေတင်စနစ်ကိုဆောင်ရွက်သင့်ပြီး ကုန်းမြင့်လယ်ယာဆောင်ရွက်လိုသည့် နေရာများရှိလျင် နည်းပညာကူညီပေးမည်ဟု ပြောကြားခဲ့သည်။