ဥပဒေကြမ်းတွင်ထိုင်းများကာစီနိုရုံထဲမဝင်နိုင်အောင် တင်းကြပ်ထား

နိုင်ငံ၏ ခရီးသွားလုပ်ငန်းကို မြှင့်တင်ရန်အတွက် ဂိမ်းစီးပွားရေးအချက်အချာဖြစ်လာရန် ကြံစည်နေသော ထိုင်းနိုင်ငံသည် ရင်းနှီးမြှုပ်နှံသူများကို ဆွဲဆောင်ရန်ရည်ရွယ်သည့် ဥပဒေမူကြမ်းသစ်တွင် ပြည်တွင်းလော-င်းကစားသူများ အနေဖြင့် ကာစီနိုရုံများသို့ အလွယ်တကူ မဝင်ရောက်နိုင်စေရန် တင်းကြပ်ထားသည်။

နိုင်ငံတော်ကောင်စီရုံးက ထုတ်ပြန်ခဲ့သည့် မူကြမ်းအရ ထိုင်းနိုင်ငံသားများအနေဖြင့် ကာစီနိုလော-င်းကစားရုံများသို့ ဝင်ရောက်နိုင်ရန် အနည်းဆုံး ခြောက်လကြာမြင့်သည့် ပုံသေအပ်ငွေတွင် ဘတ်သန်း ၅၀ ရှိရမည်ဟု သတ်မှတ်ထားသည်။

လိုက်နာရမည့် စည်းမျဥ်းများတွင် ဝင်ကြေး ဘတ် ၅,၀၀၀ သတ်မှတ်ထားခြင်းသည်လည်း တစ်ဦးချင်း စုစုပေါင်း ပြည်တွင်းထုတ်ကုန် ဒေါ်လာ ၇,၃၀၀ ခန့်ရှိသည့်နိုင်ငံတွင် လူအတော်များများကို လက်လှမ်းမမီစေရန် ထိရောက်စွာ တားဆီးထားလိမ့်မည်ဟု အစိုးရအချက်အလက်များက ဆိုသည်။ ထိုင်းနိုင်ငံတွင် လော-င်းကစားပုံစံ အများစုသည် တရားမဝင်သော်လည်း ဥပဒေမဲ့ လော-င်းကစားမှုများ ပေါများလျက်ရှိသည်။ ဥပဒေမူကြမ်းအသေးစိတ်ကို စိတ်ဝင်တစားစောင့်ကြည့်နေသည့် နိုင်ငံခြားရင်းနှီးမြှုပ်နှံသူများအတွက် အရေးပါသော ဆွဲဆောင်မှုတစ်ခုအဖြစ် ပြည်တွင်း ကာစီနိုသမားများက ရှုမြင်ကြကြောင်း လေ့လာသူများက ဆိုသည်။

ပြီးခဲ့သည့်နှစ်ကုန်ပိုင်းက ထုတ်ပြန်ခဲ့သည့် အစီရင်ခံစာအရ ထိုင်းနိုင်ငံတွင် အသက် ၂၀ နှင့် အထက် လူဦးရေ၏ ထက်ဝက်ခန့်သည် ကာစီနိုလော-င်းကစားသူများဖြစ်လာနိုင်ပြီး နိုင်ငံကို တတိယအကြီးဆုံး လောင်းကစားအချက်အချာနေရာဖြစ်လာနိုင်ခြေကို အထောက်အကူပေးနေသည်ဟု ခန့်မှန်းထားသည်။

ဝင်ကြေး ဘတ် ၅,၀၀၀ အထိ သတ်မှတ်ထားမှုသည် ထိုင်း လူချမ်းသာများနှင့် အထက်တန်းစား လူလတ်တန်းစားများကိုသာ ကာစီနိုလော-င်းကစားကို ထိတွေ့ခွင့်ရစေလိမ့်မည်ဟု စင်ကာပူအခြေစိုက် ဂိမ်းအကြံပေး ဒန်နီရယ်ချန်းက ပြောကြားသည်။

ထို့အပြင် ဘဏ်အပ်ငွေ ဘတ်သန်း ၅၀ ရှိရမည်ဆိုသော သတ်မှတ်ချက်အရ ထိုင်းကာစီနိုလော-င်းကစားရုံများသည် တောင်ကိုရီးယားကဲ့သို့ နိုင်ငံခြားသား သီးသန့်အတွက်သာ ခွင့်ပြုချက်ပေးသော အစိုးရများနှင့် ထူးမခြားနားသဘောပင်ဖြစ်သည်ဟု ၎င်းက ဆိုခဲ့သည်။

ဥပဒေမူကြမ်းသစ်အတွက် ဖေဖော်ဝါရီ ၁၅ ရက်မှ မတ်လ ၁ ရက်အထိ လူထု အကြံပြု ကြားနာမှုများ ပြုလုပ်သွားမည်ဖြစ်သည်။ အပြီးသတ်ပါက ဥပဒေမူကြမ်းကို လွှတ်တော်သို့ မပေးပို့မီ အစိုးရအဖွဲ့မှ အတည်ပြုရမည်ဖြစ်သည်။

Ref: ဘန်ကောက်ပို့စ်