အမေရိကန်နှင့် ရုရှား ကိုယ်စားလှယ်များ ယူကရိန်းအရေးဆွေးနွေးရန် ဖေဖော်ဝါရီ ၁၈ ရက်နေ့တွင် ဆော်ဒီ၌ တွေ့ဆုံမည်

ယူကရိန်းအကျပ်အတည်းဖြေရှင်းရန် အမေရိကန်နှင့် ရုရှားကိုယ်စားလှယ်အဖွဲ့များ ဖေဖော်ဝါရီ ၁၈ ရက်နေ့တွင် ဆော်ဒီအာရေဗျနိုင်ငံ၌ တွေ့ဆုံဆွေးနွေးမည်ဟု Axios သတင်းဌာနက သတင်းရင်းမြစ်များကို ကိုးကား၍ ဖော်ပြသည်။

သတင်းဌာန၏ ဖော်ပြချက်အရ၊ အမေရိကန်နှင့် ရုရှားနိုင်ငံတို့၏ မြင့်မားသော ကိုယ်စားလှယ်များသည် နှစ်နိုင်ငံသမ္မတများ ဖြစ်ကြသော ဒေါ်နယ်ထရမ့်နှင့် ဗလာဒီမာ ပူတင်တို့၏ တွေ့ဆုံမှုအတွက် ပြင်ဆင်မှုများကိုလည်း ဆွေးနွေးကြမည်ဟု သိရသည်။

ထို့အပြင်၊ အမေရိကန်သမ္မတ ထရမ့်၏ အရှေ့အလယ်ပိုင်းဆိုင်ရာ အထူးကိုယ်စားလှယ် စတိဗ် ဝစ်ကော့ဖ်က တနင်္ဂနွေညနေပိုင်းတွင် ရုရှားနှင့် တွေ့ဆုံဆွေးနွေးမည့် အမေရိကန်ကိုယ်စားလှယ်အဖွဲ့၏ တစ်စိတ်တစ်ပိုင်းအဖြစ် ဆော်ဒီအာရေဗျသို့ ဦးစွာသွားရောက်မည်ဖြစ်ပြီး ယူကရိန်းပဋိပက္ခဖြေရှင်းရာတွင် ကြီးမားသော တိုးတက်မှုများ ရှိလာမည်ဟု မျှော်လင့်ကြောင်း ပြောကြားခဲ့သည်။ Bloomberg သတင်းဌာနကလည်း အမေရိကန်သမ္မတ ထရမ့်၏ အမျိုးသားလုံခြုံရေးအကြံပေးပုဂ္ဂိုလ် မိုက်ခ်ဝေါ့လ်ဇ်သည်လည်း ဤအစည်းအဝေးတွင် ပါဝင်ဆွေးနွေးမည်ဟု ဖော်ပြခဲ့သည်။

ဖေဖော်ဝါရီလ ၁၂ ရက်နေ့တွင် ထရမ့်သည် ပူတင်အပြင် ဇယ်လန်စကီးနှင့်ပါ ဖုန်းစကားပြောဆိုခဲ့သည်။ ရုရှားခေါင်းဆောင်နှင့် ဆွေးနွေးပြီးနောက် ထရမ့်သည် ယူကရိန်းနှင့်ပတ်သက်သည့် ညှိနှိင်းဆွေးနွေးမှုများကို စတင်ရန် ရည်ရွယ်ကြောင်း ကြေညာခဲ့သည်။ ရုရှားအစိုးရပြောရေးဆိုခွင့်ရှိသူက သမ္မတနှစ်ဦးသည် “တစ်ဦးနှင့်တစ်ဦး တွေ့ဆုံမှုများအပါအဝင် မျက်နှာချင်းဆိုင်တွေ့ဆုံမှုများ စီစဥ်ရန် သဘောတူညီခဲ့ကြသည်” ဟု ဆိုခဲ့သည်။ ထရမ့်က သူနှင့် ပူတင်တို၏ တွေ့ဆုံမှုသည် ဆော်ဒီအာရေဗျတွင် ဖြစ်ပေါ်နိုင်ကြောင်း နောက်ပိုင်းတွင် ပြောလာခဲ့သည်။