အမည်မဖော်လိုသူ သတင်းရင်းမြစ်များ၏ပြောကြားချက်အရ ရုရှားနှင့် အမေရိကန်တို့မှ အကြီးတန်းအရာရှိများသည် လာမည့်အပတ်တွင် ဆော်ဒီအာရေဗျနိုင်ငံ၌ တွေ့ဆုံဆွေးနွေးမည်ဟု သိရသည်။ ထို့အပြင် နိုင်ငံနှစ်ခုမှ ခေါင်းဆောင်များအကြား တွေ့ဆုံမှုအတွက် ပြင်ဆင်နေခြင်းဖြစ်သည်ဟုလည်း ဆိုသည်။
ရုရှားသမ္မတ ဗလာဒီမာ ပူတင်နှင့် အမေရိကန်သမ္မတ ဒေါ်နယ်ထရမ့်တို့အကြား တွေ့ဆုံမှုတစ်ခု ဖြစ်ပေါ်နိုင်ပြီး ယင်းတွေ့ဆုံမှုတွင် ယူကရိန်းပဋိပက္ခနှင့်ပတ်သက်သည့် အဖြေရှာမှုများကို ဆွေးနွေးမည်ဟု သိရသည်။ ထို့အပြင် ယင်းတွေ့ဆုံမှုသည် လက်ရှိလကုန်မတိုင်မီ ဖြစ်ပေါ်နိုင်သည်ဟု ဆိုသည်။
ကိုယ်စားလှယ်များသည် ရမ္မာဒါန်လမစတင်မီ ထိပ်သီးအစည်းအဝေး၏ ရက်စွဲကို သတ်မှတ်ရန် ရည်ရွယ်ထားကြောင်းသိရသည်။
Bloomberg သတင်းဌာန၏ဖော်ပြချက်အရ ယင်းတွေ့ဆုံမှု၏ အသေးစိတ်အချက်အလက်များနှင့် ပါဝင်မည့်သူများ၏ စာရင်းကိုမူ အတည်ပြုဆဲဖြစ်ကြောင်းသိရသည်။ ဆော်ဒီအာရေဗျနိုင်ငံမှ နိုင်ငံအဆင့် လုံခြုံရေးဝန်ကြီး Musaed bin Mohammed al-Aiban လည်း ယင်းတွေ့ဆုံမှုတွင် ပါဝင်မည်ဟု ဆိုသည်။
ဖေဖော်ဝါရီလ ၁၂ ရက်နေ့တွင် ထရမ့်သည် ပူတင်အပြင် ဇယ်လန်စကီးနှင့်ပါ ဖုန်းစကားပြောဆိုခဲ့သည်။ ရုရှားခေါင်းဆောင်နှင့် ဆွေးနွေးပြီးနောက် ထရမ့်သည် ယူကရိန်းနှင့်ပတ်သက်သည့် ညှိနှိုင်းဆွေးနွေးမှုများကို စတင်ရန် ရည်ရွယ်ကြောင်း ကြေညာခဲ့သည်။ ရုရှားအစိုးရပြောရေးဆိုခွင့်ရှိသူက သမ္မတနှစ်ဦးသည် “တစ်ဦးနှင့်တစ်ဦး တွေ့ဆုံမှုများအပါအဝင် မျက်နှာချင်းဆိုင်တွေ့ဆုံမှုများ စီစဥ်ရန် သဘောတူညီခဲ့ကြသည်” ဟု ဆိုခဲ့သည်။ ထရမ့်က သူနှင့် ပူတင်တို့၏ တွေ့ဆုံမှုသည် ဆော်ဒီအာရေဗျတွင် ဖြစ်ပေါ်နိုင်ကြောင်း နောက်ပိုင်းတွင် ပြောလာခဲ့သည်။