နူးဒေလီ ရထားဘူတာရုံတွင် လူအုပ်ပိ၍ လူ ၁၅ ဦး ‌ေ-သဆုံး

အိန္ဒိယနိုင်ငံ မြို့တော် နူးဒေလီရှိ မီးရထားဘူတာရုံတစ်ခုတွင် Mahakumbh Mela ဘာသာရေးပွဲတော်သို့ သွားရောက်ရန် ရထားစောင့်ဆိုင်းနေသည့် လူအုပ်ကြီးသည် တစ်ဦးနှင်တစ်ဦး တိုးကြိတ်တက်နင်းကြသဖြင့် အမျိုးသမီး ၁၀ ဦးနှင့် က-လေး ၃ ဦး အပါအဝင် လူ ၁၅ ဦး သေဆုံးခဲ့သည်။

မြို့တော်၏ အရှေ့တောင်ဘက် ၃၈၇ မိုင်အကွာရှိ ပွဲတော်ကျင်းပရာ Prayagraj သို့ သွားရောက်မည့် လူအမြောက်အများသည် နူးဒေလီဘူတာရုံ ပလက်ဖောင်းနှစ်ခုတွင် ရထားစောင့်ဆိုင်းနေစဉ် ဒေသစံတော်ချိန် ည ၈ နာရီခန့်တွင် အခင်းဖြစ်ရပ် ဖြစ်ပွားခဲ့ခြင်းဖြစ်သည်။

အခင်းဖြစ်စဉ်တွင် လူ ၁၅ ဦး သေဆုံးခဲ့သည်ဟု ဒေလီဝန်ကြီးချုပ် Atishi က သတင်းထောက်များကို ပြောကြားခဲ့ပြီး ဒေသတွင်းသတင်းဌာန NDTV ကမူ သေဆုံးသူ ၁၈ ဦး ရှိခဲ့သည်ဟု ဖော်ပြခဲ့သည်။

ဘူတာရုံတွင် ခရီးသွားများ ရုတ်တရက် မကြုံစဖူး များပြားခဲ့မှုကြောင့် ရထားလေးစင်း စေလွှတ်ပေးခဲ့သည်ဟု မီးရထားဝန်ကြီး Ashwini Vaishnaw က ပြောကြားခဲ့ပြီး ဖြစ်စဉ်တွင် အမှားအယွင်းရှိခဲ့သည်များကို စုံစမ်းစစ်ဆေးဖော်ထုတ်ရန် အမိန့်ပေးထားသည်ဟု ဆိုသည်။

ရထားတွဲများပေါ်သို့ လူများ အလုအယက်တိုးဝှေ့တက်ရန် ကြိုးပမ်းကြစဉ် တုန်လှုပ်ခြောက်ခြားနေကြသည်ကို ဒေသတွင်း သတင်းဌာနများက လူမှုကွန်ရက်ပေါ်တင်ခဲ့သော ဗီဒီယိုတွင် တွေ့ရသည်။

‘ပလက်ဖောင်းတွေပေါ် လူတွေ ပြေးလွှားကြပြီး ဝရုန်းသုန်းကား အခြေအနေဖြစ်ခဲ့ရာက တစ်ဦးပေါ်တစ်ဦး လဲကျတာတွေ ဖြစ်ကုန်တယ်” ဟု ဖြစ်စဉ်ကို မျက်မြင်တွေ့ခဲ့သူတစ်ဦးက ANI သတင်းဌာနကို ပြောဆိုခဲ့သည်။

ရထားနှစ်စင်း ကြန့်ကြာမှုကြောင့် ပလက်ဖောင်းများပေါ် စောင့်ဆိုင်းသည့် ခရီးသည်အရေအတွက် မမျှော်လင့်လောက်အောင် များပြားသွားခဲ့ရကာ ကျပ်သိပ်သောလူအုပ်ကြီးဖြစ်ခဲ့သည်ဟု အခင်းဖြစ်နေရာတွင် ရှိနေသူများက ပြောဆိုကြောင်း Times of India က ဖော်ပြသည်။ ယင်းသို့ရှိစဉ် ဆိုက်ရောက်လာသော ရထားတစ်စင်းပေါ် လူများ အပြေးအလွှားတက်ကြရာမှ ထိန်းမနိုင်သိမ်းမရဖြစ်ခဲ့ပြီး အချို့ခရီးသည်များ မူးလဲမှုများဖြစ်ခဲ့သည်ဟု သတင်းတွင် ဆက်လက် ဖော်ပြခဲ့သည်။

Ref: အယ်ဂျာဇီးယား