ကမ္ဘောဒီးယားနိုင်ငံ ဖနောင်ပင်မြို့တော်တွင် ဇန်နဝါရီ ၂၃ ရက်က တရုတ်နှစ်သစ်ကူးအထိမ်းအမှတ်အဖြစ် သူဌေးကြီးတစ်ဦး ဝေငှသော ငွေသားများထည့်ထားသည့် ဟုန်ပေါင်းခေါ်အန်ပေါင်းထုပ်များကို လူအများ တိုးဝှေ့ယူကြရာမှ လူအုပ်ကြားညပ်၍ အသက်ရှုကြပ်ကာ လူလေးဦးထက်မနည်း သေဆုံးခဲ့သည်ဟု ရဲတပ်ဖွဲ့က ပြောကြားသည်။
ကမ္ဘောဒီးယားဝန်ကြီးချုပ်ဟောင်း ဟွန်ဆန်၏ ရင်းနှီးသော မဟာမိတ်တစ်ဦးဖြစ်သူ မစ္စတာ Sok Kong ပိုင်ဆိုင်သော ဖေနာင်ပင်မြို့လယ်ရှိ အိမ်ကြီး၏ ကျယ်ပြောလှသော ခြံတံခါးပေါက်များရှေ့တွင် လူများ ရာနှင့်ချီ၍ စုဝေးရောက်ရှိလာကြသည်ကို ဒေသတွင်းမီဒီယာများက ဖော်ပြခဲ့သောဓါတ်ပုံများတွင် တွေ့ရသည်။
“ဒီမနက်မှာ သူဌေးကြီး Sok Kong က လက်ဆောင်တွေ ပေးဝေခဲ့ပါတယ်။ လက်ဆောင်ရဖို့ မျှော်လင့်ချက်နဲ့ သူ့အိမ်ကို လာတဲ့သူတွေ အများကြီးပါ” ဟု ဖနောင်ပင်ရဲတပ်ဖွဲ့ ပြောရေးဆိုခွင့်ရှိသူ မစ္စတာ Sam Vicheka က အေအက်ဖ်ပီကို ပြောဆိုခဲ့သည်။
“လက်ဆောင်ရဖို့ တိုးကြဝှေ့ကြရင်းနဲ့ ကျန်းမာရေးပြဿနာရှိတဲ့ သက်ကြီးပိုင်းတချို့ လဲကျခဲ့ပြီး လက်ရှိအထိ အမျိုးသားနှစ်ဦး၊ အမျိုးသမီးနှစ်ဦး လေးဦးသေဆုံးပါတယ်” ဟု သူက ပြောဆိုခဲ့ပြီး နောက်ထပ် ဒဏ်ရာရသူငါးဦး ဆေးရုံတင်ထားရသည်ဟုလည်း ဆိုခဲ့သည်။
ကမ္ဘောဒီးယားရှိ ချမ်းသာသော မိသားစုများက နှစ်သစ်ကူးကာလတွင် ပေးလေ့ရှိသော ဟုန်ပေါင်းတစ်ခုစီတွင် ငွေကြေးမည်မျှပါဝင်သည်ကို အသေအခြာ မသိရပေ။
ဓါတ်ဆီဆိုင်နှင့် ဖျော်ဖြေရေးလုပ်ငန်းများကို ထူထောင်ခဲ့သော မစ္စတာ Sok Kong သည် ကမ္ဘောဒီးယားနိုင်ငံ၏ အချမ်းသာဆုံးပုဂ္ဂိုလ်များထဲမှတစ်ဦးဖြစ်သည်။
Ref: သည်စထရိတ်တိုင်းမ်စ်