မလေးရှားနိုင်ငံသည် ဥရောပသမဂ္ဂ(အီးယူ) နှင့် စီးပွားရေးဆက်ဆံမှု ကို ခိုင်မာစေရန်အတွက် မလေးရှား-အီးယူ လွတ်လပ်စွာ ကုန်သွယ်ရေးသဘောတူညီချက်(MEUFTA)အတွက် စေ့စပ်ညှိနှိုင်းမှုများကို ပြန်လည်စတင်သွားမည်ဖြစ်သည်ဟု မလေးရှားဝန်ကြီးချုပ်ရုံးက တနင်္လာနေ့တွင် ပြောကြားခဲ့သည်။
ယင်းသဘောတူညီချက်သည် အရေးပါသော ကဏ္ဍများအတွက် ကမ္ဘာလုံးဆိုင်ရာ ထောက်ပံ့ရေးကွင်းဆက်ကို အားကောင်း ခိုင်မာစေပြီး မလေးရှားနိုင်ငံ၏ စီးပွားရေးကဏ္ဍများစွာတွင် ကြီးမားသော အကျိုးကျေးဇူးများ ရရှိလာမည်ဟု မျှော်လင့်ထားကြောင်း မလေးရှားဝန်ကြီးချုပ် အန်ဝါအီဘရာဟင်၏ ဇန်နဝါရီ ၁၉-၂၀ ရက် ဘယ်ဂျီယံနိုင်ငံ အလုပ်သဘောခရီးစဉ်အတွင်း ပူးတွဲ ကြေငြာချက်တွင် ဖော်ပြထား သည်။
လျှပ်စစ်နှင့် အီလက်ထရောနစ်ထုတ်ကုန်များ၊ စားအုန်းဆီနှင့် ယင်း၏ ဆက်စပ်ပစ္စည်းများအပြင် အလင်းနှင့် သိပ္ပံဆိုင်ရာ ကိရိယာများကဲ့သို့သော ကဏ္ဍများမှ ပို့ကုန်များကို အီးယူဈေးကွက်နှင့် အခြားဈေးကွက်များသို့ တိုးမြှင့်တင်ပို့ရန် အသင့်ရှိနေသည်ဟု ကြေငြာချက်တွင် ဖေါ်ပြ ထားသည်။
ထို့အပြင် MEUFTA သည် အစိမ်းရောင်စွမ်းအင်နှင့် အဆင့်မြင့်ကုန်ထုတ်လုပ်မှုကဲ့သို့သော ခေတ်မီနည်းပညာကဏ္ဍများတွင် အီးယူ၏ ရင်းနှီးမြှုပ်နှံမှုများ ပိုမိုတိုးမြင့်လာစေရန် အထောက်အကူဖြစ်လိမ့်မည်ဟုလည်း ဖော်ပြခဲ့သည်။
မလေးရှားနှင့် အီးယူအတွက် နှစ်ဖက်စလုံးအကျိုးရှိစေသော အခြေအနေကို အာမခံချက်ပေးကာ သက်ဆိုင်သူအားလုံးအတွက် ထင်သာမြင်သာသော အကျိုးခံစားခွင့်များ ပေးဆောင်သည့် မျှတပြည့်စုံသော သဘောတူညီချက်ကို အကောင်အထည်ဖော်ရန် မလေးရှားအစိုးရက ကတိကဝတ်ပြုထားသည်ဟုလည်း ကြေငြာချက်တွင် ဖေါ်ပြထားသည်။
Ref: ရှင်းဟွာ