ကာစီနိုကိုတရားဝင်ခွင့်ပြုမည့်ဥပဒေကြမ်းကို ထိုင်းအစိုးရအဖွဲ့ အတည်ပြု

လောင်းကစားလုပ်ငန်းနှင့် ကာစီနိုရုံများကို တရားဝင်ခွင့်ပြုမည့် ဥပဒေကြမ်းတရပ်ကို ထိုင်းအစိုးရအဖွဲ့က အတည်ပြုပေးလိုက်ပြီး ယင်းသို့ ပြုလုပ်ခြင်းသည် ခရီးသွားလုပ်ငန်း၊ အလုပ်အကိုင်နှင့် ရင်းနှီးမြှပ်နှံမှုများ မြှင့်တင်ရန် ရည်ရွယ်ခြင်းဖြစ်သည် ဝန်ကြီးချုပ် ပေတုံတန် ရှင်နာဝပ်ထရာက ဇန်နဝါရီ ၁၃ ရက်တွင် ပြောဆိုခဲ့သည်။

ယခုအခါ လွှတ်တော်က သုံးသပ်ဆုံးဖြတ်နိုင်ရန် တင်ပြရမည်ဖြစ်သော ဥပဒေကြမ်းအရ ကြီးမားသော ဖျော်ဖြေရေးအဆောက်အအုံများတွင် လောင်းကစားလုပ်ခြင်းကို ခွင့်ပြုမည်ဖြစ်သည်။

လက်ရှိတွင် လောင်းကစားအမျိုးမျိုးကို ထိုင်းနိုင်ငံ၌ တားမြစ်ထားသော်လည်း မြင်းပြိုင်ပွဲနှင့် အစိုးရထီကဲ့သို့ တရားဝင်လောင်းကစားခွင့်ပြုထားသည့်အရာများနှင့်အတူ မြေအောက်လောင်းကစားလုပ်ငန်းများနှင့် ထီလောင်းကစားခြင်းများသည် ကျယ်ကျယ်ပြန့်ပြန့်ဆက်ကာရှိနေခဲ့သည်။

ကမ္ဘောဒီးယား၊ စင်ကာပူနှင့် ဖိလစ်ပိုင်ကဲ့သို့ အိမ်နီးချင်းနိုင်ငံများသည် တရားဝင်ကာစီနိုလုပ်ငန်းများမှ အကျိုးအမြတ်များကို အတော်များများရရှိနေကြပြီး ကာစီနိုကို စည်းနှင့်ကမ်းနှင့်ခွင့်မပြုခြင်းသည် တိုင်းပြည်အတွက် အဖိုးတန်‌ေသာ ဝင်ငွေနှင့် ခရီးသွားလုပ်ငန်းအတွက်အခွင့်အလမ်းများကို ဆုံးရှုံးစေသည်ဟု ထိုင်းအစိုးရက စောဒကတက်သည်။

လောင်းကစားကို တရားဝင်ခွင့်ပြုခြင်းသည် အများပြည်သူကို အကာအကွယ်ပေးရာ ရောက်သကဲ့သို့ နိုင်ငံတော် အတွက်လည်း ဝင်ငွေကို ပိုမိုရရှိစေမည်ဖြစ်သည်ဟု ပေတုံတန်က သတင်းထောက်များကို ပြောဆိုခဲ့သည်။

စည်းကမ်းဖြင့် ထိန်းသိမ်း လုပ်ကိုင်‌ေစသော လောင်းကစားလုပ်ငန်းသည် နိုင်ငံ့စီးပွားရေးအတွက် အရေးပါသော ကဏ္ဍဖြစ်သည့် ခရီးသွားလုပ်ငန်း၏အလားအလာကို ထိုင်းနိုင်ငံက အသုံးချရာတွင် အထောက်အကူဖြစ်နိုင်သည်ဟု သူက အလေးထားပြောကြားခဲ့သည်။

ဘဏ္ဍာရေးဝန်ကြီးဌာန ဒုတိယဝန်ကြီး Julapun Amornvivat က လောင်းကစားလုပ်ငန်းကို တရားဝင်ခွင့်ပြုခြင်းဖြင့် စီးပွားရေးအကျိုးအမြတ်များရရှိလာနိုင်သည်ကို မီးမောင်းထိုးပြခဲ့ပြီး နိုင်ငံခြားခရီးသွားအရေးအတွက် ၅ မှ ၁၀ ရာခိုင်နှုန်းအထိ တိုးလာနိုင်ကာ ခရီးသွားလုပ်ငန်းမှ ဝင်ငွေ ဘတ် ၁၂၀ မှ ၂၂၀ ဘီလျံ တိုးမြင့်ရရှိလာမည်ဟု ဟောကိန်းထုတ်ခဲ့သည်။ ထို့အပြင် အဆိုပါအစီအစဉ်ကြောင့် အလုပ်အကိုင်သစ် ၉,၀၀၀ မှ ၁၅,၀၀၀ အထိ ဖန်တီးပေးနိုင်သည်ဟုလည်း ၎င်းက ပြောဆိုခဲ့သည်။

Ref: သည်အင်းဒီးယန်းအိတ်စ်ပရက်စ်