ဂါဇာတွင် အစ္စရေးက ထိုးစစ်ဆင်နေခြင်းနှင့်ပတ်သက်၍ ဝန်ကြီးချုပ် နေတန်ယာဟုအား ဖမ်းဝရမ်းထုတ်ခဲ့သည့် နိုင်ငံတကာရာဇ၀တ်တရားရုံး(ICC)အား လက်တုံ့ပြန်သည့်အနေဖြင့် ICC ကို ပိတ်ဆို့အရေးယူရန် အမေရိကန် အောက်လွှတ်တော်က မဲခွဲဆုံးဖြတ်လိုက်သည်။
အစ္စရေး ၀န်ကြီးချုပ် ဘင်ဂျမင်နေတန်ယာဟုနှင့် အစ္စရေးနိုင်ငံ၏ ကာကွယ်ရေးဝန်ကြီးဟောင်း ယို့ဗ်ဂဲလန့် တို့အပေါ် ဖမ်းဝရမ်းထုတ်မှုအတွက် လက်တုံ့ပြန်သည့်အနေဖြင့် နိုင်ငံတကာ ရာဇ၀တ်တရားရုံး (ICC) အား ပိတ်ဆို့အရေးယူမည့် ဥပဒေကြမ်းကို အမေရိကန် အောက်လွှတ်တော်က မဲခွဲဆုံးဖြတ်ခဲ့ခြင်းဖြစ်သည်။
အမေရိကန်ကွန်ဂရက်အောက်လွှတ်တော်ရှိ ဥပဒေပြုအမတ်များသည် “တရားမဝင် တရားရုံး တန်ပြန်ရေးအက်ဥပဒေ” ကို မဲပေးသူ ၂၄၃ အနက် ထောက်ခံမဲ ၁၄၀ က အစ္စရေးကို အခိုင်အမာထောက်ခံသည့်အချက်ကိုပြသည့်အနေဖြင့် ကြာသပတေးနေ့တွင် အတည်ပြုခဲ့ခြင်းဖြစ်သည်။
ဒီမိုကရက်အမတ် လေးဆယ့်ငါးဦးသည်လည်း ယင်းဥပဒေကြမ်းကို ထောက်ခံရာတွင် ရီပတ်ဘလီကန်အမတ်များနှင့် ပူးပေါင်းခဲ့သည်။ ရီပတ်ဘလစ်ကန်အမတ်တစ်ဦးကမျှ ကန့်ကွက်မဲမပေးခဲ့ကြချေ။
ယခုဥပဒေမူကြမ်းသည် ယခုလအစောပိုင်းက ရီပတ်ဘလစ်ကန်အများစု ကျမ်းသစ္စာကျိန်ဆိုခဲ့သည့် အမေရိကန်အထက်လွှတ်တော်သို့ ဦးတည်သွားနေပြီဖြစ်သည်။
အမေရိကန် နိုင်ငံသား သို့မဟုတ် မဟာမိတ်နိုင်ငံတစ်ခု၏ နိုင်ငံသားတစ်ဦးကို စုံစမ်းစစ်ဆေးရန်၊ ဖမ်းဆီးထိန်းသိမ်းခြင်း သို့မဟုတ် တရားစွဲဆိုရန် ကြိုးပမ်းရာတွင် သက်ဆိုင်ရာ နိုင်ငံမှတရားရေးဌာန၏ အခွင့်အာဏာကို အသိအမှတ်မပြုသော ICC ၏ ဆောင်ရွက်ချက်များကို ကူညီပေးသည့် နိုင်ငံခြားသားတိုင်းအား ပိတ်ဆို့အရေးယူရန် အဆိုပါ ဥပဒေတွင်အဆိုပြုထားသည်။
အမေရိကန်နှင့် အစ္စရေးနှစ်နိုင်ငံစလုံးသည် ICC ကို ထူထောင်ရာတွင် အခြေခံထားသည့် Rome Statute ကို သဘောတူလက်မှတ်ရေးထိုးထားခြင်းမရှိချေ။