ဂရင်းလန်းသည် ဒေသခံတို့ကသာ လိုလားပါက လွတ်လပ်သောဒေသတစ်ခုဖြစ်လာနိုင်သော်လည်း အမေရိက၏ ပြည်နယ်တစ်ခုဖြစ်လာနိုင်ခြေမရှိဟု ဒိန်းမတ်နိုင်ငံခြားရေးဝန်ကြီးက ဗုဒ္ဓဟူးနေ့တွင် ပြောကြားလိုက်သည်။ အာတိတ်ဒေသကျွန်းကို ထိန်းချုပ်ရယူနိုင်ရေးတွင် အင်အားသုံးခြင်းမျိုးမလုပ်ဟု ပြောမရကြောင်း အမေရိကန်ရွေးကောက်ခံသမ္မတ ဒေါ်နယ်ထရမ့်ပ်က ပြောဆိုခဲ့ပြီးနောက် ယင်းကဲ့သို့ တုန့်ပြန် ပြောဆိုလိုက်ခြင်းဖြစ်သည်။
ဒိန်းမတ်၏ အုပ်ချုပ်မှုအောက်တွင်ရှိပြီး ဓါတ်သတ္ထု့ကြွယ်ဝကာ မဟာဗျူဟာအရ အရေးပါသောကျွန်း၏ ကံကြမ္မာနှင့်ပတ်သက်၍ ထရမ့်ပ်၏ မှတ်ချက်စကားကြောင့် ကမ္ဘာ့ထိပ်တန်းခေါင်းကြီးသတင်းဖြစ်ခဲ့ပြီးနောက်တစ်ရက်တွင် ဂရင်းလန်းဒေသခေါင်းဆောင်သည် ဗုဒ္ဓဟူးနေ့က ကိုပင်ဟေဂင်တွင် ဒိန်းမတ်ဘုရင်နှင့် တွေ့ဆုံခဲ့သည်။
ဇန်နဝါရီလ ၂၀ ရက် နေ့ တွင် ရာထူးတာဝန်စတင်ထမ်းဆောင်မည့် ထရမ့်ပ်က ဂရင်းလန်းကို အမေရိက၏ အစိတ်အပိုင်းအဖြစ်ရယူရန် စစ်ရေး၊ စီးပွားရေးအင်အားသုံးမည့် နည်းလမ်းကို သူ သုံးခြင် သုံးမည်ဟု အင်္ဂါနေ့တွင် ပြောဆိုခဲ့သည်။ ယင်းနေ့တွင်ပင် ထရမ့်ပ်၏သားကြီး ဒေါ်နယ်ထရမ့်ပ်ဂျူနီယာသည် ဂရင်းလန်းသို့ အလွတ်သဘော သွားခဲ့သည်။
ဒိန်းမတ်၏ အဖွဲ့ဝင်အဖြစ်မှတဆင့် နေတိုး၏အစိတ်အပိုင်းဖြစ်နေသော ဂရင်းလန်းသည် အာတိတ်ကျွန်းမှတဆင့် ဥရောပမှ မြောက်အမေရိကသို့ ဖြတ်သန်းသော အတိုဆုံးလမ်းကြောင်းဖြစ်လာပြီးကတည်းက အမေရိကန်စစ်တပ်အတွက်နှင့် ၎င်း၏ ပဲ့ထိန်းဒုံးကျည် ကြိုတင်သတိပေးစနစ်ထားရှိရန်အတွက် မဟာဗျူဟာမြောက်အရေးသည့်နေရာဖြစ်လာခဲ့သည်။
ကမ္ဘာ့အကြီးဆုံးကျွန်းဖြစ်သည့် ဂရင်းလန်းသည် ဒိန်းမတ်နိုင်ငံ၏ အစိတ်အပိုင်းအဖြစ် နှစ်ပေါင်း ၆၀၀ တိုင်တည်ရှိလာခဲ့သော်လည်း လူဦးရေ ၅၇၀၀၀ ခန့်ရှိ သော အဆိုပါ ဒေသသည် ပြည်တွင်းရေးကိစ္စများကို ၎င်းတို့ကိုယ်တိုင် စီမံအုပ်ချုပ်နေပြီဖြစ်သည်။ ဝန်ကြီးချုပ် Mute Egede ဦးဆောင်သော ကျွန်းဒေသအစိုးရသည် လွတ်လပ်ရေးရရှိရန် အန္တိမရည်မှန်းချက် ကို ထားရှိသည်။
ဂရင်းလန်းသည် ကိုယ်ပိုင်ရည်မှန်းချက်ရှိသည်ကို မိမိတို့ အပြည့်အ၀ အသိအမှတ်ပြုကြောင်း ယင်းအရာများ အကောင်အထည်ပေါ်လာပါက ဂရင်းလန်းသည် လွတ်လပ်သောနိုင်ငံဖြစ်လာမည်ဖြစ်ကြောင်း သို့ရာတွင် အမေရိကန်ပြည်ထောင်စုတွင် ဖက်ဒရယ်ပြည်နယ်တစ်ခုဖြစ်လာရန် ရည်မှန်းချက်မှာမူ ခဲယဉ်းမည်ဖြစ်ကြောင်း ဒိန်းမတ်နိုင်ငံခြားရေးဝန်ကြီး Lars Lokke Rasmussen က ပြောကြားခဲ့သည်။
ပြင်သစ်နိုင်ငံခြားရေးဝန်ကြီး Jean-Noel Barrot က ဥရောပသည် ၎င်း၏ အချုပ်အခြာပိုင်နယ်နိမိတ်များကို အခြားနိုင်ငံများက တိုက်ခိုက်ခြင်းကို ခွင့်ပြုမည်မဟုတ်ဟု ပြောဆိုထားသည်။
Ref: ဂျပန်တိုင်းမ်၊ ဗီအိုဗီ