အသက် (၁၅)နှစ်အောက် လူငယ်ပြိုင်ပွဲအတွက် ထပ်တိုး ကစားသမားများကို အသက်နှင့်အထောက်အထား စိစစ်နေဟု ဆို

MFF U15 YOUTH LEAGUE 2024-2025 ပြိုင်ပွဲ(ရန်ကုန်ဇုန်)အတွက် ထပ်တိုး ကစားသမားများကို အသက်နှင့်အထောက်အထား စိစစ်သည့် ပုံရိပ်များကို မြန်မာနိုင်ငံ ဘောလုံးအဖွဲ့ချုပ်မှ ဖော်ပြသည်။

ပြိုင်ပွဲဝင် ကစားသမားများကို အသက်နှင့် အထောက်အထား စိစစ်ရာတွင် လူဝင်မှုကြီးကြပ်ရေးဦးစီးဌာန၊ မြန်မာနိုင်ငံ ဘောလုံးအဖွဲ့ချုပ်မှ အသက်စိစစ်ရေးအဖွဲ့၊ ပြိုင်ပွဲကျင်းပရေး၊ ဆေးဘက်ဆိုင်ရာဌာန၊ တို့ ပူးပေါင်း၍ (မှတ်ပုံတင်၊ မွေးစာရင်း၊ အိမ်ထောင်စုစာရင်း၊ ကျောင်းထောက်ခံစာ) အထောက်အထား မူရင်းများကို စိစစ်ခြင်း ဖြစ်သည်ဟု ဆိုသည်။

MFF U15 YOUTH LEAGUE 2024-2025 ပြိုင်ပွဲ၏ ပထမအပတ်ပွဲစဉ်အပြီးတွင် Royal Yangon FC အသင်းက ဦးဆောင်ထားပြီး အသင်းပေါင်း (၁၂) သင်း ပါဝင်ယှဉ်ပြိုင်နေသည်။

မြန်မာနိုင်ငံ ဘောလုံးအဖွဲ့ချုပ်အနေဖြင့် လူငယ်မျိုးဆက်သစ်များ ဘောလုံးလှုပ်ရှားမှုများတွင် ပါဝင်လာရေး၊ ပြည်တွင်း လူငယ်ပြိုင်ပွဲများ စဉ်ဆက်မပြတ် ကျင်းပနိုင်ရေး၊ မျိုးဆက်သစ် လူငယ်ကစားသမားများ ပေါ်ထွက်လာရေး၊ FIFA, AFC, AFF လူငယ်ပြိုင်ပွဲများတွင် မြန်မာ့လက်ရွေးစင် လူငယ်အသင်းများ အောင်မြင်မှု ရရှိရေးအတွက် ရည်ရွယ်၍ ဖီဖာလမ်းညွှန်ချက်များနှင့်အညီ အသက် (၁၅) နှစ်အောက် လူငယ်ဘောလုံး လိဂ်ပြိုင်ပွဲများ (MFF U15 Boys League)အား နှစ်စဉ် ကျင်းပပေးလျက်ရှိသည်ဟု MFF က ဆိုသည်။

MFF U15 Boys League 2024-2025 (ရန်ကုန်ဇုန်) ပြိုင်ပွဲသို့ The Honour FC၊ Mingalardon City FC၊ Southern Yangon Star FC၊ Burmese Youth FC၊ Artharwady FC၊ Golden Light United FC၊ Mya Thida FC၊ Mar Rein FC၊ Yangon Taungzalatt FC၊ Shwe Phi Thar FC၊ Yangon Focus FC၊ Royal Yangon FC တို့ ပါဝင်ယှဉ်ပြိုင်နေကြသည်။