ဟနွိုင်သည် ကမ္ဘာ့လေထုအညစ်ညမ်းဆုံး မြို့တော်ဖြစ်လာ

ဗီယက်နမ်နိုင်ငံ မြို့တော်ဟနွိုင်သည် မကြာသေးခင် ရက်သတ္တပတ်များအတွင်း၌ ထူထဲသောမီးခိုးမြူဖုံးလွှမ်းမှုများဖြစ်ပေါ်ခဲ့ပြီး ကမ္ဘာ့လေထုအညစ်ညမ်းဆုံးမြို့ကြီးများစာရင်းတွင် ထိပ်ဆုံး၌ ရပ်တည်ခဲ့သည်။ ယင်းအတွက်ကြောင့် အစိုးရက ပြဿနာ ပြေလျော့စေရေးအလို့ငှာ လျှပ်စစ်ကားများ(EVs) ပိုမိုအသုံးပြုရေး ကိုတွန်းအားပေးဆောင်ရွက်မည်ဟု ဆိုခဲ့သည်။

ကမ္ဘာလုံးဆိုင်ရာ လေထုညစ်ညမ်းမှုသတင်းအချက်အလက်များကို ဖုန်းအက်ပ်တစ်ခုမှတဆင့် ဖော်ပြပေးနေသော လွတ်လပ်သည့်အဖွဲ့အစည်းဖြစ်သော AirVisual ၏ အဆိုအရ ဇန်နဝါရီ ၃ ရက်နေ့နံနက်ပိုင်းတိုင်းတာချက်အရ ဟနွိုင်မြို့တော်တွင် PM2.5 ဟု ခေါ်သော လေထုအတွင်း အဆိပ်အတောက် အမှုန်အမွှားများပါဝင်မှုအဆင့်သည် တစ်ကုဗမီတာလျှင် ၂၆၆ မိုက်ခရိုဂရမ်ရှိခဲ့ကာ လေထုအညစ်ညမ်းဆုံးမြို့ကြီးများတွင် အမြင့်ဆုံးအဆင့်ဖြစ်သည်ဟု ဆိုခဲ့သည်။

အာရှတွင် စီးပွားရေး အလျင်မြန်ဆုံး တိုးတက်နေသည့် ဒေသတွင်း ကုန်ထုတ်လုပ်မှုအချက်အချာဖြစ်သော အရှေ့တောင်အာရှနိုင်ငံသည် ၎င်း၏ အဓိကမြို့ကြီးများ၌ လေထုညစ်ညမ်းမှုကို နှစ်များစွာ ဆိုးဆိုးဝါးဝါး ကြုံတွေ့နေရသည်။

အများအားဖြင့် ယာဉ်ကြောပိတ်ဆို့မှုများ၊ အမှိုက်မီးရှို့ခြင်းနှင့် စက်မှုလုပ်ငန်းများကြောင့် ထူထပ်သော မီးခိုးမြူများဖြစ်ပေါ်သည်။

မိမိတို့လို အသက်အရွယ်ကြီးသူများသည် အသက်ရှုရခက်စေသည့် အသက်ရှုလမ်းကြောင်းဆိုင်ရာ ပြဿနာများကြုံလာပါက သိသိသာသာ ပိုခံစားရနိုင်သည်ဟု အသက် ၆၄ နှစ်အရွယ် မြို့ခံတစ်ဦးဖြစ်သူ လူမင်ဒပ်က ပြောဆိုခဲ့ပြီး လေထုအခြေအနေသည် မကြာခင်ကစ၍ ပိုဆိုးလာပုံရကြောင်း ဆိုခဲ့သည်။

ကြာသပတေးနေ့က သယ်ယူပို့ဆောင်ရေးဝန်ကြီးဌာန အစည်းအဝေးတစ်ခုတွင် လေထုညစ်ညမ်းမှုကို လျှော့ချရေးကြိုးပမ်းချက် တစ်စိတ်တစ်ပိုင်းအနေဖြင့် လျှပ်စစ်ကားများ အသွင်ကူးပြောင်းရေးကို အရှိန်မြှင့်လုပ်ဆောင်ရန် ဒုတိယဝန်ကြီးချုပ် ထရန်ဟောင်ဟာက တိုက်တွန်းခဲ့သည်ဟု နိုင်ငံပိုင်မီဒီယာက ဖော်ပြသည်။

လက်ရှိအနေအထားအရ ဟနွိုင်သည် ၂၀၃၀ ပြည့်နှစ်အရောက်တွင် အနည်းဆုံး ဘတ်စ်ကား ၅၀ ရာခိုင်နှုန်းနှင့် တက္ကစီ ၁၀၀ ရာခိုင်နှုန်းကို လျှပ်စစ်ကားများဖြစ်စေရန် ရည်မှန်းထားကြောင်း သိရသည်။

Ref: တီဘီအက်စ်နူးစ်