ယခုလ ဒီဇင်ဘာ (၃၀) ရက်တွင် ကျရောက်မည့် (၃၃) ကြိမ်မြောက် ကရင်နှစ်သစ်ကူးပွဲတော်တွင် အမြင့်(၄၆)ပေရှိသည့် ကရင်အမျိုးသားအလံ ရုပ်ထုကိုပုံဖော်ပြသသွားမည်ဖြစ်ကြောင်း သိရသည်။
အဆိုပါ ကရင်နှစ်သစ်ကူးပွဲတော်ကို ဘားအံမြို့၊ တောင်ကဘလေးကျေးရွာ နှစ်သစ်ကူးကွင်းတွင် ကျင်းပပြုလုပ်သွားမည်ဖြစ်ပြီး ကရင်အမျိုးသားအလံ ရုပ်ထုမှာ အမြင့် (၄၆) ပေ ၊ အလျား (၇၀)ပေဖြင့် ပုံဖော်ထားခြင်းဖြစ်သည်။
“အလံက ပြီးပါပြီ။ လိုအပ်တာလေးတွေ ပြင်ဆင်နေတာတွေ့ရတယ်။ ပွဲတော်အကြိုလာလည်တဲ့ သူတွေလည်းရှိပါတယ်။ “ဟု ဘားအံမြို့ ဒေသခံတစ်ဦးက ပြော သည်။
ယခု ၂၀၂၄ ခုနှစ်အတွင်း ကရင်နှစ်သစ်ကူး ပွဲတော်မှာ (၂) ကြိမ်မြောက်ကျရောက်ခဲ့သည့် နှစ်တစ်နှစ်ဖြစ်ကာ ပြီးခဲ့သည့် ဇန်နဝါရီလ (၁၁) ရက်တွင် တစ်ကြိမ်ကျရောက်ခဲ့ပြီးဖြစ်သည်။
နှစ်စဉ် ပြာသိုလဆန်း(၁)ရက်နေ့သည်ကရင်နှစ်သစ်ကူးနေ့အဖြစ် သတ်မှတ်ထားပြီး၊ ယခု ၂၀၂၄ ခုနှစ် ဇန်နဝါရီလ (၁၁) ရက် (ပြာသိုလဆန်း-၁)တွင် ကရင်နှစ်သစ်ကူးနေ့ တစ်ကြိမ်ကျရောက်ခဲ့ပြီးဖြစ်သော်လည်း ယခုနှစ်ကုန် ဒီဇင်ဘာ (၃၀)ရက်တွင် (ပြာသိုလဆန်း-၁ ရက်) ပြန်လည်ကျရောက်လာသည့်အတွက် ၂၀၂၄ ခုနှစ် တစ်နှစ်တည်းတွင် ကရင်နှစ်သစ်ကူး နှစ်ကြိမ်ကျရောက်ခဲ့ခြင်းဖြစ်သည်။