ဒေါ်နယ်ထရမ့်ပ်၏ အသွင်ကူးပြောင်းရေးအဖွဲ့သည် အစိုးရအဖွဲ့သစ် ပထမဆုံးနေ့မှာပင် ကမ္ဘာ့ကျန်းမာရေးအဖွဲ့(WHO) မှ အမေရိကနုတ်ထွက်ရေးကို တွန်းအားပေးနေသည်ဟု ပညာရှင်များက ပြောဆိုပြီး ကမ္ဘာလုံးဆိုင်ရာ ကျန်းမာရေးအပေါ် သက်ရောက်မှုရှိလာမည့် ကပ်ဆိုးအတွက် သတိပေးခဲ့သည်။
ရွေးကောက်ခံသမ္မတ၏ ဇန်နဝါရီ ၂၀ ရက် ကျမ်းကျိန်ဆိုသည့်နေ့မှာပင် ကမ္ဘာ့ကျန်းမာရေးအဖွဲ့အစည်းမှ နုတ်ထွက်ကြောင်း ကြေညာရန် ရည်ရွယ်ထားသည်ဟု ထရမ့်ပ်အဖွဲ့ဝင်များက ပညာရှင်များကို ပြောကြားခဲ့သည်။ ယင်းနုတ်ထွက်မှုသည် WHO ၏ အကြီးဆုံး ရန်ပုံငွေအရင်းအမြစ်ကို ဖယ်ရှားပစ်မည်ဖြစ်ကာ ကိုရိုနာဗိုင်းရပ်စ်ကဲ့သို့သော ပြည်သူ့ကျန်းမာရေးအကျပ်အတည်းများအပေါ် တုန့်ပြန်နိုင်စွမ်းကို ထိခိုက်စေမည်ဖြစ်သည်။
“အမေရိကဟာ ကမ္ဘာလုံးဆိုင်ရာ ကျန်းမာရေးရဲ့ ဘဏ္ဍာရေးပိုင်းနဲ့ ခေါင်းဆောင်မှုပိုင်းမှာ လစ်ဟာမှုကြီးဖြစ်စေတော့မှာဖြစ်ပြီး ဒီဟာကွက်ကို ဖြည့်ပေးမယ့်သူ တစ်ယောက်မှ မတွေ့မိပါဘူး” ဟု Gorgetown Law မှ ကမ္ဘာလုံးဆိုင်ရာ ကျန်းမာရေးပါမောက္ခ လောရင့် ဂေါ့စ်တင်က ပြောကြားခဲ့ပြီး ပထမဆုံးရက်မှာပင် နုတ်ထွက်မည့်အစီအစဉ်သည် ကမ္ဘာ့ကျန်းမာရေးအတွက် ကပ်ဆိုးကြီးဖြစ်လိမ့်မည်ဟုလည်း ဆိုခဲ့သည်။
လာမည့်အစိုးရအဖွဲ့သစ်တွင် ကျန်းမာရေးဆိုင်ရာ ထိပ်ပိုင်းရာထူးများအတွက် ကာကွယ်ဆေးကို အယုံအကြည်နည်းသူဖြစ်သည့် ရောဘတ် အက်ဖ် ကင်နဒီကဲ့သို့ မဟာမိတ်များစွာကို ထရမ့်ပ်က အမည်စာရင်းလျာထားခဲ့ပြီးနောက် WHO နှင့် အမေရိက၏ ဆက်ဆံရေးတွင် ပွတ်တိုက်မှုဖြစ်စေသည်။ သို့သော်လည်း ထရမ့်ပ်သည် သူ့အဖွဲ့ဝင်အချို့ကဲ့သို့ ချက်ချင်းနုတ်ထွက်ရေးကို ဦးစားပေးအဖြစ် သတ်မှတ်မည်လားဆိုသည်အတွက်ကိုမူ သူ့အနေဖြင့် သေချာပေါက် မပြောနိုင်ဟု ဂေါ့စ်တင်က ပြောကြားခဲ့သည်။
Ref: အက်ဖ်တီ