ပနားမားတူးမြောင်း အသုံးပြုခ ကို ကောက်ခံသည့်နှုန်းထားများသည် မြင့်မားလွန်းသည်ဟု အမေရိကန်ရွေးကောက်ခံသမ္မတ ဒေါ်နယ်ထရမ့်ပ်က စနေနေ့တွင် စွပ်စွဲပြောကြားလိုက်ပြီး ပနားမားအစိုးရအနေဖြင့် တူးမြောင်း ဖြတ်သန်းခကို လက်ခံနိုင်လောက်သည့် စနစ်ဖြင့် စီမံခန့်ခွဲခြင်းမလုပ်ပါက ယင်းကို လွှဲပြောင်းပေးအပ်ရန် အမေရိကမဟာမိတ်ထံ သူ တောင်းဆိုသွားမှာဖြစ်ကြောင်း ဆိုခဲ့သည်။
Truth ဆိုရှယ်မီဒီယာပေါ်တွင် ညနေပိုင်းတင်ခဲ့သောပို့စ်၌ တူးမြောင်းကို မသင့်တော်သောသူ ၏ လက်တွင်းကျရောက်ခံမည်မဟုတ်ဟု ထရမ့်ပ်က ပြောကြားခဲ့သည်။ တူးမြောင်းကို တရုတ်နိုင်ငံက စီမံခန့်ခွဲမှုမရသင့်ဟု ရေး သား ခဲ့ကာ တူးမြောင်းကို ဖြတ်သန်းမှုအပေါ် တရုတ်၏ သြဇာလွှမ်းမိုးလာနိုင်ခြေရှိခြင်းကို သူက သတိပေးခဲ့ပုံရသည်။
အဆိုပါပို့စ်အရ အချုပ်အခြာအာဏာပိုင်နိုင်ငံတစ်ခုအား နယ်မြေလွှဲပြောင်းပေးရန် တွန်းအားပေးနိုင်သည့် အမေရိကန်သမ္မတတစ်ဦး၏ ပြောကြားချက်တွင် အလွန်ရှားပါးသည့် သာဓကတစ်ခုဖြစ်သည်။ မဟာမိတ်များကို ခြိမ်းခြောက်ခြင်းနှင့် မိတ်ဖက်များနှင့် ဆက်ဆံရာတွင် ရင့်သီးသော စကားလုံးများသုံးခြင်းကို အစဉ်သဖြင့်လုပ်လာခဲ့သော ထရမ့်ပ်လက်ထက်တွင် အမေရိကန်သံတမန်ရေးသည် မျှော်လင့်ထားသကဲ့သို့ အပြောင်းအလဲဖြစ်လာမည်ကို ထိုအချက်က ပေါ်လွင်စေသည်။
အမေရိကန်ပြည်ထောင်စုသည် တူးမြောင်းကို အဓိကအားဖြင့် တည်ဆောက်ခဲ့ခြင်းဖြစ်ကာ ဖြတ်သန်းသွားလာသည့် နယ်မြေကို ဆယ်စုနှစ်များစွာ အုပ်ချုပ်ခဲ့သည်။ သို့ရာတွင် ပူးတွဲအုပ်ချုပ်မှုကာလပြီးဆုံးပြီးနောက် ၁၉၉၉ ခုနှစ်တွင် အမေရိကန်အစိုးရက တူးမြေင်းထိန်းချုပ်မှုကို ပနားမားသို အပြည့်အ၀ လွှဲပြောင်းပေးခဲ့သည်။
“အထူးသဖြင့် အမေရိက,က ပနားမားကို အပ်နှင်းထားတဲ့ ထူးခြားတဲ့ရက်ရောမှုအရဆိုရင် ပနားမားရဲ့ ကောက်ခံတဲ့ အခကြေးငွေဟာ ရယ်စရာကောင်းပါတယ်” ဟု ထရမ့်ပ်က ပို့စ်တွင် ရေးသားခဲ့သည်။
တူးမြောင်းကို မိမိတို့နှင့် ပနားမားနိုင်ငံတို့၏ ပူးပေါင်းဆောင်ရွက်မှု သင်္ကေတတစ်ခုအဖြစ် ပေးအပ်ခဲ့ခြင်းသာဖြစ်ကာ အခြားသူ၏ ကိုယ်ကျိုးစီးပွားအတွက် ပေးအပ်ခဲ့ခြင်း မဟုတ်ကြောင်း၊ ယင်း ပေးကမ်းခြင်း၏ ကြီးကျယ်ခမ်းနားသော ရည်ရွယ်ချက်၏ ကျင့်ဝတ်နှင့် ဥပဒေကြောင်းဆိုင်ရာ အခြေခံမူများကို မလိုက်နာပါက စောဒက တက်နေစရာမလိုဘဲ ပနားမားတူးမြောင်းကို မိမိတို့ထံ အပြည့်အ၀ ပြန်လွှဲရေး တောသ်းဆိုသွားမှာဖြစ်ကြောင်း သူက ဆက်လက်ရေးသားခဲ့သည်။
ယင်း ကိစ္စနှင့် ပတ်သက်၍ မှတ်ချက်ပေးရန်တောင်းဆိုခဲ့မှုကို ဝါရှင်တန်ရှိ ပနားမားသံရုံးက လတ်တလောတွင် တုန့်ပြန်ဖြေကြားခြင်း မရှိပေ။
Ref: သည်အီကော်နောမစ်တိုင်းမ်စ်