လက်ရှိတွင် အမေရိကန် စစ်မှုထမ်း ၂၀၀၀ ခန့် ဆီးရီးယားတွင် ရောက်ရှိတပ်ဖြန့်ထားကြောင်း ပင်တဂွန် ပြောရေးဆိုခွင့်ရှိသူ ပက်ထရစ်ရိုင်ဒါက သတင်းထောက်များအား ပြောကြားခဲ့သည်။ ယခင်ကမူ အမေရိကန်တပ်ဖွဲ့ဝင် ၉၀၀ သာရှိကြောင်း ပင်တဂွန်ကကြေညာခဲ့ဖူးသည်။
“ဆီးရီးယားမှာ အမေရိကန်တပ်ဖွဲ့ဝင် ၉၀၀ ခန့် တပ်ဖြန့်ချထားကြောင်း ကျွန်တော်တို့ အရင်က သတင်းထုတ်ပြန်ခဲ့ဖူးပေမယ့်၊ တကယ်တော့ ဆီးရီးယားမှာ အမေရိကန် တပ်ဖွဲ့ဝင် ၂၀၀၀ နီးပါး ရှိနေတယ်ဆိုတာကို ဒီနေ့ ကျွန်တော် သိလိုက်ရတယ်”ဟု ပက်ထရစ်ရိုင်ဒါကပြောခြင်းဖြစ်သည်။
“ISIS တွေအတွက် စစ်ဆင်ရေးမှာ ဒီတပ်ဖွဲ့ဝင်တွေဟာ အာဆတ်အစိုးရ မပြုတ်ခင်ကတည်းက ရှိနေခဲ့တာပါ” ဟုလည်း သူက ဆက်ပြောသည်။
ပြောင်းရွှေ့မစ်ရှင်လိုအပ်ချက်များနှင့်ကိုက်ညီစေရန် ဖြန့်ကျက်ချထားသော ယာယီအလှည့်ကျတပ်ဖွဲ့များအဖြစ် ရိုင်ဒါက ဆိုထားပြီး အဓိကတပ်ဖွဲ့ဝင် ၉၀၀ ကိုမူ ရေရှည်တပ်ဖြန့်ထားဆဲဖြစ်သည်။ တပ်ဖွဲ့အမျိုးအစားကိုမူ ရိုင်ဒါက ထုတ်ဖော်ပြောကြားခြင်းမရှိချေ။
နိုဝင်ဘာ ၂၇ ရက်က ဆီးရီးယား လက်နက်ကိုင် အတိုက်အခံများသည် အလက်ပိုနှင့် အိုင်ဒလစ်ပြည်နယ်များရှိ အစိုးရတပ်များကို အကြီးစား ထိုးစစ်ဆင်ခဲ့သည်။ ဒီဇင်ဘာ ၇ ရက်ညနေပိုင်းတွင် သမ္မတ ဘာရှာအာဆတ်၏ အတိုက်အခံများသည် အလက်ပို၊ ဟာမာ၊ ဒါရာနှင့် ဟုမ်းများ အပါအဝင် မြို့ကြီးအများအပြားကို သိမ်းပိုက်နိုင်ခဲ့သည်။ ဒီဇင်ဘာ ၈ ရက်တွင် ၎င်းတို့သည် ဒမတ်စကတ်သို့ ဝင်ရောက်ကာ စစ်တပ်ကို မြို့တော်မှ ဆုတ်ခွာစေခဲ့သည်။ ထို့ကြောင့် သမ္မတအာဆတ် နှုတ်ထွက်ပြီး နိုင်ငံမှ ထွက်ခွာခဲ့သည်။ ၂၀၂၄ ခုနှစ် ဇန်နဝါရီလကတည်းက အဒ္ဒလစ်ဘ် ပြည်နယ်ရှိ ဆီးရီးယား ကယ်တင်ရေး အစိုးရကို ဦးဆောင်ခဲ့သည့် မိုဟာမက် အယ်လ်-ဘာရှားအား ၂၀၂၅ ခုနှစ် မတ်လ ၁ ရက်နေ့အထိ ဆီးရီးယား ယာယီအစိုးရ၏ အကြီးအကဲအဖြစ် ခန့်အပ်ကြောင်း ကြေညာခဲ့သည်။