စင်္ကာပူနိုင်ငံတွင် PV နိုင်ငံကူးလက်မှတ်ကိုင် အလုပ်လုပ်သူများ မြန်မာနိုင်ငံသို့ ခေတ္တပြန်လိုပါက PJ အမျိုးအစား နိုင်ငံကူးလက်မှတ်ပြောင်းလဲ ဆောင်ရွက်ပေးမည်

စင်္ကာပူနိုင်ငံတွင် PV အမျိုးအစား နိုင်ငံကူးလက်မှတ်ကိုင်ဆောင်၍ အလုပ်လုပ်ကိုင်နေသည့် မြန်မာနိုင်ငံသားများအနေဖြင့် မြန်မာနိုင်ငံသို့ခေတ္တပြန်လိုပါက PJ အမျိုးအစား နိုင်ငံကူးလက်မှတ်ပြောင်းလဲ ဆောင်ရွက်ပေးသွားမည်ဖြစ်ကြောင်း စင်ကာပူရှိ မြန်မာသံရုံးက ထုတ်ပြန်ထားသည်။

PV နိုင်ငံကူးလက်မှတ်ဖြင့်သာ မြန်မာနိုင်ငံသို့ခေတ္တပြန်ပါက စင်ကာပူနိုင်ငံသို့ ပြန်လည်ထွက်ခွာရန် ရန်ကုန်လေဆိပ်တွင်လည်းကောင်း၊ OWIC ကတ်ပြုလုပ်ရာတွင်လည်းကောင်း အဆင်မပြေမှုများနှင့် ကြုံတွေ့နေရသည့်အတွက် သံရုံးသို့ အကူအညီတောင်းခံမှုများ ရှိနေကြောင်း ဖော်ပြထားသည်။

ထို့ကြောင့် PV မှ PJ သို့ပြောင်းလဲနိုင်ရန်အတွက် အသွားအပြန် လေယာဉ်လက်မှတ်၊ သက်တမ်းရှိသည့် အလုပ်လုပ်ကိုင်ခွင့်ကတ်၊ နိုင်ငံကူးလက်မှတ်၊ အလုပ်ရှင်၏ ခွင့်စာ အစရှိသည်တို့ကို နှစ်ပတ်ကြိုတင်ရက်ချိန်းရယူရန်လိုအပ်မည်ဟု ဆိုသည်။

နာရေးကဲ့သို့ အရေးပေါ်ကိစ္စဖြင့် မြန်မာနိုင်ငံသို့ ပြန်လိုသူများအနေဖြင့် ရက်ချိန်းရယူရန်အဆင်မပြေပါက သံရုံးသို့ နံနက် (၉) နာရီခွဲမှ (၁၁)နာရီအတွင်း လူကိုယ်တိုင်လာရောက်လျှောက်ထားနိုင်ကြောင်းလည်း အသိပေးထားသည်။

ထို့ပြင် သာမန်အားဖြင့် PV အမျိုးအစားနိုင်ငံကူးလက်မှတ် ကိုင်ဆောင်သူများအနေဖြင့် သက်တမ်းကုန်ဆုံးရက် (၁၄)လအောက်မှသာ PJ အမျိုးအစားသို့ ပြောင်းလဲလျှောက်ထားခြင်းဖြင့် မလိုလားအပ်သည့် အချိန်ကုန်၊ ငွေကုန်ခြင်းမှ ရှောင်ရှားနိုင်ရန်လည်း မေတ္တာရပ်ခံထားသည်။