အာဆီယံကာကွယ်ရေးဝန်ကြီးများ လာအိုတွင် တွေ့ဆုံဆွေးနွေး

အာရှ-ပစိဖိတ်ဒေသတွင် တရုတ်နိုင်ငံနှင့် ရေကြောင်းအငြင်းပွားမှု မြင့်တက်နေချိန် အမေရိကန်သမ္မတသစ် အကူးအပြောင်းလုပ်တော့မည့်အချိန်တွင် အရှေ့တောင်အာရှ ကာကွယ်ရေးဝန်ကြီးများနှင့် ကိုယ်စားလှယ်များသည် လုံခြုံရေးဆိုင်ရာ ဆွေးနွေးပွဲအတွက် ဗုဒ္ဓဟူးနေ့တွင် လာအိုနိုင်ငံ၌ တွေ့ဆုံခဲ့ကြသည်။

ဗီယန်ကျင်းတွင် ပြုလုပ်မည့် အဆိုပါ အာဆီယံကာကွယ်ရေးဝန်ကြီးများအစည်းအဝေးသို့ အမေရိကန်ကာကွယ်ရေးဝန်ကြီး လွိုက်အော်စတင်လည်း တက်ရောက်ရန် စီစဉ်ထားကာ ဇန်နဝါရီတွင် ရွေးကောက်ခံသမ္မတ ဒေါ်နယ်ထရမ့်ပ် ရာထူးမယူမီ အာမခံချက်များရရှိရေး ကြိုးပမ်းကြမည်ဖြစ်သည်။

အော်စတင်သည် သြစတြေးလျတွင် အစိုးရအရာရှိများ၊ ဂျပန်ကာကွယ်ရေးဝန်ကြီးတို့နှင့် အစည်းအဝေးလုပ်ခဲ့ပြီး ၎င်းတို့အနေဖြင့် အာဆီယံကို ထောက်ခံကြောင်းနှင့် ဖိလစ်ပိုင်နှင့် အခြားကမ်းရိုးတန်းနိုင်ငံ ရေယာဉ်များအပေါ် တရုတ်ပြည်သူ့သမ္မတနိုင်ငံ၏ အန္တရာယ်ရှိသော လုပ်ရပ်များအပါအဝင် အရှေ့နှင့် တောင်တရုတ်ပင်လယ်တွင် မတည်မငြိမ်ဖြစ်စေသည် လုပ်ရပ်များအပေါ် အလွန်စိုးရိမ်ကြောင်း ဖော်ပြခဲ့သည်။

နှစ်ရက်ကြာကျင်းပမည့် အာဆီယံအစည်းအဝေးသို့ အမေရိကအပြင် ဂျပန်၊ တောင်ကိုရီးယား၊ အိန္ဒိယ၊ သြစတြေးလျ၊ တရုတ်နှင့် အခြားနိုင်ငံများလည်း ပါဝင်တက်ရောက်နေကြသည်။

လက်ရှိနှင့် အနာဂတ်တွင် လုံခြုံရေးဆိုင်ရာ ခြိမ်းခြောက်မှုများကို ကိုင်တွယ်ဖြေရှင်းရေး နည်းလမ်းများအပါအဝင် အာဆီယံ၏ ကာကွယ်ရေးဆိုင်ရာ ပူးပေါင်းဆောင်ရွက်မှုကို ဆက်လက်ဆောင်ရွက်ရာတွင် စံနှုန်းတစ်ခု ရရှိလာစေမည့် ရလဒ်ဖြစ်ထွန်းသော အစည်းအဝေးများဖြစ်မည်ဟု မျှော်လင့်ပါကြောင်း အစည်းအဝေးအဖွင့်မိန့်ခွန်းတွင် လာအိုကာကွယ်ရေးဝန်ကြီး Chansamone Chanyalath က ပြောဆိုခဲ့သည်။

တရုတ်နိုင်ငံသည် ၎င်း၏ ပိုင်နက်ဆိုင်ရာ သတ်မှတ်ချက်နှင့်ပတ်သက်၍ မကြာသေးမီနှစ်များအတွင်း ပိုမိုပြတ်သားလာသော တွန်းအားပေးမှုများကြောင့် အာဆီယံအဖွဲ့ဝင်နိုင်ငံများနှင့် ပေကျင်းအကြား ပင်လယ်ပြင်ဆိုင်ရာ အပြုအမူကို ထိန်းကွပ်မည့် ကျင့်ဝတ်စည်းမျဉ်းတစ်ခုရရှိရေး စေ့စပ်ညှိနှိုင်းနေမှုသည် တိုးတက်မှုမရဘဲ နှေးကွေးနေသည်။

Ref: အေပီ