ထိုင်းတောင်ပိုင်း၊ ရနောင်းခရိုင်တွင် မလေးရှားနိုင်ငံသို့ တရားမဝင် ပို့ဆောင်မည့် ကလေးငယ်များပါဝင်သည့် မြန်မာ (၉) ဦးကို ပွဲစားများက တောထဲတွင် စွန့်ပစ်ထားခဲ့ကြောင်း ထိုင်းအလုပ်သမားအရေး သတင်းဌာနက ဖော်ပြသည်။
အဆိုပါ မြန်မာ (၉)ဦးသည် နောင်းခရိုင်၊ ကပွေးမြို့နယ်၊ ဘန့်နားအုပ်စု ၊ ဘန့်ထောင်းလန်ကျေးရွာအနီး၊ တောင်ခြေတော၌ နိုဝင်ဘာ (၅) ရက်က လုံခြုံရေးအခြေအနေများကြောင့် ရှေ့ဆက်မသွားနိုင်ဘဲ ပွဲစားများက စွန့်ပစ်ခဲ့ခြင်းဖြစ်နိုင်ကြောင်း သတင်းတွင် ဖော်ပြထားသည်။
အမျိုးသား (၁)ဦး၊ အမျိုးသမီး (၅)ဦးနှင့် အသက် (၂) နှစ်မှ (၆) နှစ်ရွယ် ကလေး (၄) ယောက် ပါဝင်ပြီး ၎င်းတို့အားလုံးမှာ ပင်ပန်းနွမ်းနယ်နေကြကာ ကလေးငယ်များမှာ ဆာလောင်မှုကြောင့် ငိုကြွေးနေကြသည်ဟု ဆိုသည်။
ဒေသခံများ၏ သတင်းပေးချက်အရ သက်ဆိုင်ရာက အဆိုပါ နေရာများသို့ လူစုခွဲပြီး လိုက်ရှာကြရာမှာ ကလေးငိုသံနှင့် အတူ ဝါးရုံတောနောက်တွင် ပုန်းနေသည့် မြန်မာနိုင်ငံသားများကို တွေ့ရှိရခြင်း ဖြစ်ကြောင်းလည်း သိရသည်။
စွန့်ပစ်ခံရသည့် မြန်မာနိုင်ငံသားများကို တာဝန်ရှိသူများက အစာရေစာနှင့် ရှေးဦးသူနာပြုစုပေးပြီး အားလုံးကို တရားမဝင် ဝင်ရောက်မှုနှင့် အရေးယူရန် ကပွေးမြို့နယ်ရဲစခန်းတွင် ဆက်လက် ထိန်းသိမ်းထားကြောင်း သိရသည်။
