ရန်ကုန်တိုင်းဒေသကြီး၊ မရမ်းကုန်းမြို့နယ် ကမ္ဘာအေးဘုရားလမ်းမပေါ်တွင် ကွန်တိန်နာ ယာဉ်တစ်စီးမှ ဓါတ်ကြိုးများနှင့် မလွတ်ဘဲ မောင်းနှင်မှုကြောင့် ဓါတ်တိုင် (၅)တိုင်ခန့် ပြိုလဲကျခဲ့ပြီး လမ်းပိတ်ဆို့မှုများ ဖြစ်ပေါ်နေကြောင်း အနီးနားဝန်းကျင်ရှိ မြို့ခံများထံမှ ကနဦး သတင်းများအရ သိရသည်။
အဆိုပါ ဖြစ်စဉ်မှာ ယနေ့ အောက်တိုဘာ (၃)ရက် ညနေ (၄) နာရီဝန်းကျင်ခန့်က ဖြစ်ပွားခဲ့ခြင်းဖြစ်ပြီး ညနေ(၆)နာရီခန့်အထိ လမ်းပိတ်နေကြောင်း အနီးနားဖြတ်သန်းသွားလာသူများထံမှ သိရသည်။
“ဓာတ်တိုင် ၅ တိုင်တောင် အကုန်ကျိုးကျပြီး လမ်းတွေ အကုန်ပိတ်နေပါတယ်။ ကွန်တိန်နာကားက ဓာတ်ကြိုးတွေကို မလွတ်ဘဲ ဆွဲချသွားတာမို့ အကုန် ဓါတ်တိုင်တွေ ကျိုးကျကုန်တာပါတဲ့။ ၈ မိုင်ဘက် အခြမ်းတော့ သွားလို့ရနေတယ်။ ဟိုဘက်ခြမ်းကို သွားဖို့တော့ လမ်းပိတ်နေဆဲပါ။ တာဝန်ရှိသူတွေလည်း လမ်းတွေရှင်းပေးနေရတယ်”ဟု အနီးပတ် ဝန်းကျင်မှ ပြည်သူတစ်ဦးက ဆိုသည်။
အဆိုပါ ဖြစ်စဉ်ကြောင့် လမ်းပိတ်ဆို့မှုများ ဖြစ်ပေါ်လျက်ရှိရာ သက်ဆိုင်ရာ တာဝန်ရှိသူများမှ ရှင်းလင်းရေးများ လုပ်ဆောင်လျက်ရှိပြီး ထိခိုက်ပျက်စီးမှုများကို မသိရှိရသေးပေ။
