ဆယ်စုနှစ် ၇ ခုကျော်အတွင်း အကြီးမားဆုံး တိုက်ဖွန်းမုန်တိုင်းသည် တရုတ်နိုင်ငံ၏ ဘဏ္ဍာရေးမြို့တော် ရှန်ဟိုင်းကို ဝင်ရောက်တိုက်ခတ်ခဲ့ပြီး အရှေ့ပိုင်းကမ်းရိုးတန်းဒေသတွင် လေပြင်းများနှင့် မိုးသည်းထန်မှုများဖြစ်စေခဲ့ကာ ရက်ရှည်ကျင်းပသော အမျိုးသားပွဲတော်တစ်ခုအစတွင် အားလပ်ရက်အပန်းဖြေသူများကို စိတ်အနှောင့်အယှက်ဖြစ်စေခဲ့သည်။
တရုတ်တွင် Beibijia ဟု သိသော တိုက်ဖွန်း Bebinca သည် တနင်္လာနေ့(စက်တင်ဘာ ၁၆) ဒေသစံတော်ချိန် နံနက် ၇ နာရီခွဲတွင် ယန်စီမြစ် မြစ်ဝကျွန်းပေါ်ဒေသရှိ ကမ်းရိုးတန်းကို ဖြတ်ကျော်ဝင်ရောက်ခဲ့သည်ဟု နိုင်ငံပိုင်မီဒီယာက သတင်း ထုတ်ပြန်သည်။
မုန်တိုင်းသည် ရှီကျန်းပြည်နယ် Ningbo မှသည် ရှန်ဟိုင်းနှင့် ကျန်စုပြည်နယ် Qidong အထိ ကျယ်ပြန့်သောဒေသတကျောတွင် မိုးသည်းထန်စွာရွာသွန်းမှုများဖြစ်စေနိုင်သည်ဟု ခန့်မှန်းထားသည်။
လူဦးရေ ၂၅ သန်းနေထိုင်ရာ မဟာမြို့တော်တစ်ခုဖြစ်သည့် ရှန်ဟိုင်းတွင် တနင်္ဂနွေနေ့မှစကာ ထိပ်တန်းအဆင့် အရေးပေါ်တုန့်ပြန်မှု အစီအမံတစ်ရပ်လုပ်ခဲ့ပြီး ရထားခရီးစဉ်များကို ရပ်ဆိုင်းကာ ဆိပ်ကမ်းများ၊ တံတားများနှင့် အဝေးပြေးလမ်းများကို ပိတ်ထားခဲ့သည်။
ထို့အပြင် မြို့၏ လေဆိပ်နှစ်ခုရှိ လေယာဉ်အတက်အဆင်းများအားလုံးကို ညနေပိုင်းမှစကာ ဖျက်သိမ်းခဲ့သည်ဟု လေဆိပ်အော်ပရေတာက ပြောဆိုသည်။
နိုင်ငံတောင်ပိုင်း ဟိုင်နန်ကျွန်းတွင် လူေ-သဆုံးမှုများဖြစ်ခဲ့ကာ ပျက်စီးထိခိုက်မှု များပြားခဲ့သော ဆူပါတိုက်ဖွန်း ယာဂီ ဝင်ရောက်ခဲ့ပြီးနောက် သီတင်းပတ်များအကြာတွင်ပင် Bebinca သည် တရုတ်နိုင်ငံသို့ ဒုတိယမြောက် ဝင်ရောက်လာသည့် တိုက်ဖွန်းဖြစ်သည်။
နောက်ပိုင်းတွင် ယာဂီသည် ဗီယက်နမ်မြောက်ပိုင်းနှင့် ထိုင်းနိုင်ငံဘက်သို့ ရွေ့လျားခဲ့မှုအတွင်း အိမ်ထောင်စုများစွာနှင့် အခြေခံအဆောက်အအုံများ ရေနစ်မြုပ် ပျက်စီးမှုဖြစ်စေခဲ့သည်။
တိုက်ဖွန်း Bebinca ကြောင့် ရှန်ဟိုင်းနှင့် အခြား ကမ်းရိုးတန်းမြို့ကြီးများတွင် ဒေသခံထောင်ပေါင်းများစွာကို ဘေးလွတ်ရာ ရွှေ့ပြောင်းစေခဲ့ရပြီး ဆောင်းဦးပွဲတော်အစအတွက် သန်းနှင့်ချီသော ဒေသခံများ၏ အစီအစဉ်များကို အနှောင့်အယှက်ဖြစ်စေခဲ့သည်။
Ref: သည်ဂျပန်တိုင်းမ်
