တရုတ်နိုင်ငံ၏ လူကြိုက်အများဆုံး အားကစားများထဲကတစ်ခုတွင် အကျင့်ပျက်ခြစားမှုတိုက်ဖျက်ရေး တစ်စိတ်တစ်ပိုင်းအဖြစ် လုပ်ပွဲကစားခြင်းနှင့် လောင်းကစားခြင်းတွေအပေါ် ၂ နှစ်ကြာ စုံစမ်းစစ်ဆေးမှုလုပ်ခဲ့ပြီးနောက် တရုတ်ဘောလုံးအဖွဲ့ချုပ်(CFA) က ဘောလုံးသမား ၃၈ ဦးနှင့် ကလပ်တာဝန်ရှိသူ ၅ ဦးတို့ကို ဘောလုံးလောကမှ ရာသက်ပန် ပိတ်ပင်လိုက်ကြောင်း သိရသည်။
စုံစမ်းစစ်ဆေးမှုအရ ပွဲပေါင်း ၁၂၀ တွင် လုပ်ပွဲကစားခဲ့ပြီး ကလပ်ပေါင်း ၄၁ ခု ပါဝင်ပတ်သက်ခဲ့သည်ဟု တွေ့ရှိခဲ့ကြောင်း ပြည်သူ့လုံခြုံရေးဝန်ကြီးဋ္ဌာန အကြီးတန်းအရာရှိ Zhang Xiaopeng က ဒါလီယန်တွင်ပြုလုပ်သည့် သတင်းစာရှင်းလင်းပွဲတွင် ပြောဆိုသည်ဟု ရှင်းဟွာသတင်းဋ္ဌာနက ဖော်ပြသည်။
လုပ်ပွဲကစားခဲ့သည့် ပွဲအားလုံးသည် တရုတ်နိုင်ငံတွင် ကစားခဲ့ခြင်းလားဆိုသည်ကိုမူ သတင်းတွင် ဖော်ပြခဲ့ခြင်း မရှိပေ။
တရုတ် နိုင်ငံတကာဘောလုံးသမားဟောင်း သုံးဦးဖြစ်သည့် Jin Jingdao၊ Guo Tianyu၊ Gu Chao နှင့် တောင်ကိုရီးယား ဘောလုံးသမား Son Jun-ho သည်လည်း ရာသက်ပန်ပိတ်ပင်ခံခဲ့ရမှုအတွင်း ပါဝင်ခဲ့သည်ဟု စစ်ဆေးတွေ့ရှိချက်များကို သတင်းထုတ်ပြန်သည့် အင်္ဂါနေ့(စက်တင်ဘာ ၁၀) က သတင်းစာရှင်းလင်းပွဲအရ သိရသည်။ အဆိုပါ သတင်းစာရှင်းလင်းပွဲသို့ CFA ဥက္ကဋ္ဌလည်းတက်ရောက်ခဲ့သည်။
အရေးယူခံရသည့် ကစားသမားများကမူ လူသိရှင်ကြား မှတ်ချက်ပေးခြင်းမျိုး မရှိသေးပေ။ ကိုရီးယား ကစားသမား Son သည် တရုတ်နိုင်ငံတွင် ၁၀ လကြာ ထိန်းသိမ်းခံခဲ့ရပြီးနောက် မတ်လအတွင်းက လွှတ်ပေးလိုက်ပြီး တောင်ကိုရီးယားသို့ ပြန်ရောက်နေပြီဖြစ်သည်။
စစ်ဆေးချက်အရ ၄၄ ဦးသည် လာဘ်ယူမှု၊ လောင်းကစားမှုနှင့် တရားမဝင် ကာစီနိုများဖွင့်လှစ်မှုအတွက် ရာဇဝတ်မှုများဖြင့် ရင်ဆိုင်ခဲ့ရပြီး အခြား ၁၇ ဦးသည် လာဘ်ယူမှုနှင့် လုပ်ပွဲကစားမှုတို့တွင် ပတ်သက်ခဲ့ကြောင်း တွေ့ရှိခဲ့သည်ဟု Zhang က ပြောဆိုသည်။
အဆိုပါ ၄၄ ဦးထဲမှ ၄၃ ဦးကို ဘောလုံးကန်ခြင်း နှင့် ပွဲစဥ် ရေးဆွဲ ခြင်းမှ ရာသက်ပန် ပိတ်ပင်ခဲ့ပြီး အခြား ၁၇ ဦးကို ၅ နှစ် ပိတ်ပင်ခဲ့သည်ဟု CFA ဥက္ကဋ္ဌ Song Kai က ပြောဆိုခဲ့သည်။
အင်္ဂါနေ့အနှောင်းပိုင်းတွင် ယှဉ်ပြိုင်မည့် တရုတ်လက်ရွေးစင်အသင်းနှင့် ဆော်ဒီအာရေဗျအသင်းတို့၏ ကမ္ဘာ့ဖလား ခြေစစ်ပွဲမတိုင်မီတွင် ယခုကဲ့သို့ စုံစမ်းစစ်ဆေးတွေ့ရှိချက်များကို သတင်းထုတ်ပြန်ခဲ့ခြင်းဖြစ်သည်။ ပြီးခဲ့သည့် သီတင်းပတ်က အဝေးကွင်တွင် ဂျပန်အသင်းနှင့် ကစားခဲ့ရာ၌ တရုတ်တို့ ၇-၀ ဖြင့် ဂိုးပြတ်အရေးနိမ့်ထားခဲ့သည်။
Ref: Flashscore
