မန္တလေးမြို့တွင် စက်သုံးဆီများကို အရောင်းဆိုင်ကြီးများ၌ အချိန်ကြာမြင့်စွာ တန်းစီဝယ်ယူနေရသော်လည်း ဝယ်ယူ ရရှိရန် ခက်ခဲ့လာခြင်းနှင့်အတူ ယာဉ်မောင်းများ မလိုအပ်ဘဲ အပြင်မထွက်သောကြောင့် မြို့တွင်းလမ်းမများပေါ်၌ ယာဉ်အသွားအလာ သိသာစွာလျော့နည်းလာကြောင်း မန္တလေးမြို့ခံများထံမှ သိရသည်။
ထို့အတူ စက်သုံးဆီမှာ ပြင်ပဈေးကွက်တွင်လည်း (၁)လီတာ ကျပ် (၈၀၀၀)မှ ကျပ် (၁၀၀၀၀)အထိ ဈေးအလွန်မြင့်မားခြင်းနှင့် ဝယ်ယူရခက်ခဲခြင်းတို့ကြောင့် မြို့တွင်းလမ်းမများပေါ်၌ ယာဉ်အသွားအလာ သိသာစွာလျော့နည်းလာကြောင်း မြို့ခံများထံမှ သိရသည်။
မန္တလေးမြို့အတွင်း စက်သုံးဆီများကို အချိန်ကြာမြင့်စွာတန်းစီဝယ်ယူနေရသည်မှာ ဩဂုတ် (၃)ရက်တွင် (၅) ရက် မြောက်ဖြစ်လာပြီး ယာဉ်ပိုင်ရှင်အများစုမှာ စက်သုံးဆီအရောင်းဆိုင်ကြီးများရှေ့၌ ညအိပ်တန်းစီ စောင့်ဆိုင်းဝယ်ယူသူများပင်ရှိကြောင်း ဒေသတွင်း သတင်းများအရ သိရသည်။
“ကျွန်တော်တို့ဆီမှာ ဓါတ်ဆီကို ဆိုင်ကယ်၊ မီနီအိုးဝေ၊ ထော်လာဂျီလိုမျိုး ယာဉ်တွေကို ဦးစားပေး ရောင်းချတယ်။ ကားတွေကိုတော့ ခွဲတန်းနဲ့ တန်းစီဝယ်ရတာ။ လိုသလောက်လည်း မရဘူး။ အဲ့ဒီတော့ အပြင်မထွက်တော့ဘူး။ အဲ့တော့ မြို့တွင်းမှာ လမ်းတွေရှင်းနေတာပေါ့။ ဓါတ်ဆီက ပြင်ပ ပေါက်ဈေးကလည်း တော်တော်မြင့်နေတယ်။ တစ်လီတာ တစ်သောင်းနီးပါးနဲ့ကို ဝယ်နေရတယ်။”ဟု မန္တလေးမြို့ခံ တစ်ဦးက ပြောသည်။
မန္တလေးမြို့တွင် ဓါတ်ဆီ ပြင်ပအရောင်းဈေးကွက်တွင် တစ်လီတာ ကျပ် (၈၀၀၀)မှ ကျပ် (၁၀၀၀၀) ဝန်းကျင်အထိ ပေါက်ဈေးရှိသော်လည်း ဝယ်ယူရခက်ခဲကြောင်း မန္တလေးမြို့ ဒေသခံ တစ်ဦးက ဆိုသည်။
စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီမှ ဩဂုတ် (၃)ရက် နံနက်ပိုင်း ထုတ်ပြန်သည့် ရည်ညွှန်းလက်လီဈေးနှုန်းများအရ မန္တလေးမြို့တွင် 92 တစ်လီတာ (၂၈၅၀) ကျပ်၊ 95 တစ်လီတာ (၂၉၇၅)ကျပ် ဖြစ်ကြောင်း သိရသည်။
ဇူလိုင်လလယ်ခန့်မှစ၍ နိုင်ငံအနှံ့အပြား၌ မိုးအဆက်မပြတ်ရွာသွန်းပြီး နေရာအချို့တွင် ရေကြီးရေလျှံမှုများ ကြောင့် သီလဝါဆိပ်ကမ်း Terminal များ၌ ပုံမှန်လုပ်ငန်း ဆောင်ရွက်မှုများ အနည်းငယ် နှောင့်နှေးကြန့်ကြာနေရကြောင်း စွမ်းအင်ဝန်ကြီးဌာနမှ ထုတ်ပြန်ပြောဆိုထားသည်။
ထို့ကြောင့် ဆီတင်ယာဉ်များဖြင့် ဒေသအနှံ့အပြားသို့ ပို့ဆောင်ရာတွင်လည်း အချို့ဒေသများ၏ လမ်းခရီး အခြေအနေများအရ ဆီတင်ယာဉ်ရောက်ရှိရန် အနည်းငယ်နှောင့်နှေးကြန့်ကြာခြင်းများရှိနေရကြောင်းလည်း စွမ်းအင်ဝန်ကြီးဌာနမှ ထုတ်ပြန်ပြောဆိုထားသည်။
စက်သုံးဆီတင်သွင်းသိုလှောင် ဖြန့်ဖြူးရောင်းချခြင်းလုပ်ငန်း ကြီးကြပ်ရေးကော်မတီ၏ ကြီးကြပ်မှုဖြင့် သီလဝါ ဆိပ်ကမ်းဒေသရှိ သိုလှောင်ကန်စခန်းများ၌ ၂၀၂၄ ခုနှစ် ဩဂုတ်လ ဒုတိယပတ်ကုန်အထိ စက်သုံးဆီ ဖူလုံစွာ သုံးစွဲနိုင်ရေး ကြိုတင်သိုလှောင်ဖြန့်ဖြူးလျက်ရှိသည့်အပြင် ပြည်ပမှ စက်သုံးဆီတင် သင်္ဘောများဖြင့်လည်း စဉ်ဆက်မပြတ် ဝင်ရောက်ရန် စီမံထားကြောင်း ထုတ်ပြန်ထားသည်။
ထို့ကြောင့် အများပြည်သူအနေဖြင့် မကြာမီစက်သုံးဆီ ပြတ်လပ်မည်ဆိုသည့် ကောလဟာလ သတင်းများကြောင့် စိုးရိမ်ကြောင့်ကြမှုဖြင့် လိုအပ်သည်ထက် ပိုမိုဝယ်ယူခြင်း၊ သိုလှောင်ထားရှိခြင်း၊ ဈေးနှုန်းမြှင့်တင်၍ တဆင့်ပြန်လည်ရောင်းချခြင်းတို့ကို မပြုလုပ်ကြပါရန်၊ သုံးစွဲရန်လိုအပ်သည့် ပမာဏကိုသာ ဝယ်ယူသုံးစွဲကြပါရန်၊ အရောင်းဆိုင်များကိုလည်း စက်သုံးဆီရှိလျက် ရောင်းချမပေးခြင်းမျိုး မပြုလုပ်ကြစေရေး စနစ်တကျ စိစစ်ကြပ်မတ်လျက်ရှိပါကြောင်း ထုတ်ပြန်ထားသည်။