တရုတ်ကွန်မြူနစ်ပါတီ၏ ဖိတ်ကြားချက်အရ ယခု ဇူလိုင်(၂၀)ရက်မှ (၂၇) ရက်အထိ သွားရောက်ရမည့် တရုတ်နိုင်ငံ ယူနန်ခရီးစဉ်အတွင်း ၎င်း၏ သဘောထားအား သူ၏လူမှုကွန်ရက်စာမျက်နှာတွင် ရေးသားဖော်ပြထားခြင်းဖြစ်သည်။
“ကျွန်တော်တို့ကတော့ ပါတီချင်းဆက်ဆံရေးအပေါ်မှာ မူတည်ပြီးတော့ နိုင်ငံချင်းဆက်ဆံရေးမှာလည်း ကျွန်တော်တို့နိုင်ငံရဲ့ တည်ငြိမ်ရေးနဲ့ ဒီမိုကရေစီပြန်လည်ထွန်းကားရေးအတွက်ကို အဲဒီအခြေခံပေါ်ကနေ ဆွေးနွေးခွင့်ရရင် ဆွေးနွေးမယ်လို့ စဉ်းစားထားပါတယ်။အထူးသဖြင့် လက်နက်ကိုင်ပဋိပက္ခကြောင့် ပြည်သူတွေလုံခြုံမှုမရှိ၊ ထိတ်ထိတ်လန့်လန့်ဖြစ်နေတဲ့ အခြေအနေတွေကို တရုတ်အစိုးရဘက်ကို ရှင်းပြ၊ ပြောပြဖို့ ရည်ရွယ်ထားပါတယ်။”ဟု ဆိုသည်။
အဆိုပါ ခရီးစဉ်အတွင်း နိုင်ငံရေးအစုအဖွဲ့ ဦးဆောင်ပါတီများဖြစ်ကြသည့် ပြည်ထောင်စု ကြံ့ခိုင်ရေးနှင့် ဖွံ့ဖြိုးရေးပါတီ၊ ရှမ်းနှင့်တိုင်းရင်းသားများဒီမိုကရက်တစ်ပါတီ (ကျားဖြူ)၊ ပြည်သူ့ပါတီနှင့် ရခိုင့်ဦးဆောင်ပါတီတို့မှ ပါတီဥက္ကဌများအပါအဝင် ကိုယ်စားလှယ်အဖွဲ့ဝင်(၃)ဦးစီ တက်ရောက်သွားရန်ရှိနေသည်။
ထို့အပြင် ၎င်းက ပြည်သူ့ပါတီ စတင်တည်ထောင်ချိန်မှစ၍ တရုတ်ကွန်မြူနစ်ပါတီဖြင့် ပါတီချင်းဆက်ဆံရေး ဆောင်ရွက်လာခဲ့ကြခြင်းဖြစ်ပြီး၊ လက်ရှိနိုင်ငံရေးအကျပ်အတည်းကာလတွင်လည်း ပါတီချင်းဆက်ဆံရေးအရ ဖိတ်ကြားခြင်းဖြစ်ကြောင်း ဆိုသည်။
ယနေ့ ဇူလိုင် (၁၄)ရက် နံနက်ပိုင်းတွင်လည်း ပြည်သူ့ ပါတီ ရန်ကုန်တိုင်းဒေသကြီးရုံးခန်းနှင့် ဆိုင်းဘုတ်တင်ပွဲ အခမ်းအနားကိုလည်း ကျင်းပပြုလုပ်ခဲ့သည်။
ပြည်သူ့ပါတီသည် (၈၈)မျိုးဆက်ကျောင်းသားခေါင်းဆောင်များစုစည်း၍ ၂၀၁၇ ခုနှစ် မှစတင်ကာ ပါတီမှတ်ပုံတင်ခွင့်ရယူကာ တည်ထောင်ခဲ့သည့် နိုင်ငံရေးပါတီတစ်ခုဖြစ်သည်။