ရှမ်းပြည်နယ်မြောက်ပိုင်း၊ လားရှိုးမြို့ ဝန်းကျင်ရှိမြို့ အဝင်လမ်းများကို ဇွန်လ (၁၂)ရက်က စတင်ဖြတ်တောက်ထားသည့်အတွက် ခရီးသွား ကား၊ ပြည်သူများ ပိတ်မိအခက်အခဲ ဖြစ်နေကြောင်း သိရသည်။
သီပေါ-နမ္မတူ လမ်းအပါအဝင် လားရှိုးမြို့မှ မိုင်းယော်ကိုသွားသည့် ကောင်းဟုန်းရွာ၊ နန်းဖရွာနှင့် မန်းနာရွာအနီးရှိ လမ်းများလည်း ပိတ်ဆို့ဖြတ်တောက်ခံထားရကြောင်း သိရသည်။
“နမ့်ပေါင်၊ ဟိုပိတ်လမ်းလည်း သွားမရတော့ဘူး။ နမ္မတူမရဘူး၊ မြေကော်စက်နဲ့ တူးပြီး လမ်းဖြတ်လိုက်ပြီ။ ဒီတစ်ခါ အိမ်အပြန်နောက်ကျ စိတ်မဆိုးနဲ့နော်”ဟု ကုန်တင်ယာဉ်မောင်းနှင်သူတစ်ဦးက လူမှုကွန်ရက်စာမျက်နှာတွင် ရေးသားထားသည်။
ထိုကဲ့သို့ လမ်းပိုင်းများ ပြတ်တောက်မှုကြောင့် လမ်းကြောင်းရှာရင်း လမ်းများတွင် ကားများထပ်ကာ ပိတ်မိနေကြသလို ပြန်လှည့်ရန်လည်း စက်သုံးဆီကုန်သည့်ကားက ကုန်ဖြစ်နေကြောင်း သိရသည်။
လားရှိုးမြို့ပြင်ဝန်းကျင်၌လည်း တပ်မတော်က လုံခြုံရေးတင်းကြပ်ထားသလို TNLA အဖွဲ့ကလည်း လားရှိုးမြို့တဝိုက်ကို အင်အားအများအပြားနှင့် ပိတ်ဆို့ထား၍ နှစ်ဖက်စစ်ရေးတင်းမာနေကြောင်းလည်း အခြေအနေကို သိရှိသူ ဒေသခံတစ်ဦးက ပေါ်ပြူလာနယူးသို့ ပြောသည်။
ထိုသို့ လမ်းပိုင်းများပိတ်ဆို့ခံထားရသည့် အခက်အခဲများကြောင့် ကုန်စည်သယ်ယူပို့ဆောင်ရေးများ ရပ်တန့်နေသလို အရပ်သားပြည်သူများလည်း သွားလာရေးပိတ်မိခက်ခဲနေကြောင်း သိရသည်။