လယ်ကြွက်ထောင်သူတစ်ဦးအဖြစ် ဟန်ဆောင်နေတဲ့ မူးယစ်ဆေးဝါး ရောင်းဝယ်သူနဲ့ ဇနီးဖြစ်သူတို့ကို စိတ်ကြွဆေးပြား ၃ သိန်းကျော်နဲ့အတူ ဖမ်းဆီးရမိခဲ့တယ်လို့ ထိုင်းရဲတပ်ဖွဲ့က ပြောဆိုပါတယ်။ သူတို့လင်မယားကို လွှတ်ပေးဖို့ အမျိုးသားဖြစ်သူက ဘတ် ၅ သိန်းလာဘ်ထိုးခဲ့တယ်လို့လည်း ရဲက ဆိုပါတယ်။
ဂျင်ဒါ သောချာလီး(၄၁ နှစ်) နဲ့ ဇနီးဖြစ်သူ ရန်သစ်ဆာကွန်ပန်(၃၆ နှစ်) တို့ကို စိတ်ကြွဆေးပြား ၃၄၀,၀၀၀ နဲ့အတူ အရှေ့မြောက်ပိုင်းပြည်နယ် ဘန်ဖန်ခရိုင်မှာ ဖမ်းဆီးရမိခဲ့တာဖြစ်တယ်လို့ ပြည်နယ်ဒုရဲချုပ် ရဲမှူးကြီး သာနွန်ဆစ် ဝမ်ဝီဂျမ်က စနေနေ့မှာ ပြောဆိုခဲ့ပါတယ်။
Nong Bua မြို့ တောတွင်းတစ်နေရာရှိ အနက်ရောင် ပစ်ကပ်ထရပ်ကားတစ်စီးပေါ် အမျိုးသားတစ်ဦးကို မသင်္ကာဖွယ်တွေ့ရှိခဲ့ရာမှ မစ္စတာ ဂျင်ဒါကို ဖမ်းမိခဲ့တာဖြစ်ပါတယ်။ သူဟာ လယ်ကြွက်ဖမ်းဖို့ လာရောက်ခဲ့ခြင်းဖြစ်ပြီး ကားပေါ်မှာ ကြွက်ထောက်ချောက်တွေရှာနေတာဖြစ်တယ်လို့ ရဲကို သူက ပြောဆိုခဲ့ပါတယ်။ ဒါပေမဲ့ ဒီလိုပြောနေချိန်မှာ သူ့ပုံစံက တုန်လှုပ်နေတာကြောင့် ရဲက သံသယဝင်ခဲ့တယ်လို့ ဆိုပါတယ်။
ယင်းနောက် သူ့ကားကို ရှာဖွေကြရာမှာ စိတ်ကြွဆေးပြား ၂၀၀၀၀ ကို တွေ့ခဲ့ကြရာမှ သူ့ကို ဖမ်းဆီးခဲ့ပါတယ်။ ယင်းနောက် မစ္စတာ ဂျင်ဒါကို စစ်မေးရာမှတဆင့် သူငှားရမ်းထားတဲ့ အိမ်ကနေ နောက်ထပ် ဆေးပြား ၃၂၀၀၀၀ ကို တွေ့ရှိခဲ့ကြောင်း သိရပါတယ်။ မစ္စတာဂျင်ဒါဟာ ဖမ်းဆီးတဲ့ရဲတပ်ဖွဲ့ကို လာဘ်ထိုးဖို့ကြိုးစားခဲ့ပြီး အရာရှိတွေက လက်ခံချင်ယောင်ဆောင်ကာ ငွေယူခိုင်းခဲ့ပြီးနောက် လာဘ်ထိုးဖို့ယူလာတဲ့ ဘတ် ၅ သိန်း၊ ဆေးပြားတွေ၊ ပစ်ကပ်ကားတို့နဲ့အတူ သူတို့လင်မယားကို ချက်ချင်းဖမ်းဆီးလိုက်တာဖြစ်တယ်လို့ ဆိုပါတယ်။
သူဟာ လာအိုမူးယစ်မှောင်ခိုသမားတစ်ဦးထံကနေ စိတ်ကြွဆေးပြား ၄ သိန်းဝယ်ယူခဲ့တာဖြစ်ကြောင်းနဲ့ ဆေးတွေကို ကြွက်ထောင်ချောက်အမှတ်အသားပြုထားတဲ့ နေရာတွေမှာ ထားရှိရယူစေခြင်းဖြင့် ဖြန့်ဖြူးရောင်းချတယ်လို့ မစ္စတာ ဂျင်ဒါက ပြောဆိုခဲ့ပါတယ်။
လက်ရှိမှာ သူတို့လင်မယားနှစ်ဦးကို ရဲစခန်းမှာ ချု-ပ်ထားပြီး အမှုမှာ အခြားပါဝင်သူတွေကို ဆက်လက်ဖော်ထုတ်နိုင်ဖို့ ထပ်မံစုံစမ်းစစ်ဆေးမှုလုပ်သွားမယ်လို့ သိရပါတယ်။
Ref: ဘန်ကောက်ပို့စ်