ထိုင်းနိုင်ငံမှာ ယခုနှစ်အတွင်း အပူဒဏ်ကြောင့် သေဆုံးသူ ၃၀ ထက်မနည်းရှိလာခဲ့တယ်လို့ အစိုးရက ပြောဆိုခဲ့ပြီး ဧပြီ ၂၅ ရက်မှာ ုအပူရှိန်မြင့်ရာသီဥတုနဲ့ ပတ်သက်လို့ သတိပေးချက်အသစ် ထုတ်ပြန်ခဲ့ပါတယ်။
အပူချိန်အညွှန်းကိန်း ၅၂ ဒီဂရီစင်တီဆဲစီးယပ်စ်အထိ မြင့်တက်လာနိုင်တာကြောင့် ဘန်ကောက်မြို့တော် အာဏာပိုင်တွေက ပြင်းထန်အပူချိန် သတိပေးချက် ထုတ်ပြန်ခဲ့ပါတယ်။ မြို့တော်ဘန်ကောက်ရဲ့ ပုံမှန်ဖြစ်နေတဲ့ အပူချိန်ဟာ ဧပြီ ၂၄ မှာ ၄၀.၁ ဒီဂရီဆဲလ်စီးယပ်စ်ရှိခဲ့ကာ ဧပြီ ၂၅ ရက်မှာလည်း ယင်းအခြေအနေအတိုင်း ရှိလိမ့်မယ်လို့ ခန့်မှန်းကြောင်း သိရပါတယ်။
ယခုသီတင်းပတ်အတွင်း အထူးပူပြင်းတဲ့ရာသီလှိုင်းတစ်ခု တောင်နဲ့ အရှေ့တောင်အာရှဒေသအချို့ကို ဖြတ်သန်းဝင်ရောက်ခဲ့ပြီး ဖိလစ်ပိုင်နိုင်ငံတစ်ဝန်းရှိ စာသင်ကျောင်းတွေမှာ အတန်းချိန်တွေ ရပ်ဆိုင်းထားဖို့ ညွှန်ကြားခဲ့ရသလို ဘင်္ဂလားဒေ့ရှ်နိုင်ငံမှာလည်း မိုးခေါ် ဝတ်ပြုဆုတောင်းမှုတွေလုပ်နေကြကြောင်း သိရပါတယ်။
စိုထိုင်းဆ၊ လေတိုက်နှုန်းနဲ့ အခြားအချက်တွေ ထည့်သွင်းစဉ်းစားကာ အပူချိန်ခံစားရတဲ့ အတိုင်းအတာကို သတ်မှတ်တဲ့ အပူအညွှန်းကိန်းဟာ ဘန်ကောက်မှာ အလွန်အန္တရာယ်များတဲ့ အဆင့်မှာ ရှိနေတယ်လို့ မြို့တော်ရဲ့ သဘာဝပတ်ဝန်းကျင်ရေးရာဋ္ဌာနက သတိပေးထားပါတယ်။ နိုင်ငံအရှေ့မြောက်ပိုင်း ကျေးလက်ဒေသ ဥထုံသာနီပြည်နယ်မှ အာဏာပိုင်တွေကလည်း ဧပြီ ၂၅ မှာ အပူချိန်တွေ ပြင်းထန်နိုင်တယ်လို့ သတိပေးထားကြောင်း သိရပါတယ်။
ထိုင်းနိုင်ငံ ကျန်းမာရေးဝန်ကြီးဋ္ဌာနရဲ့ ဧပြီ ၂၄ ရက်အနှောင်းပိုင်းအချိန် ထုတ်ပြန်ချက်အရ ဇန်နဝါရီ ၁ ရက်ကနေ ဧပြီ ၁၇ ရက်အကြား အပူဒဏ်ကြောင့် သေဆုံးရသူ ၃၀ ရှိခဲ့တယ်လို့ ဆိုခဲ့ပြီး ၂၀၂၃ ခုနှစ် တစ်နှစ်လုံးမှာတော့ အပူဒဏ်ကြောင့် သေဆုံးရသူဦးရေ ၃၇ ဦးရှိခဲ့တာဖြစ်ကြောင်း သိရပါတယ်။
Ref: The Straits Times
