မြန်မာ့ရော်ဘာကုန်ကြမ်းများကို နိုင်ငံတကာဈေးကွက်ရရှိရေး အာမခံချက်ရှိသည့် ရော်ဘာများ တင်ပို့နိုင်မှသာ ကမ္ဘာ့ပေါက်ဈေးအတိုင်းရရှိမည်ဖြစ်ပြီး နိုင်ငံတကာဈေးကွက်တွင်လည်း မျက်နှာပန်းလှ၍ ရင်ပေါင်တန်းနိုင်မှာ ဖြစ်ကြောင်း မွန်ပြည်နယ်ဝန်ကြီးချုပ် ဦးအောင်ကြည်သိန်းက ပြောဆိုလိုက်သည်။
မြန်မာ့ရော်ဘာထုတ်လုပ်မှုနှင့် ဈေးကွက်ဝင်ရောက်မှုမြှင့်တင်ရေး အလုပ်ရုံဆွေးနွေးပွဲ အခမ်းအနားကို ယမန်နေ့ ဇန်နဝါရီ (၃၀) နံနက်ပိုင်းက မော်လမြိုင်မြို့ Royal Mawlamyine Hotel ၌ ကျင်းပပြုလုပ်ရာတွင် ဝန်ကြီးချုပ်က ပြောဆိုခဲ့ခြင်းဖြစ်သည်။
နိုင်ငံတော်အနေဖြင့် MSMEs များ၊ သွင်းကုန်အစားထိုးလုပ်ငန်းများ၊ ပြည်ပပိုကုန်မြှင့်တင်ရေးလုပ်ငန်းများကို အားပေးလျက်ရှိပြီး မြန်မာ့ရော်ဘာကုန်ကြမ်းများကို နိုင်ငံတကာဈေးကွက်ရရှိရေး အာမခံချက်ရှိသည့် ရော်ဘာတင်ပိုနိုင်ရေးရှိမှသာ မြန်မာ့ရော်ဘာသည် ကမ္ဘာ့ပေါက်ဈေးအတိုင်း ဈေးနှုန်းများ ရရှိလာမည်ဟု မွန်ပြည်နယ် ဝန်ကြီးချုပ်က ပြောသည်။
ထို့အပြင် အဆင့်မီ ရော်ဘာစက်ရုံများရှိမှသာ အရည်အသွေးမီ ရော်ဘာများ ထုတ်လုပ်နိုင်မည်ဖြစ်ပြီး နိုင်ငံတကာဈေးကွက်တွင်လည်း မျက်နှာပန်းလှ၍ ရင်ပေါင်တန်းနိုင်မှာဖြစ်ကြောင်း၊ ရော်ဘာလုပ်ငန်းသည် မြန်မာ့စီးပွားရေးတွင် အရေးပါသော အခန်းကဏ္ဍမှပါဝင်နေပြီး အလုပ်အကိုင်အခွင့်အလမ်းများ ပံ့ပိုးပေးခြင်း၊ ပိုကုန်ဝင်ငွေများ ပံ့ပိုးပေးခြင်းနှင့် စက်မှုလုပ်ငန်းဖွံဖြိုးတိုးတက်ရေးတိုကို များစွာအထောက်အကူပြုပြီး မြန်မာ့ပိုကုန်လုပ်ငန်းတွင် အဓိကပိုကုန်တစ်ခုအဖြစ်ပါဝင်လျက်ရှိကြောင်း ဝန်ကြီးချုပ်က ဆိုသည်။
မြန်မာနိုင်ငံတွင် မွန်ပြည်နယ်မှာ ရော်ဘာစိုက်ပျိုးမှု အများဆုံးဒေသတစ်ခုဖြစ်ပြီး ၂၀၂၂-၂ဝ၂၃ ခုနှစ်တွင် စိုက်ဧကပေါင်း ၅၀၄,၉၈၈ ဧက စိုက်ပျိုးနိုင်ခဲ့ရာ တစ်နိုင်ငံလုံး ရော်ဘာစိုက်ပျိုးမှု၏ ၃၀.၈၉ ရာခိုင်နှုန်းရှိပြီး နှစ်စဉ်ထွက်ရှိသည့် ရော်ဘာများကို နယ်စပ်ကုန်သွယ်ရေးလမ်းကြောင်းမှတစ်ဆင့် တရုတ်နှင့် ထိုင်းနိုင်ငံသို့ အဓိကတင်ပို ရောင်းချနေကြကြောင်း သိရသည်။
ရော်ဘာစိုက်ပျိုးထုတ်လုပ်သည့် ခြံရှင်များ၊ လုပ်ငန်းရှင်များအနေဖြင့် အလုပ်ရုံဆွေးနွေးပွဲမှ ရော်ဘာစိုက်ပျိုးမှု၊ ထုတ်လုပ်မှုနှင့် ရော်ဘာစံချိန်စံညွှန်းစသည်တို့ကို ကျွမ်းကျင်ပညာရှင်များက မျှဝေပေးသည့် အတွေ့အကြုံ ဗဟုသုတ နည်းပညာများကို သေချာစွာ လေ့လာမှတ်သားပြီး ဆောင်ရွက်သွားစေလိုကြောင်း ၎င်းက တိုက်တွန်း ပြောကြားခဲ့သည်။
အဆိုပါ အလုပ်ရုံဆွေးနွေးပွဲသို့ ပြည်နယ်ဝန်ကြီးချုပ် ဦးအောင်ကြည်သိန်း၊ ပြည်နယ်တရားလွှတ်တော် တရားသူကြီးချုပ်၊ ပြည်နယ်အစိုးရအဖွဲ့ဝင် ဝန်ကြီးများ၊ အသင်းအဖွဲ့များမှ ကိုယ်စားလှယ်များ၊ ရော်ဘာစိုက်ပျိုးထုတ်လုပ်သည့် လုပ်ငန်းရှင်များ တက်ရောက်ကြောင်း သိရသည်။
