ရှမ်းပြည်နယ် မြောက်ပိုင်း ကိုးကန့်ကိုယ်ပိုင်အုပ်ချုပ်ခွင့်ရဒေသအတွင်း၊ တရုတ် – မြန်မာ နယ်စပ်မျဉ်း မိုင်တိုင် (၁၂၅) အနီး ဖွင့်လှစ်ထားသည့် စစ်ဘေးရှောင်စခန်း၌ နေရပ်စွန့်ခွာ ပြည်သူ ၃၀၀၀၀ ကျော်အတွက် သောက်သုံးရေနှင့် အခြားအခက်အခဲများ ကြုံတွေ့နေရကြောင်း သိရသည်။
ကိုးကန့်နယ်မြေအတွင်း အောက်တိုဘာ (၂၇) ရက်က စတင်ဖြစ်ပွားခဲ့သည့် တိုက်ပွဲများကြောင့် BP (125) စစ်ဘေးရှောင်စခန်း၌ တိုက်ပွဲရှောင်ပြည်သူ ၃၀၀၀၀ ကျော် ခိုလုံနေရဆဲဖြစ်သည်။
“အခုတလော ညသန်းခေါင်ယံထပြီး ရေသယ်တဲ့ လူတွေလည်းများလာပြီ။ အခု ရေရရှိဖို့ ညသန်းခေါင်မှာလည်း တန်းစီနေရပြီ။ ကိုယ်နေတဲ့နေရာက ရေပိုက်ခေါင်းနဲ့ ဝေးတော့ တစ်ခါသယ်ရင် ရေနည်းနည်းပဲရတယ်။ ဒါကြောင့် နေ့ခင်းဘက်မှာ သုံးရေရှိဖို့ ညတိုင်းထပြီး ရေသယ်နေရတာ ဆယ်ရက်ကျော်ရှိပြီ။”ဟု စခန်းသို့ ရောက်ရှိနေသည့် တိုက်ပွဲရှောင် တစ်ဦးက ပြောသည်။
ဒေသတွင်း အခြေအနေ မတည်ငြိမ်မှုများနှင့် သဘာဝဘေး အန္တရာယ်များဖြစ်ပွားမှုကြောင့် BP 125 တိုက်ပွဲရှောင်စခန်းတွင် ခိုလှုသူ (၃၀၀၀၀) ကျော်အထိရှိလာရာ မိုးရွာသွန်းမှုများကြောင့် ပြည်သူများ နေထိုင်ရာ လမ်းများပေါ်တွင် ရွံ့နွံများဖြစ်ပေါ်ခဲ့ကာ နေထိုင်ရေး အခက်ခဲဖြစ်ပေါ်စေကြော င်းလည်း စစ်ရှောင်စခန်း တာဝန်ရှိသူများထံမှ သိရသည်။
“မိုးအဆက်မပြတ်ရွာသွန်းတာရယ်၊ တဖြည်းဖြည်း ဆောင်းရာသီဝင်ရောက်လာချိန်ဖြစ်တော့ မိုးဒဏ်၊ ဆောင်းရာသီ အအေးဒဏ်တွေကြောင့် ပြည်သူတွေ လူမှုဘဝကို ပိုမိုဆင်းရဲကျပ်တည်းစေခဲ့ပါတယ်” ဟု စခန်းတာဝန်ခံက ပြောဆိုထားသည်။
BP (125) စစ်ဘေးရှောင်စခန်းရှိ ပြည်သူများ အခြေခံစားဝတ်နေရေး လိုအပ်ချက်များကို ဖြည့်ဆည်းပေးနိုင်ရန် ဒေသအတွင်း စေတနာရှင်ပြည်သူများက ရိက္ခာနှင့် ပစ္စည်းများ လှူဒါန်းပြီး ပြည်သူများအား ဖြန့်ဝေပေးသည့် စေတနာ့ ဝန်ထမ်းအဖွဲ့များထံ လွှဲပြောင်းပေးအပ်ခဲ့ကြောင်း သိရသည်။
လက်ရှိတွင် ထောက်ပံ့လှူဒါန်းသည့် ပစ္စည်းများ နည်းပါးမှုကြောင့် စေတနာ့ဝန်ထမ်းအဖွဲ့မှာ ဆန်စေ့တိုင်း ပြည်သူများထံ ရောက်ရှိစေရန်အတွက် ဝေငှခြင်း မပြုပီ အခြေအနေမှန်ကို သိရှိရန် အိမ်ထောင်စုတစ်ခုစီသို့ သွားရောက်ကြည့်ရှုစစ်ဆေးပြီးမှ ဖြန့်ဝေပေးကြရကြောင်းလည်း သိရသည်။
အဆိုပါ ကိုးကန့်နယ်စပ်မျဉ်း (၁၂၅) တိုက်ပွဲရှောင်စခန်းကို အောက်တိုဘာ (၃၀)ရက်မှ စတင်ကာ သန့်ရှင်းရေး ပြုလုပ်ခြင်း၊ ရေမြောင်းဖော်ခြင်း၊ လျှပ်စစ်မီးရရှိရေးလုပ်ငန်းများကို စတင်လုပ်ဆောင်ခဲ့ပြီး လျှပ်စစ်မီး အသုံးပြုနိုင်ပြီဖြစ်သော်လည်း အများစုမှာ မြေကွက်လပ်တွင် အမိုးအကာအဖြစ် ရွက်ဖျင်တဲများကို အသုံးပြုနေရကြောင်း သိရသည်။
