တရုတ်နိုင်ငံသို့ ဆရာဝန်များနှင့်ကျွမ်းကျင်ပညာရှင်များ သင်တန်းတက်ရောက်ခြင်းနှင့်နှစ်နိုင်ငံ ကျန်းမာရေးပညာရှင်များ အပြန်အလှန်စေလွှတ်ခြင်းများ လုပ်မည်

0
224

တရုတ်နိုင်ငံ၊ ကျန်စုပြည်နယ်ရှိ ရောဂါကာကွယ်ထိန်းချုပ်ရေးဌာနသို့ ကျန်းမာရေးဝန်ကြီးဌာနမှ ဆရာဝန်များနှင့်ကျွမ်းကျင်ပညာရှင်များစေလွှတ်၍ သင်တန်းတက်ရောက်စေမည်ဟု ကျန်းမာရေးဝန်ကြီးဌာန ပြည်ထောင်စုဝန်ကြီးဒေါက်တာသက်ခိုင်ဝင်းက ပြောသည်။

တရုတ်နိုင်ငံသို့ရောက်ရှိနေသည့် ပြည်ထောင်စုဝန်ကြီး ဒေါက်တာသက်ခိုင်ဝင်းသည် စက်တင်ဘာ (၁၇) ရက်နံနက်ပိုင်းက ကျန်စုပြည်နယ်၊နန်ကျင်းမြို့ရှိ ကျန်စုပြည်နယ်ရောဂါကာကွယ်ထိန်းချုပ်ရေးဗဟိုဌာနသို့သွားရောက်လေ့လာကြည့်ရှု၍ ကျန်စုပြည်နယ် ကျန်းမာရေးကော်မရှင်ဒု-ဥက္ကဋ္ဌ Mr. Zhou Minghao နှင့်တွေ့ဆုံစဥ် ဆွေးနွေးပြောကြားခဲ့ခြင်းဖြစ်သည်။

တွေ့ဆုံစဥ် ပြည်ထောင်စုဝန်ကြီးနှင့်ကျန်စုပြည်နယ် ကျန်းမာရေးကော်မရှင် ဒု-ဥက္ကဋ္ဌ Mr. Zhou Minghao တို့သည် နှစ်နိုင်ငံ ပြည်သူ့ကျန်းမာရေးနှင့် ရောဂါကာကွယ်ထိန်းချုပ်ရေးတို့တွင် ပိုမိုပူးပေါင်းဆောင်ရွက်သွားမည့် အစီအစဉ်များကိုလည်း ဆွေးနွေးခဲ့ကြကြောင်း သိရသည်။

ထို့အပြင် မြန်မာ-တရုတ်နှစ်နိုင်ငံ ကျန်းမာရေး ကဏ္ဍတွင် ပူးပေါင်းဆောင်ရွက်မည့် အစီအစဉ်များ၊ နှစ်နိုင်ငံနယ်စပ်ဒေသများတွင် ငှက်ဖျားရောဂါအပါအဝင် ကူးစက်ရောဂါကာကွယ်ထိန်းချုပ်ရေး လုပ်ငန်းများနှင့်တိုင်းရင်းဆေးပညာကဏ္ဍသစ်တွင် နှစ်နိုင်ငံဆက်လက်ပူးပေါင်းဆောင်ရွက်မည်များကိုလည်း အသေးစိတ်ဆွေးနွေးခဲ့ကြသည်။

ထို့နောက် ပြည်ထောင်စုဝန်ကြီးမှ နေပြည်တော်တွင် တရုတ်နိုင်ငံနှင့် ပူးပေါင်းအကောင်အထည် ဖော်ဆောင်ရွက်လျက်ရှိသည့် မြန်မာ ရောဂါကာကွယ် ထိန်းချုပ်ရေးဗဟိုဌာနနှင့်ကျန်းမာရေး သင်တန်းကျောင်းကို မကြာမီဖွင့်လှစ်နိုင်ရန်စီစဉ်လျက်ရှိပြီး နောင်ဖြစ်ပေါ်လာမည့် ကပ်ရောဂါအသစ်များနှင့် ပြည်သူ့ကျန်းမာရေး အရေးပေါ်အခြေအနေများကို ပိုမိုထိရောက်စွာ ကာကွယ်ထိန်းချုပ်သွားနိုင်မည်ဟု ဆွေးနွေးပြောကြားသည်။

ထို့ပြင် ကျန်းမာရေးဝန်ကြီးဌာန အနေဖြင့် တရုတ်နိုင်ငံ၊ ကျန်စုပြည်နယ် ရောဂါကာကွယ်ထိန်းချုပ်ရေးဌာနသို့ ကျန်းမာရေးဝန်ကြီးဌာနမှ ဆရာဝန်များနှင့် ကျွမ်းကျင်ပညာရှင်များစေလွှတ်၍ သင်တန်းပေးနိုင်ရေးနှင့် နှစ်နိုင်ငံ ကျန်းမာရေးပညာရှင်များ အပြန်အလှန်စေလွှတ်ရန် လိုအပ်သည်များကို စီစဉ်ဆောင်ရွက်လျက်ရှိကြောင်းလည်း ပြောကြားခဲ့သည်။

ထို့နောက် ပြည်ထောင်စုဝန်ကြီးသည် ကျန်စုပြည်နယ် ရောဂါကာကွယ်ထိန်းချုပ်ရေးဗဟိုဌာနရှိ ဇီဝလုံခြုံမှုအဆင့်(၃)ရှိ ဗိုင်းရပ်စ်ရောဂါပိုးများ စစ်ဆေးသည့်ဓာတ်ခွဲခန်း၊အစားအသောက်နှင့် ရောဂါပိုးမွှားများ စစ်ဆေးသည့် ဓာတ်ခွဲခန်းများ၊ လုပ်ငန်းခွင်ကျန်းမာရေးနှင့် ပတ်ဝန်းကျင်သန့်ရှင်းရေးဆိုင်ရာစစ်ဆေးသည့် ဓာတ်ခွဲခန်းများကို လေ့လာကြည့်ရှုခဲ့သည်။


LEAVE A REPLY

Please enter your comment!
Please enter your name here