မြဝတီနယ်စပ်မှ တင်ပို့၊ တင်သွင်းရန် လိုင်စင်ခွင့်ပြုထုတ်ပေးပြီးသော ကုန်ပစ္စည်းများ အားလုံးကို မြန်မာ-ထိုင်း နယ်စပ်ရှိ အခြားကုန်သွယ်ရေးစခန်းများမှ ပြောင်းလဲဆောင်ရွက်ရန် ခွင့်ပြုထားပြီးဖြစ်ပြီး လုပ်ငန်းဆောင်ရွက်မှုများ စနစ်တကျရှိစေရန် သက်ဆိုင်ရာဌာနအနေဖြင့် လုပ်ငန်းစဉ်များ (SOPs) ရေးဆွဲပြီးဖြစ်ကာ အဆိုပါလုပ်ငန်းစဉ်များအတိုင်း ဆောင်ရွက်ခွင့်ပြုသွားမည်ဖြစ်ကြောင်း သိရသည်။
မြဝတီနယ်စပ်ဂိတ်မှ ဆောင်ရွက်ရန် လိုင်စင်ထုတ်ပေးပြီးဖြစ်သည့် ပို့ကုန် သွင်းကုန် လုပ်ငန်းများအတွက် ထိုင်း – မြန်မာ နယ်စပ်ရှိ အခြားကုန်သွယ်ရေးစခန်းများအပါအဝင် ပယ်လယ်ရေကြောင်းမှတဆင့် ပြောင်းလဲခွင့်ပြုထားပြီး ယင်းတွင် CMP လုပ်ငန်းများလည်း အကျုံးဝင်ကြောင်း စီးပွားရေးနှင့်ကူးသန်းရောင်းဝယ်ရေးဝန်ကြီးဌာန၊ ကုန်သွယ်ရေးဦးစီးဌာနမှ အသိပေးထုတ်ပြန်ထားသည်။
ပြီးခဲ့သည့် ဩဂုတ်လ ၇ ရက်မှစတင်၍ မိုးသည်းထန်စွာ ရွာသွန်းခြင်းကြောင့် မြန်မာ-ထိုင်း ကုန်သွယ်မှုလမ်းကြောင်းရှိ မြဝတီလမ်းပိုင်းအချို့ ပျက်စီးမှုများ ဖြစ်ပေါ်ခဲ့ခြင်းဖြစ်သည်။
ယင်းလမ်းပိုင်း ပြင်ဆင်ဆောင်ရွက်လျက်နေစဉ်အတွင်း ကုန်သွယ်မှုလုပ်ငန်းများ နှောင့်နှေးကြန့်ကြာမှုမရှိစေရန်အတွက် မြဝတီ နယ်စပ်မှ တင်ပို့တင်သွင်းရန် (ဩဂုတ်လ ၉ ရက်နေ့အထိ) လိုင်စင်ရရှိထားသည့် ပို့ကုန်၊ သွင်းကုန် လုပ်ငန်းရှင်များသည် လိုင်စင်ရ ကုန်ပစ္စည်းများအား မြန်မာ -ထိုင်း နယ်စပ်ရှိ မည်သည့်ကုန်သွယ်ရေးစခန်းမှမဆို ပြောင်းလဲတင်ပို့၊ တင်သွင်းခွင့်ပြုသွားမည်ဖြစ်ပြီး၊ ပင်လယ်ရေကြောင်းမှ ပြောင်းလဲ တင်ပို့၊ တင်သွင်းလိုပါကလည်း ကိစ္စရပ်တစ်ခုချင်းအလိုက် စိစစ်ခွင့်ပြုပေးသွားမည်ဖြစ်ကြောင်း ကုန်သွယ်ရေးဦးစီးဌာနမှ ဩဂုတ်လ (၉) ရက် တွင် အသိပေးကြေညာထားပြီးဖြစ်သည်။
” ကုန်းလမ်းကြောင်းကနေမဟုတ်ဘဲ ပင်လယ်ရေကြောင်းကနေတဆင့်တင်ပို့ဖို့အတွက် နေပြည်တော်ကို စာတင်ထားတယ်။ ပြန်ကျမလာသေးဘူး။ လိုင်စင်အဟောင်းကိုအပ်ပြီး လိုင်စင်အသစ်ပြန်လျှောက်ရမှာ။ ပို့ကုန်လိုင်စင်အတွက်ကတင်ထားတုန်း”ဟု ပြောင်းလုပ်ငန်းရှင်တစ်ဦးဖြစ်သူ မဇင်မီက ပေါ်ပြူလာနယူးစ်သို့ပြောသည်။
မြဝတီနယ်စပ်မှ တင်ပို့၊တင်သွင်းရန် လိုင်စင်ခွင့်ပြုထုတ်ပေးပြီးသော ကုန်ပစ္စည်းများအား ပင်လယ်ရေကြောင်းနှင့် မြန်မာ – ထိုင်း နယ်စပ်ရှိ အခြားကုန်သွယ်ရေး စခန်းတို့မှ ပြောင်းလဲခွင့်ပြုသွားမည်ဟု အသိပေးထုတ်ပြန်ထာပြီး မြဝတီနယ်စပ် ကုန်သွယ်ရေးစခန်းမှ ပို့ကုန်သွင်းကုန်လုပ်ငန်းစဉ်များ လက်ရှိအချိန်ထိ နှေးကွေးနေဆဲဖြစ်ကြောင်း သိရသည်။
photo – Sett Paing Aung
