ဝိသမ လောဘသမားများ၏ ငွေကြေးကစားမှုနှင့် နိုင်ငံရေးအမြတ်ထုတ်မှုများကြောင့် ကုန်ဈေးနှုန်းများကြီးမြင့်နေကြောင်း နစက ဥက္ကဋ္ဌ ပြော

ပြည်တွင်း၌ ရွှေဈေး၊ ဒေါ်လာဈေး ၊ စက်သုံးဆီဈေး၊ စားသုံးဆီဈေး ၊ သားငါးဈေး၊ သွင်းအားစုဈေးများအပါအဝင် အခြေခံကုန်ဈေးနှုန်းများ မြင့်တက်နေခြင်းမှာ ဝိသမလောဘသားများ၏ ငွေကြေးကစားမှုနှင့် နိုင်ငံရေး အမြတ်ထုတ်မှုများကြောင့်ဖြစ်ကြောင်း နစက ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောကြားသည်။

ယမန်နေ့က ပြုလုပ်သည့် အခြေခံစားသုံးကုန်ပစ္စည်းများ တိုးမြှင့်ထုတ်လုပ်ရေး အစည်းအဝေး၌ အမှာစကား ပြောကြားစဉ် ထည့်သွင်း ပြောကြားခဲ့ခြင်း ဖြစ်သည်။

” ဝိသမ လောဘသမားများရဲ့ ငွေကြေးကစားမှုများနဲ့ နိုင်ငံရေးအရ အမြတ်ထုတ်လိုမှုများကြောင့် ကုန်ဈေးနှုန်းများမှာ ဖြစ်သင့်ဖြစ်ထိုက်တဲ့ ဈေးနှုန်းထက် ဈေးနှုန်းမြင့်မားနေတယ်လို့ ယူဆရပါတယ်” ဟု ဗိုလ်ချုပ်မှူးကြီး မင်းအောင်လှိုင်က ပြောသည်။

ထို့အပြင် ထုတ်လုပ်မှု ကုန်ကျစရိတ်မြင့်မားနေခြင်းနှင့် ဝယ်လိုအား ရောင်းလိုအား မညီမျှမှုသည်လည်း ကုန်ဈေးနှုန်း ကြီးမြင့်ခြင်း၏ အကြောင်းအရင်းတစ်ခုအနေဖြင့် ရှိနေကြောင်း ၎င်းကဆိုသည်။

ပြီးခဲ့သည့် ၂၀၂၂ ခုနှစ်အတွင်းက ဖြစ်ပေါ်ခဲ့သည့် ဒေါ်လာဈေး မတည်ငြိမ်မှု ဂယက်ကြောင့် ပြည်တွင်း၌ အခြေခံစားသောက်ကုန်ဈေးနှုန်းများ တဟုန်ထိုးမြင့်တက်ခဲ့ရာမှ လက်ရှိအချိန်ထိ ပြန်လည်ကျဆင်းခြင်း မရှိသေးဘဲ အမြင့်ပိုင်းတွင်သာ ရှိနေဆဲဖြစ်သည်။

ယင်းကဲ့သို့ ဆန်ဈေးနှုန်း၊ စားသုံးဆီဈေးနှုန်း အပါအဝင် သားငါး ဈေးနှုန်းများပါ မြင့်တက်နေမှုသည် အခြေခံပြည်သူလူထုအတွက် စားဝတ်နေရေးအတွက် အခက်အခဲ ဖြစ်ပေါ်စေပြီး ဝေဖန်မှုများလည်း ရှိနေသည်။

အဆိုပါ အခက်အခဲများအား ဖြေရှင်းနိုင်ရန်အတွက် တိုင်းဒေသကြီးနှင့် ပြည်နယ်အလိုက် စိုက်ပျိုးရေးနှင့် မွေးမြူရေးလုပ်ငန်းများ တိုးမြင့်လုပ်ဆောင်ပြီး စားရေးလိုအပ်ချက်ကို လုံလောက်စွာ ထုတ်လုပ်ကာ ဝယ်လိုအားနှင့် ရောင်းလိုအား မျှတစေရေး ဦးစားပေးလုပ်ဆောင်ကြရန် တိုင်းနှင့် ပြည်နယ်ဝန်ကြီးချုပ်များအား မှာကြားခဲ့ကြောင်းလည်း သိရသည်။

ထို့အပြင် နိုင်ငံအတွင်း ကုန်ဈေးနှုန်းကြီးမြင့်မှုမှ လျှော့ချနိုင်ရန် ဆောင်ရွက်ရာတွင် ရှိသင့်ရှိထိုက်သည့် ဈေးနှုန်းများ ဖြစ်ပေါ်စေရန်အတွက် ကုန်ထုတ်လုပ်မှု စွမ်းအားများ မြင့်မားလာရန်လည်း လိုအပ်ကြောင်း နစက ဥက္ကဋ္ဌက ပြောကြားသွားသည်။