RCSS/SSA က စီးပွားရေးအခွင့်အရေးများကြောင့် NCA လက်မှတ်ရေးထိုးခဲ့ခြင်းဖြစ်သည်ဟု ၁၀၀၉ တပ်ရင်း(အင်းလေးပြည်သူ့ကာကွယ်ရေးတပ်ဖွဲ့-IPDF)က မတ် ၃၁ ရက်တွင် ထုတ်ပြန်ခဲ့သည့် ပြည်သူပန်ကြားချက်နှင့်ပတ်သက်၍ သျှမ်းပြည်ပြန်လည်ထူထောင်ရေးကောင်စီ/သျှမ်းပြည်တပ်မတော် (RCSS/SSA)မှ ပြန်လည်ထုတ်ပြန်ခဲ့ခြင်းဖြစ်သည်။
၁၀၀၉ တပ်ရင်း(အင်းလေးပြည်သူ့ကာကွယ်ရေးတပ်ဖွဲ့-IPDF)၏ ထုတ်ပြန်ချက်တွင်ရေးသားထားသည့် စီးပွားရေးအပေးအယူလုပ်၍ တပ်မတော်က RCSS/SSA တပ်ဖွဲ့ကို တိုက်ပွဲအတွင်းဆွဲသွင်းလာသည်ဆိုသောသတင်းမှာ ကောလဟာလသတင်းသာဖြစ်သည်ဟု ထုတ်ပြန်ချက်၌ရေးသားထားသည်။
RCSS/SSA သည် သျှမ်းပြည်တောင်ပိုင်းတွင်ဖြစ်ပွားသည့် PDF နှင့်တပ်မတော်တိုက်ပွဲများအား ပါဝင်ရှုပ်ထွေးရန် ရည်ရွယ်ချက်မရှိသည့်အပြင် ဒေသခံပြည်သူများကို ရိုက်နှက်ခြင်း၊သတ်ဖြတ်ခြင်းလုပ်ရပ်များကိုလည်း RCSS/SSA မှ ကန့်ကွက်ရှုံ့ချသည်ဟု ထုတ်ပြန်ရေးသားထားသည်။
RCSS/SSA အနေဖြင့် NCA အပေါ် ရပ်တည်မှုဖြင့် နိုင်ငံရေးဆွေးနွေးမှုများဆောင်ရွက်နေခြင်းဖြစ်ကာ ကောလဟာလသတင်းများကဲ့သို့ စီးပွားရေး အခွင့်အရေးများကြောင့် NCA လက်မှတ်ရေးထိုးခြင်းမဟုတ်ဘဲ ယင်း သတင်းများသည် RCSS/SSA အပေါ် ပြည်သူများအထင်အမြင်လွှဲမှားစေမည့် လုပ်ကြံသတင်းများသာဖြစ်သည်ဟုလည်း ထုတ်ပြန်ခဲ့သည်။
NCA နိုင်ငံရေးဆွေးနွေးမှုကြောင့် ပြည်သူများနှစ်ပေါင်းများစွာကြုံတွေ့လာခဲ့သည့် တိုက်ပွဲများအားလျော့ချနိုင်ကာ တည်ငြိမ်အေးချမ်းပြီး ဖက်ဒရယ်ဒီမိုကရေစီစနစ်ဖြင့် တိုင်းပြည်တည်ထောင်နိုင်ရန်၊ပြည်သူများအတွက်ကောင်းကျိုးများရှိသည်ဟူသော ရည်ရွယ်ချက်ဖြင့် RCSS/SSA မှလက်မှတ်ရေးထိုးခြင်းဖြစ်သည်ဟုလည်း ထုတ်ပြန်ချက်၌ရေးသားထားသည်။
RCSS/SSA အနေဖြင့် နိုင်ငံရေးပြဿနာကို နိုင်ငံရေးနည်းလမ်းဖြစ်သည့် တွေ့ဆုံဆွေးနွေးခြင်းဖြင့် ဖြေရှင်းနိုင်မည်ဟု လက်စွဲယုံကြည်ထားသည့် အဖွဲ့အစည်းတစ်ခုဖြစ်သည်ဟုလည်း ထုတ်ပြန်ချက်၌ရေးသားထားသည်။