မြန်မာနိုင်ငံအစိုးရ လျှပ်စစ်စွမ်းအားဝန်ကြီးဌာနနှင့် လာအိုနိုင်ငံ၊ စွမ်းအင်နှင့် သတ္တုတွင်း ဝန်ကြီးဌာနတို့အကြား လျှပ်စစ်ကဏ္ဍ ပူးပေါင်းဆောင်ရွက်မှုဆိုင်ရာ နားလည်မှုစာချွန်လွှာ ပြင်ဆင်ချက်အား ဧပြီ (၃) ရက်က နေပြည်တော်၌ လက်မှတ်ရေးထိုးခဲ့ကြောင်း သိရသည်။
အဆိုပါ လက်မှတ်ရေးထိုးမှုတွင် မြန်မာ – လာအို နှစ်နိုင်ငံ လျှပ်စစ်ကဏ္ဍ ပူးပေါင်းဆောင်ရွက်မှုကို (၅)နှစ်တာသက်တမ်းတိုးမြှင့် လုပ်ဆောင်သွားမည်ဖြစ်ပြီး နယ်စပ်ဖြတ်ကျော်ဓာတ်အားလိုင်း စီမံကိန်း ဖြစ်မြောက်နိုင်စွမ်းလေ့လာမှုပြုလုပ်ရန် Consortium of PISASAI Energy and Mine Investment Pte. Ltd. and Primus Sapphire Pow er Company Limited သို့ ပေးအပ်မည့် Notice to Proc eed(NTP)ကိုလည်း လက်မှတ်ရေးထိုးခဲ့ကြကြောင်း သိရသည်။
မြန်မာ – လာအို နှစ်နိုင်ငံ လျှပ်စစ်ကဏ္ဍပူးပေါင်း ဆောင်ရွက်ရေးနားလည်မှု စာချွန်လွှာကို ၂၀၁၈ ခုနှစ်၊ ဇန်နဝါရီ (၁၅) ရက်က စတင်ကာ (၅)နှစ်တာစီမံကိန်းအနေဖြင့် လက်မှတ်ရေးထိုးခဲ့ခြင်း ဖြစ်သည်။
အဆိုပါ (၅)နှစ်တာကာလအတွင်း PISASAI and Mine Investment Pte. Ltd. and Primus Sapphire Power Company Limited တို့နှင့် ပူးပေါင်းဆောင်ရွက်ခဲ့ပြီး နှစ်နိုင်ငံဓာတ်အားကွန်ရက် ချိတ်ဆက်၍ လျှပ်စစ်ဓာတ်အားပို့လွှတ်/ ရောင်းချနိုင်ရေးစီမံကိန်းအတွက် သိသာထင်ရှားသည့် လုပ်ငန်းတိုးတက်မှုများ လုပ်ဆောင်နိုင်ခဲ့ကြောင်း ပို့ဆောင်ရေးနှင့်ဆက်သွယ်ရေးဝန်ကြီးဌာနမှ သိရသည်။
အဆိုပါ နားလည်မှု စာချွန်လွှာအား (၅) နှစ်သက်တမ်း ထပ်တိုးခြင်းအားဖြင့် မြန်မာနှင့် လာအို နှစ်နိုင်ငံတို့အကြား လျှပ်စစ်ဓာတ်အား (၆၀၀) မဂ္ဂါဝပ်အထိ သွယ်တန်းနိုင်ရေး လေ့လာစမ်းသပ်ခြင်း လုပ်ငန်းများ ဆောင်ရွက်နိုင်မည် ဖြစ်ကြောင်း လျှပ်စစ်ဝန်ကြီးဌာန ပြည်ထောင်စုဝန်ကြီး ဦးသောင်းဟန်က ပြောသည်။
ထို့အပြင် မဲခေါင်မြစ် ရေအားလျှပ်စစ် စီမံကိန်းများ၊ ဖွံ့ဖြိုးတိုးတက်ရေး စီမံကိန်းများနှင့် ပတ်သက်၍ နှစ်နိုင်ငံ ပူးပေါင်းဆောင်ရွက်သွားနိုင်မည်ဟုလည်း ပြည်ထောင်စုဝန်ကြီးက ပြောသည်။
မြန်မာ – လာအို နှစ်နိုင်ငံ နယ်စပ်ဖြတ်ကျော် သွယ်တန်းမည့် ဓာတ်အားလိုင်း စီမံကိန်းသည် ၂၀၂၄ ခုနှစ်တွင် ကျိုင်းတုံမြို့အထိနှင့် ၂၀၂၆ ခုနှစ်တွင် မိတ္ထီလာမြို့အထိ ရောက်ရှိနိုင်မည်ဖြစ်၍ မြန်မာနိုင်ငံ၏ လျှပ်စစ်ဓာတ်အား တိုးတက်ရရှိရေးအတွက် အထောက်အကူပြုမည်ဟုလည်း သိရသည်။
