ထို့ကော်ကိုး လမ်းပိုင်းအား အသုံးပြုသည့် ကုန်တင်ယာဉ်နှင့် ခရီးသည်တင်ယာဉ်များအား လမ်းကြေး ကောက်ခံနေသည်ဆိုသည်မှာ မှန်ကန်သော်လည်း နှစ်ဦးနှစ်ဘက်သင့်တင့်မျှတသည့် နှုန်းထားသာ ကောက်ခံခြင်းဖြစ်ကြောင်း KNU/KNLA-PC ပြောခွင့်ရ ဗိုလ်မှူးကြီးစောကျော်ညွန့်က ပြောသည်။
ပြီးခဲ့သည့် ရက်ပိုင်းအတွင်းက KNLA ပူးပေါင်းတပ်ဖွဲ့များနှင့် မြန်မာ့တပ်မတော်တို့အကြား တိုက်ပွဲများ ဖြစ်ပွားခဲ့သည့်အတွက် မြဝတီ – ကျုံဒိုး အာရှလမ်းပိုင်းကို အသုံးပြုရန် လုံခြုံရေးအရ အခက်အခဲရှိသည့်အတွက် ထို့ကော်ကိုး လမ်းပိုင်းအား ပြောင်းလဲ အသုံးပြုနေကြရခြင်းဖြစ်သည်။
ယင်းသို့ အသုံးပြုနေရသည့် ခရီးသည်တင်ယာဉ်များနှင့် ကုန်တင်ယာဉ်များကို KNU/KNLA-PC အပါအဝင် တိုင်းရင်းသား လက်နက်ကိုင်အဖွဲ့အစည်းအချို့က လမ်းအသုံးပြုခအနေဖြင့် ငွေကြေးကောက်ခံနေခြင်း ဖြစ်သည်။
“အခြေအနေအရ မော်တော်ယာဉ်တွေ ဖြတ်သန်းသွားလာတာ များလာပြီဆိုတော့ လမ်းရဲ့ ကြံ့ခိုင်ရေးအရသော်လည်းကောင်း၊ ထိန်းသိမ်းရတဲ့ ကဏ္ဍတွေမှာ စနစ်တကျ စီမံခန့်ခွဲလို့ရအောင် ဂိတ်ကြေးရယ်လို့မဟုတ်ဘဲနဲ့ လမ်းထိန်းသိမ်းခအနေနဲ့ ကောက်ခံတာတော့ရှိပါတယ်။
ကောက်ခံတယ်ဆိုတာကလည်း ဖြစ်ကတတ်ဆန်း ကောက်ခံတာ မဟုတ်ဘဲနဲ့ (၂)လပိုင်း တစ်ရက်နေ့ကစပြီးတော့ ထို့ကော်ကိုး – ကျော်ကို့လမ်း ထိန်းသိမ်းရေးကော်မတီကို ဖွဲ့ပြီးတော့ ဂိတ်နှစ်ဂိတ်ပဲ ထားရှိပြီးတော့ အဲဒီနှစ်ဂိတ်ပဲ ကောက်ပါတယ်” ဟု ဗိုလ်မှူး ကြီးစောကျော်ညွန့်က ပြောသည်။
အဆိုပါ ထို့ကော်ကိုး လမ်းပိုင်းပေါ်တွင် ဖြတ်သန်းသွားလာနေသည့် ခရီးသည်တင်ယာဉ်များနှင့် ကုန်တင်ယာဉ်များအား လမ်းကြေးတောင်းခံနေသည့် ဂိတ်ပေါင်း (၃၀) ဝန်းကျင်အထိရှိနေပြီး လမ်းပိုင်းအစအဆုံးအထိ လမ်းကြေးအနေဖြင့် (၅၀၀၀၀) ကျပ်ဝန်းကျင်အထိ ပေးဆောင်နေရကြောင်း နယ်မြေသတင်းရင်းမြစ်များနှင့် ဖြတ်သန်းသွားလာနေသည့် ယာဉ်မောင်းများ၏ ပြောကြားအရ သိရသည်။
အဆိုပါ ကိစ္စနှင့် ပတ်သက်၍ ဗိုလ်မှူးကြီးစောကျော်ညွန့်အား မေးမြန်းကြည့်ရာတွင် ယင်းလမ်းပိုင်းပေါ်တွင် KNU/KNLA-PC အပါအဝင် အခြားသောကရင်လက်နက်ကိုင်အဖွဲ့အစည်းပါ ရောထွေးကာ ရှိနေသည့်အတွက် လမ်းပိုင်းအစအဆုံးအထိ ဂိတ်မည်မျှရှိသည်ကို အတိအကျမပြောနိုင်ကြောင်းလည်း ၄င်းက ပြောသည်။
လက်ရှိတွင် KNU/KNLA-PC အနေဖြင့် ခရီးသည်တင်ယာဉ် တစ်စီးလျင် လမ်းအသုံးပြုခအနေဖြင့် (၁၀၀၀)ကျပ် ကောက်ခံပြီး ကုန်တင်ယာဉ်များကိုလည်း ယာဉ်အရွယ်အစားနှင့် ကုန်ပစ္စည်းတင်ဆောင်လာသည့် အနေအထားပေါ်မူတည်ကာ နှစ်ဦးနှစ်ဘက် ဝန်ထုတ်ဝန်ပိုးမဖြစ်စေသည့် နှုန်းထားသတ်မှတ်ကောက်ခံလျက်ရှိကြောင်း သိရသည်။
“ စီးပွားရေးအရ သွားလာတဲ့ကားမဟုတ်ဘူး ဆိုရင်တော့ ကျွန်တော်တို့က တစ်စီးကို တစ်ထောင်ပဲ ကောက်ပါတယ်။ အဲဒါကလည်း လမ်းရဲ့ ပြုပြင်ထိန်းသိမ်းရေး လုပ်ငန်းတွေ ဆောင်ရွက်လို့ ရအောင်ဆိုပြီးတော့ ကော်မတီရဲ့ ဆုံးဖြတ်ချက်နဲ့ ကျွန်တော်တို့ လုပ်တာ ဖြစ်ပါတယ်။ စီးပွားရေးအရ သွားလာတဲ့ ကုန်ကားတွေကျတော့လည်း ကုန်သည်နဲ့ လမ်းကော်မတီရဲ့ကြား သင့်တင့်လျှောက်ပတ်တဲ့ နှုန်းထားကို ကော်မတီရဲ့ ဆုံးဖြတ်ချက်နဲ့ ကောက်ခံတာ ရှိပါတယ်။ အဲဒီလို ကောက်ခံတာကလည်း ကျွန်တော်တို့ ကော်မတီက ခွင့်ပြုထားတဲ့ ဂိတ်နှစ်ခုကိုပဲ ကောက်ခံခွင့်ပြုထားဖြစ်ပါတယ်” ဟု ဗိုလ်မှူးကြီး စောကျော်ညွန့်က ပြောသည်။
ကောက်ခံခွင့်ပြုထားသည့် ဂိတ်နှစ်ဂိတ်တွင်လည်း အတက်ဂိတ်နှင့် အဆင်းဂိတ်တစ်ဂိတ်စီသာပေးဆောင်ရခြင်းဖြစ်ပြီး နှစ်ဂိတ်စလုံးတွင် ကောက်ခံနေခြင်း မဟုတ်ကြောင်း သိရသည်။
ပြီးခဲ့သည့် မတ်လ (၂၅)ရက်က မြဝတီ ကုန်သွယ်ရေးဇုန်၊ ကော့ကရိတ် ရဲစခန်းနှင့် အနီးပတ်ဝန်းကျင် အာရှလမ်း၊ ကျုံဒိုးမြို့အနီးတဝိုက်တွင် KNLA ပူးပေါင်းတပ်များနှင့် တပ်မတော်တို့အကြား ထိတွေ့တိုက်ပွဲများ ပြင်းထန်ခဲ့ပြီး အဆိုပါ ဧရိယာအတွင်းရှိ အာရှလမ်းပိုင်းအား ဖြတ်သန်းသွားလာခြင်း မပြုရန် KNLA ပူးပေါင်းတပ်ဖွဲ့များက သတိပေးတားမြစ်ထားခြင်း ဖြစ်သည်။
ယင်းကဲ့သို့ တားမြစ်ထားသည့်အတွက် ယခင် မြဝတီ – ကော့ကရိတ် အာရှလမ်းပိုင်းအသုံးပြုသွားလာကြသည့် ခရီးသည်တင်ယာဉ်များနှင့် ကုန်တင်ယာဉ်များသည် ထို့ကော်ကိုး လမ်းပိုင်းကို ပြောင်းလဲ အသုံးပြုနေကြရခြင်း ဖြစ်သည်။
