တနင်္သာရီတိုင်း၊သရက်ချောင်းမြို့နယ်၊ညောင်ဇင်ကျေးရွာရှိ အ.ထ.က(ညောင်ဇင်)အား လက်နက် ကိုင်အဖွဲ့ဝင်များက ဖေဖော်ဝါရီ ၃ ရက်မွန်းလွဲပိုင်းက မီးရှို့ဖျက်စီးခဲ့ကြသည်ဟု နစက သတင်းထုတ်ပြန်ရေးအဖွဲ့မှ ထုတ်ပြန်ခဲ့သည်။
ယင်းနေ့မွန်းလွဲပိုင်းက သရက်ချောင်းမြို့နယ်၊ညောင်ဇင်ကျေးရွာရှိ အ.ထ.က(ညောင်ဇင်) ကျောင်းတွင် မီးလောင်မှုဖြစ်ပွားကြောင်း သတင်းအရ လုံခြုံရေးအဖွဲ့ဝင်များ၊မီးသတ်တပ်ဖွဲ့ဝင်များ၊လူမှုကူညီရေးအသင်းများနှင့်ကျေးရွာနေသူများက ဝိုင်းဝန်းငြှိမ်းသတ်ခဲ့ကြသည်။
“မီးက ၁၂ နာရီခွဲလောက်ထဲကစပြီးလောင်နေတာ အဲဒီရွာကတစ်ယောက်က ကျွန်တော်တို့အသင်းကိုဖုန်းဆက်ပြီးအကူအညီတောင်းတာနဲ့ချက်ခြင်းသွားပြီး မီးဝိုင်းငြှိမ်းခဲ့တာပါ အဲဒီကျောင်းက အ ခြေအနေအရ ပိတ်ထားတဲ့ကျောင်းပါ”ဟု သရက်ချောင်းမြို့နယ်အခြေစိုက်လူမှုကူညီရေးအသင်း ဝင်တစ်ဦးကပြောသည်။
မီးလောင်မှုအား ဝိုင်းဝန်းငြှိမ်းသတ်ခဲ့ကြသဖြင့် မွန်းလွဲ ၂ နာရီ ၅၀ မိနစ်ခန့်တွင်မီးငြိမ်းသွားခဲ့ပြီး စာသင်ဆောင် ၂ ဆောင်နှင့်ခန်းမ ၁ ဆောင်ပျက်စီးဆုံးရှုံးခဲ့ကြောင်း သိရသည်။
အ.ထ.က(ညောင်ဇင်)သည် ယာယီပိတ်ထားသည့်ကျောင်းဖြစ်ကာ ညောင်ဇင်ကျေးရွာမှ ကျောင်း သား၊ကျောင်းသူများသည် ထားဝယ်မြို့ရှိ စာသင် ကျောင်းများနှင့်ညောင်ဇင်ကျေးရွာရှိ ဘုန်းတော်ကြီးကျောင်းတွင် သင်ကြားနေကြကြောင်း သိရသည်။
ဖြစ်စဥ်မှ စာသင်ကျောင်းအား မီးရှို့ဖျက်ဆီးခဲ့ကြသူများအား ဖမ်းဆီးရမိရေးနှင့်ဥပဒေအရထိရောက်စွာအရေးယူနိုင်ရေးတို့အတွက် လုံခြုံရေးအဖွဲ့ဝင်များက စုံစမ်းစစ်ဆေးမှုများပြုလုပ်လျက်ရှိကြောင်း သိရသည်။