ကိုရီးယားသမ္မတနိုင်ငံ၊ ဆိုးလ်မြို့၌ မေ ၂၄ ရက်တွင် ကျင်းပမည့် “50 Years of Gratitude & Friendship, 100 Years of Mercy” အခမ်းအနားသို့ တက်ရောက်ရန် နိုင်ငံတော်သံဃမဟာနာယကအဖွဲ့ ဥက္ကဋ္ဌ သန်လျင်မင်းကျောင်းဆရာတော်ကြီးသည် မေ ၂၂ ရက် နံနက်ပိုင်းတွင် အင်ချွန်းအပြည်ပြည်ဆိုင်ရာလေဆိပ်သို့ ကြွရောက်တော်မူခဲ့ကြောင်း သိရသည်။
Korean Wave Culture Industry Forum (KWCIF) ၏ စီစဉ်ပင့်ဖိတ်မှုဖြင့် ကြွရောက်တော်မူလာသည့် ဆရာတော်ကြီးနှင့် သံဃာတော်များအား ကိုရီးယားနိုင်ငံဆိုင်ရာ မြန်မာသံရုံးမှ သံရုံးယာယီတာဝန်ခံ/သံအမတ်ကြီး ဦးမျိုးမြင့်မောင်၊ စစ်သံ(ကြည်း၊ ရေ၊ လေ)ရုံးမှ စစ်သံမှူး ဗိုလ်မှူးချုပ် ဝင့်သူနှင့် သံရုံးဝန်ထမ်းများက ကြိုဆိုခဲ့ကြကြောင်း သိရသည်။
ခရီးစဉ်အတွင်း သန်လျင်မင်းကျောင်းဆရာတော်ကြီးသည် ဆိုးလ်မြို့ရှိ Jogyesa Temple ကျောင်းတိုက်မှ ကျောင်းထိုင်ဆရာတော်နှင့် တွေ့ဆုံခြင်း၊ Jogye Order of Korean Buddhism ၏ (၃၇) ယောက်မြောက် ဥက္ကဋ္ဌ၊ Dongguk University ဥက္ကဋ္ဌတို့နှင့် တွေ့ဆုံခြင်းများ ပြုလုပ်တော်မူခဲ့ကြောင်း သိရသည်။
ထို့ပြင် ကိုရီးယားနိုင်ငံတွင် ပညာသင်ကြားနေသော မြန်မာကျောင်းသား ၃၀၀ ကျော်အား တွေ့ဆုံအားပေးခြင်းနှင့် Buddhist Broadcasting System (BBS) ၏ တိုက်ရိုက်ထုတ်လွှင့်မှုအစီအစဉ်တွင် ပါဝင်တော်မူခဲ့ကြောင်းလည်း သိရသည်။
ယင်းအပြင် UNESCO ကမ္ဘာ့အမွေအနှစ်စာရင်းဝင် Bulguksa Temple ၌ Venerable Jongcheon နှင့် တွေ့ဆုံခြင်း၊ Tongdosa Temple ၌ Venerable Hyeon-deok နှင့် တွေ့ဆုံခြင်းများကိုလည်း ပြုလုပ်တော်မူခဲ့ကြောင်း သိရသည်။