ပြန်ကြားရေးနှင့် ပြည်သူ့ဆက်ဆံရေးဦးစီးဌာန ၂၀၂၅ ခုနှစ်အတွက် ရုပ်ရှင်မျိုးဆက်သစ်လူငယ်များ ပြုစုပျိုးထောင်ရေးစီမံကိန်း (FLY Project 2025) အတွက်လျှောက်လွှာခေါ်ယူထားကြောင်း သိရသည်။
အာဆီယံနိုင်ငံများနှင့်Asian Film Commission Network (AFCNet) အဖွဲ့ဝင်နိုင်ငံများမှ ၂၀၂၅ ခုနှစ်အတွက် ရုပ်ရှင်မျိုးဆက်သစ် လူငယ်များ ပြုစုပျိုးထောင်ရေးစီမံကိန်း (ASEAN-ROK Film Leader Incubator; FLY Project 2025) ကို ကိုရီးယားသမ္မတနိုင်ငံ၊ ဘူဆန်မြို့တွင် ၂၀၂၅ ခုနှစ် ၊ စက်တင်ဘာ (၄) ရက်မှ ၂၀၂၅ ခုနှစ် ၊ စက်တင်ဘာလ (၁၉) ရက်အထိ ဇာတ်လမ်းတို၊ မှတ်တမ်းရုပ်ရှင်ရိုက်ကူးခြင်းသင်တန်း၊ အလုပ်ရုံဆွေးနွေးပွဲများကို ကျင်းပပြုလုပ်မည်ဖြစ်ရာ မြန်မာနိုင်ငံမှ (၂)ဦး ရွေးချယ်စေလွှတ်သွားမည် ဖြစ်သည်။
အဆိုပါ FLY Project 2025 သို့ တက်ရောက်ရန် လျှောက်ထားလိုသူများသည် ပြည်ထောင်စုသမ္မတမြန်မာနိုင်ငံသားဖြစ်ရမည်၊ ၂၀၀၁ ခုနှစ်မှ၂၀၀၆ ခုနှစ်အတွင်း မွေးဖွားသူဖြစ်ရမည်၊ အနည်းဆုံး ဇာတ်လမ်းတို သို့မဟုတ် မှတ်တမ်း ဇာတ်လမ်း သို့မဟုတ် ဗီဒီယိုဇာတ်ကား (၂) ကား ရိုက်ကူးဖူးသူ ဖြစ်ရမည်၊ အင်္ဂလိပ်ဘာသာစကားကို ကျွမ်းကျင်စွာ ပြောဆိုနိုင်သူ ဖြစ်ရမည်၊ နိုင်ငံခြားခရီးသွားလာမှုအတွက် ပိတ်ပင်ခြင်းခံထားရသူ မဖြစ်စေရ၊ ဘူဆန်နိုင်ငံတကာရုပ်ရှင်ပွဲတော်နှင့် Asian Film Academy (BAFA) တို့တွင် ပြုလုပ်သည့် အစီအစဉ် တစ်ခုခု၌ ပါဝင်ဖူးသူ မဖြစ်စေရဟူ၍ သတ်မှတ်ထားသည်။
ထို့ပြင် လျှောက်လွှာတွင်ပါရှိရမည့်အချက်များမှာသတ်မှတ်ထားသည့်လျှောက်လွှာပုံစံများတွင် ပြည့်စုံစွာဖြည့်စွက်ခြ င်း၊လျှောက်ထားသူ၏ စိတ်ပါဝင်စားမှု၊ ကိုယ်ရေးအကျဉ်း၊ အနာဂတ်အစီအစဉ်များ ရေးသားဖော်ပြထားသည့် မိတ်ဆက်စကား ပါရှိရမည်ဖြစ်သည်။
အဆိုပါ လျှောက်လွှာများကို ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ရုပ်ရှင်မြင့်တင်ရေးဌာနခွဲ၊ အမှတ်(၂၈) ကုက္ကိုင်းရိပ်သာလမ်း၊ ဗဟန်းမြို့နယ်၊ ရန်ကုန်တိုင်းဒေသကြီးတွင် ရယူလျှောက်ထားနိုင်ပြီး လျှောက်ထားသူများအနေဖြင့် လျှောက်လွှာများကို ပြည့်စုံစွာ ဖြည့်စွက်ပြီး လိုအပ်သည့် အချက်အလက်(၆)စုံ၊ ရိုက်ကူးထားသည့် Project Video File (၂)ခုနှင့်အတူ ပြန်ကြားရေးနှင့်ပြည်သူ့ဆက်ဆံရေးဦးစီးဌာန၊ ရုပ်ရှင်မြင့်တင်ရေးဌာနခွဲသို့ ၂ဝ၂၅ ခုနှစ် ၊ ဧပြီလ (၄) ရက်၊ (သောကြာနေ့) ရုံးချိန်အတွင်း အရောက်ပေးပို့ရမည်ဖြစ်ပြီး သတ်မှတ်အရည်အချင်း လူတွေ့ဖြေဆိုရမည်ဖြစ်သည်။
အသေးစိတ်သိလိုပါက ပြန်ကြားရေးနှင့် ပြည်သူ့ဆက်ဆံရေးဦးစီး ဌာန၊ ရုပ်ရှင်မြင့်တင်ရေး ဌာနခွဲ(ရန်ကုန်)၊ နိုင်ငံတကာဌာနစု တယ်လီဖုန်းအမှတ် ၀၁-၇၅၃၇၉၃၈ သို့ ဆက်သွယ်မေးမြန်းနိုင်ကြောင်း သိရသည်။