၂၀၂၄ ခုနှစ် လူဦးရေနှင့် အိမ်အကြောင်းအရာ သန်းခေါင် စာရင်းအရ မြန်မာနိုင်ငံ၏ ခန့်မှန်းလူဦးရေ (၅၁) သန်းကျော် အနက် အသက် (၆၀) နှင့်အထက် ဦးရေသည် (၆ ဒသမ ၁) သန်းကျော်ရှိသည့်အတွက် စုစုပေါင်းလူဦးရေ၏ (၁၂) ရာ ခိုင်နှုန်းခန့်ရှိကြောင်း သိရသည်။
လာမည့် ၂၀၅၀ ပြည့်နှစ်တွင် အသက် (၆၀) နှစ်နှင့်အထက် သက်ကြီးပုဂ္ဂိုလ်ဦးရေသည် (၁၃)သန်းခန့်အထိရှိလာပြီး နိုင် ငံလူဦးရေ၏ ၂၀ ရာခိုင်နှုန်းထိ တိုးပွားလာမည်ဟု ခန့်မှန်းထားကြောင်း လူမှုဝန်ထမ်း၊ ကယ်ဆယ်ရေးနှင့် ပြန်လည်နေ ရာချထားရေးဝန်ကြီးဌာန ပြည်ထောင်စုဝန်ကြီး ဒေါက်တာ စိုးဝင်း က ပြောသည်။
ယမန်နေ့ကကျင်းပသည့် အပြည်ပြည်ဆိုင်ရာ သက်ကြီးပုဂ္ဂိုလ်များနေ့ အခမ်းအနားတွင် ပြည်ထောင်စုဝန်ကြီး ကအထက်ပါအတိုင်း ပြောကြားခဲ့ခြင်းဖြစ်သည်။
မြန်မာနိုင်ငံ၏ ကလေးမွေးဖွားမှုနှုန်းသည်လည်း ၂၀၁၄ ခုနှစ်တွင် (၂ ဒသမ ၅) ရာခိုင် နှုန်းရှိရာမှ ၂၀၂၃ ခုနှစ်တွင် (၂ ဒသမ ၁)ရာခိုင်နှုန်းဖြစ်သည့်အတွက် ဆက်လက်ကျဆင်းနေကြောင်း၊ ၂၀၁၉ ခုနှစ် ကြားဖြတ် သန်းခေါင်စာရင်းတွင် (၅) နှစ် အောက် ကလေးသေဆုံးမှုနှုန်းသည် (၄) ရာခိုင်နှုန်း နီးပါးဖြစ်ပြီး ၂၀၂၄ ခုနှစ်တွင် (၃) ရာခိုင်နှုန်းအထိ ကျဆင်းခဲ့သော်လည်း မွေးဖွားနှုန်းနှင့် နှိင်းယှဉ်လျှင် သေဆုံးမှုနှုန်းက ပိုများနေသည်ကို တွေ့ရကြောင်းလည်း ပြည်ထောင်စုဝန်ကြီး ဒေါက်တာစိုးဝင်း က ပြောကြားခဲ့သည်။
လက်ရှိ ဘိုးဘွားရိပ်သာများအား အဆင့်အလိုက် ငွေကြေးထောက်ပံ့ခြင်းနှင့် သက်ကြီးရွယ်အို ပြုစုစောင့်ရှောက်သည့် နည်းပညာများ ပံ့ပိုးပေးခြင်းနှင့် တစ်နိုင်ငံလုံးတွင် လူမှုရေး ပင်စင်အစီအစဉ်များကို ဆောင်ရွက်ပေးလျက်ရှိပါကြောင်း သိရသည်။
၂၀၂၅-၂၀၂၆ ဘဏ္ဍာနှစ်အတွက် အသက် (၈၅) နှစ်နှင့်အ ထက် လူမှုရေးပင်စင် (၆)လစာကို သက်ကြီးပုဂ္ဂိုလ် (၁၂၁၆ ၂၂) ဦးကို ထောက်ပံ့ငွေ စုစုပေါင်း ငွေကျပ် (၇ ဒသမ ၂၁၇) ဘီလီယံကျော်အား သက်ဆိုင်ရာ မြန်မာ့စီးပွားရေးဘဏ်ခွဲများမှတဆင့် ထောက်ပံ့ပေးထားကြောင်း သိရသည်။
အပြည်ပြည်ဆိုင်ရာ သက်ကြီးပုဂ္ဂိုလ်များနေ့ကို ဂုဏ်ပြုသောအားဖြင့် မြန်မာတစ်နိုင်ငံလုံးမှ အသက်အကြီးဆုံး အဘိုးတစ်ဦးနှင့် အဘွားတစ်ဦးကို ဂုဏ်ပြုချီးမြှင့်ငွေကျပ် ၁၀ သိန်းစီကို ဂုဏ်ပြုသွားမည် ဖြစ်ကြောင်းလည်း သိရသည်။