ဩဂုတ်လ ၁၂ ရက်နေ့ (အင်္ဂါနေ့)က မွန်ဘိုင်း၌ ကျင်းပခဲ့သော ၁၈ ကြိမ်မြောက် နိုင်ငံတကာ နက္ခတ္တဗေဒနှင့် နက္ခတ္တဗေဒရူပဗေဒ အိုလံပစ်ပြိုင်ပွဲ (IOAA) ဖွင့်ပွဲအခမ်းအနားတွင် အိန္ဒိယနိုင်ငံသည် နည်းပညာကို ဦးစားပေးအဖြစ် သတ်မှတ်ထားကြောင်း အိန္ဒိယအစိုးရ၏ အဓိကသိပ္ပံဆိုင်ရာ အကြံပေးပုဂ္ဂိုလ်ဖြစ်သူ အာဂျေးကူးမားဆွဒ်(Ajay Kumar Sood)က ပြောကြားခဲ့သည်။
“ပြိုင်ပွဲဝင်တွေဟာ အိုင်ဒီယာအသစ်တွေ၊ စိတ်ကူးစိတ်သန်းတွေနဲ့ ကြွယ်ဝတဲ့ အတွေးအမြင်တွေနဲ့ သူတို့နိုင်ငံကို ပြန်သွားသင့်ပါတယ်” ဟု ပါမောက္ခ ဆွဒ်က အိုလံပစ်ပြိုင်ပွဲကို “သိပ္ပံအားကစား” အဖြစ် ရည်ညွှန်းပြောကြားခဲ့သည်။
Tata Institute of Fundamental Research ရှိ Homi Bhabha သိပ္ပံပညာရေးဌာနက အိမ်ရှင်အဖြစ် လက်ခံကျင်းပသည့် ၁၀ ရက်ကြာ အိုလံပစ်ပြိုင်ပွဲတွင် နိုင်ငံပေါင်း ၆၄ နိုင်ငံမှ အထက်တန်းကျောင်းသား ၃၀၀ ကျော် ပါဝင်ယှဥ်ပြိုင်ခဲ့ကြသည်။
နက္ခတ္တဗေဒသည် စကြဝဠာကို လေ့လာခြင်းသက်သက်သာမက၊ အလွန်တိကျသော တွက်ချက်မှုဆိုင်ရာ ကိရိယာများ၊ ဉာဏ်ရည်တု (AI)၊ စက်သင်ယူမှုနှင့် အခြားအရာများ ပါဝင်သည့် စနစ်တစ်ခုဖြစ်ပြီး အနာဂတ်တွင် လိုက်စားရန် နည်းလမ်းများစွာကို ပေးစွမ်းနိုင်သည်ဟု ပါမောက္ခ ဆွဒ်က သူ၏ အဖွင့်အမှာစကားတွင် ပြောကြားခဲ့သည်။
အိန္ဒိယနိုင်ငံသည် ယခု နိုင်ငံတကာ နက္ခတ္တဗေဒနှင့် နက္ခတ္တဗေဒရူပဗေဒ အိုလံပစ်ပြိုင်ပွဲ (IOAA)ကို ၂၀၁၆ ခုနှစ်က ဘူဘန်နက်ဆာ၌ ကျင်းပခဲ့ပြီးနောက် ယခုအကြိမ်သည် ဒုတိယအကြိမ် လက်ခံကျင်းပခြင်းဖြစ်သည်။ ယခုနှစ်၏ ဆောင်ပုဒ်မှာ “ကမ္ဘာသည် တစ်ခုတည်းသော ကောင်းကင်အောက်ရှိ မိသားစုတစ်ခုဖြစ်သည်” ဟူသော ရှေးဟောင်းအိန္ဒိယအယူအဆဖြစ်သည်။
အနာဂတ်သည် လူငယ်များ၏ လက်ထဲတွင် ရှိနေပြီး လက်တွေ့ပြဿနာများကို ဖြေရှင်းနိုင်ကြောင်းနှင့် အိန္ဒိယသည် နိုင်ငံတကာ ပူးပေါင်းဆောင်ရွက်မှုကို ယုံကြည်ကြောင်း ဝန်ကြီးချုပ် နရင်ဒြာမိုဒီက ပြိုင်ပွဲဝင်များထံပေးပို့သော ဗီဒီယိုမက်ဆေ့ချ်တွင် ပြောကြားခဲ့သည်။ “နောက်ထပ် သိပ္ပံနည်းကျ တိုးတက်မှုက ဒီလူငယ်လေးတွေရဲ့ လက်ထဲမှာ ဖြစ်နိုင်ပါတယ်၊ ဘယ်သူသိနိုင်မလဲ” ဟု မိုဒီက အိန္ဒိယ၏ သိပ္ပံနယ်ပယ်တွင် အောင်မြင်မှုများကို မီးမောင်းထိုးပြကာ ပြောကြားခဲ့သည်။
၁၀ တန်းမှ ၁၂ တန်းအထိ ကျောင်းသားများကို အိုလံပစ်ပြိုင်ပွဲ၏ နိုင်ငံတကာအဆင့်တွင် ယှဉ်ပြိုင်ရန်အတွက် အသေးစိပ် ရွေးချယ်ခဲ့သည်။ ၁၀ ရက်ကြာ အစီအစဉ်အတွင်း ကျောင်းသားများသည် စိန်ခေါ်မှုများစွာရှိသော စာမေးပွဲများကို ဖြေဆိုရမည်ဖြစ်သည်။
ဖွင့်ပွဲအခမ်းအနားတွင် International Astronomical Union ၏ ယခင်ဒုတိယဥက္ကဋ္ဌဖြစ်သူ အာဂျစ်ကမ်ဗာဝီ(Ajit Kembhavi) အပါအဝင် ဂုဏ်သရေရှိပုဂ္ဂိုလ်များ တက်ရောက်ခဲ့သည်။ “ဘဝမှာ ကြီးကျယ်တဲ့အရာတွေကို လုပ်ဆောင်ဖို့ စိတ်ကူးစိတ်သန်းတွေ ရလာတဲ့အတွက် ဒီနေရာမှာ မင်းတို့ရဲ့ ပရော်ဖက်ရှင်နယ် ခရီးစဉ်တစ်ခုလုံး ပုံဖော်လာနိုင်ပါတယ်” ဟု မစ္စတာကမ်ဘာဝီက အလေးထားပြောကြားခဲ့သည်။
နိုင်ငံတကာ နက္ခတ္တဗေဒနှင့် နက္ခတ္တဗေဒရူပဗေဒ အိုလံပစ်ပြိုင်ပွဲ (IOAA) ကို အထက်တန်းကျောင်းသားများအကြား နက္ခတ္တဗေဒဆိုင်ရာ ကမ္ဘာလုံးဆိုင်ရာ စိတ်ဝင်စားမှု တိုးပွားလာမှုကို ဖြည့်ဆည်းရန်အတွက် ၂၀၀၆ ခုနှစ်တွင် စတင်ခဲ့ပြီး ပထမအကြိမ်ကို ၂၀၀၇ ခုနှစ်တွင် ထိုင်းနိုင်ငံ ချင်းမိုင်မြို့၌ ကျင်းပခဲ့သည်။
Homi Bhabha သိပ္ပံပညာရေးဌာန၏ အဆိုအရ နိုင်ငံတကာ နက္ခတ္တဗေဒနှင့် နက္ခတ္တဗေဒရူပဗေဒ အိုလံပစ်ပြိုင်ပွဲ (IOAA)၏ သင်ရိုးညွှန်းတမ်းသည် ကျောင်းသားများကို သီအိုရီ၊ လေ့လာမှုနှင့် အချက်အလက်ခွဲခြမ်းစိတ်ဖြာမှုတို့တွင် စိန်ခေါ်ယှဥ်ပြိုင်ရန် ဒီဇိုင်းထုတ်ထားသည်။
“မေးခွန်းတွေက ပျော်စရာကောင်းပြီး စိန်ခေါ်မှုရှိရမယ်။ တစ်နည်းအားဖြင့် ပြောရရင် အကောင်းဆုံးကျောင်းသားက မေးခွန်းတိုင်းမှာ စဉ်းစားစရာတစ်ခုခုရှိရမယ်။ ဒုတိယအချက်အနေနဲ့ ကြိုတင်ပြင်ဆင်မှုနည်းတဲ့ ကျောင်းသားတွေက ပိုကောင်းအောင် လေ့လာဖို့ စိတ်အားထက်သန်လာသင့်ပြီး တတိယအချက်ကတော့ မေးခွန်းတွေက ကျောင်းသားတွေကို သူတို့ ဘာကြောင့် မဖြေနိုင်တာလဲဆိုတာ ပြန်လည်စစ်ဆေးဖို့ ဖြစ်လာစေသင့်ပါတယ်” ဟု Tata Institute of Fundamental Research ၏ ဒါရိုက်တာ ဂျာယမ်းချန်ဂူလာ(Jayram Chengalur)က ပြောကြားခဲ့သည်။