(၁၂)ကြိမ်မြောက် အာဆီယံရေတပ်အရာရှိငယ်များတွေ့ဆုံနှီးနှောဖလှယ်ပွဲကို ဒုတိယအကြိမ်မြောက်အဖြစ် မြန်မာနိုင်ငံမှအိမ်ရှင်အဖြစ်လက်ခံ၍ ဧပြီ ၂၈ ရက်မှ ယနေ့ မေ ၁ ရက်အထိ ရန်ကုန်မြို့တွင်ကျင်းပခဲ့သည်။
တွေ့ဆုံပွဲသို့တက်ရောက်ခဲ့သည့် အာဆီယံနိုင်ငံများမှ ရေတပ်အရာရှိငယ်များအား စစ်ဦးစီးအရာရှိချုပ် (ရေ) ဒု-ဗိုလ်ချုပ်ကြီးအေးမင်းထွေးမှ ဧပြီ ၂၉ ရက်နံနက်ပိုင်းက လက်ခံတွေ့ဆုံကာ နှုတ်ခွန်းဆက်စကားပြောကြားပြီး ညပိုင်းတွင် ဂုဏ်ပြုညစာစားပွဲဖြင့် တည်ခင်းဧည့်ခံခဲ့သည်။
ယင်းနေ့၌ပင် တွေ့ဆုံနှီးနှောဖလှယ်ပွဲတက်ရောက်ခဲ့သည့် ရေတပ်အရာရှိငယ်များသည် ဖွင့်ပွဲအခမ်းအနားတက်ရောက်ခြင်း၊ နိုင်ငံအလိုက် ရေတပ်သမိုင်းကြောင်းရှင်းလင်းခြင်းနှင့် “ဒေသတွင်းတည်ငြိမ်အေးချမ်းရေးနှင့် ရေကြောင်းလုံခြုံရေးပေါင်းစည်းညီညွတ်အားဖြင့် ဟန်ချက်ညီဆောင်ရွက်ကြပါစို့” ခေါင်းစဉ်တို့အား ဆွေးနွေးခဲ့ကြသည်။
ထို့ပြင် အာဆီယံရေတပ်အရာရှိငယ်များသည် တပ်မတော်(ရေ) လှေလှော်ရွက်တိုက်အသင်း(အင်းလျားကန်)တွင် လှေလှော်ခြင်းနှင့် ရွက်တိုက်ခြင်းပြိုင်ပွဲများကို ယှဉ်ပြိုင်ခဲ့ကြပြီး အမှတ်(၁)ဗျူဟာစစ်ရေယာဉ်စုမှ စစ်ရေယာဉ်အားလေ့လာခြင်း၊ ရေတပ်လေ့ကျင့်ရေးဌာနချုပ်သို့လေ့လာကြည့်ရှုခြင်း၊ ရွှေတိဂုံဘုရား၊ ဗိုလ်ချုပ်အောင်ဆန်းဈေးတို့သို့လည်း လေ့လာရေးခရီးများသွားရောက်ခဲ့ကြသည်။
အဆိုပါ အာဆီယံရေတပ်အရာရှိငယ်များသည် ယနေ့ မေ ၁ ရက်နံနက်ပိုင်းနှင့်ညနေပိုင်းတို့က သက်ဆိုင်ရာနိုင်ငံအသီးသီးသို့ လေကြောင်းခရီးဖြင့် ပြန်လည်ထွက်ခွာသွားခဲ့ကြသည်။