ဩစတေးလျ၏ ၅ ဒေါ်လာတန် ငွေစက္ကူအသစ်တွင် ချားစ်ဘုရင်၏ ရုပ်ပုံကို ထည့်သွင်းမည်မဟုတ်ဟု ဗဟိုဘဏ်က ကြေညာလာ

ဩစတြေးလျသည် အသစ်ထုတ်လုပ်မည့် ၎င်း၏ ငါးဒေါ်လာတန် ငွေစက္ကူတွင် ဒုတိယ အဲလိဇဘက်ဘုရင်မ၏ ရုပ်ပုံကို ပထမဆုံးသော ဩစတြေးလျ ဌာနေတိုင်းရင်းသားများကို ဂုဏ်ပြုမည့် ဒီဇိုင်းအသစ်ဖြင့် အစားထိုးသွားမည်ဖြစ်ကြောင်း နိုင်ငံ၏ ဗဟိုဘဏ်က ဖေဖော်ဝါရီလ ၂ ရက် ကြာသပတေးနေ့တွင် ကြေညာခဲ့သည်။

အဆိုပါ ဆုံးဖြတ်ချက်ကို ဖက်ဒရယ်အစိုးရနှင့် ဆွေးနွေးတိုင်ပင်ကာ ချမှတ်ခဲ့ခြင်းဖြစ်ကြောင်း သြစတြေးလျဗဟိုဘဏ်က ထုတ်ပြန်ချက်တွင် ဖော်ပြထားသည်။ ငွေစက္ကူ၏ အခြားတစ်ဖက်တွင်မူ ဩစတြေးလျပါလီမန်ပုံကို ဆက်လက်ထည့်သွင်းမည်ဟု ပြောထားသည်။

၂၀၂၂ ခုနှစ်၌ အဲလိဇဘက် ဘုရင်မကြီး ကွယ်လွန်သွားပြီးနောက် အစောပိုင်းကတည်းက ဩစတြေးလျသည် ငါးဒေါ်လာတန် ငွေစက္ကူရှိ ဘုရင်မ၏ ရုပ်ပုံကို ချားလ်စ်ဘုရင်၏ ရုပ်ပုံဖြင့် အလိုအလျောက် အစားထိုးမည်မဟုတ်ဟု ပြောကြားခဲ့ဖူးသည်။

ဩစတြေးလျနိုင်ငံသည် ဗြိတိသျှဓနသဟာယနိုင်ငံများအဖွဲ့တွင် ပါဝင်သော နိုင်ငံတစ်နိုင်ငံဖြစ်ပြီး စည်းမျဉ်းခံဘုရင်စနစ် ခေါ် ဒီမိုကရက်တစ်ဘုရင်စနစ် ဖြင့် အုပ်ချုပ်သဖြင့် အစဉ်အလာအရ အဲလိဇဘက်ဘုရင်မ ကွယ်လွန်ပြီးနောက် တတိယမြောက် ချားလ်စ်ဘုရင်သည် ၎င်းနိုင်ငံ၏ အကြီးအကဲ မင်းတစ်ပါး ဖြစ်လာသည်။

ထို့ကြောင့် ငါးဒေါ်လာတန် ငွေစက္ကူတွင် ချားလ်စ်ဘုရင်၏ ရုပ်ပုံအား အစားထိုးရမည်ဟု ယူဆရသော်လည်း အာဏာပိုင်များ၏ ပြောဆိုချက်အရ အဲလိဇဘက် ဘုရင်မ၏ ပုံကို ထည့်သွင်းရခြင်းမှာ ဧကရာဇ်ဆိုသည့် ဂုဏ်ပုဒ်ကြောင့်မဟုတ်ဘဲ သူ၏ ပင်ကိုယ် အရည်အသွေးကြောင့် ဖြစ်သည်ဟုဆိုသည်။

Source: WION