ဧရာဝတီတိုင်းဒေသကြီးအတွင်းရှိ စက်ရုံ၊ အလုပ်ရုံဝန်ထမ်းများအနေဖြင့် မူးယစ်ဆေးဝါး သုံးစွဲမှုများကို ရှောင်ကြဉ်ကြရန်နှင့် သတ်မှတ်ထားသည့် စည်းကမ်းဥပဒေများကို လိုက်နာကြရန် တိုင်းဒေသကြီးဝန်ကြီးချုပ် ဦးတင်မောင်ဝင်းက တိုက်တွန်းပြောကြားလိုက်သည်။
အလုပ်သမားနေ့ အခမ်းအနားနှင့် လမ်းညွှန်ချက်များ
ယနေ့ မေလ ၁ ရက်တွင် ပုသိမ်မြို့ မြို့တော်ခန်းမ၌ ကျင်းပသည့် အပြည်ပြည်ဆိုင်ရာ အလုပ်သမားနေ့ အခမ်းအနားတွင် နိုင်ငံတော်သမ္မတ ဦးမင်းအောင်လှိုင်ထံမှ ပေးပို့သော သဝဏ်လွှာကို ဝန်ကြီးချုပ်က ဖတ်ကြားခဲ့သည်။ ထို့နောက် ဝန်ကြီးချုပ်က ဝန်ထမ်းများအနေဖြင့် –
မူးယစ်ဆေးဝါး သုံးစွဲမှုများ မလုပ်ကြရန်၊ ယာဉ်စည်းကမ်း၊ လမ်းစည်းကမ်းများကို လိုက်နာကြရန်၊
အလုပ်ရှင်နှင့် အလုပ်သမားများ လိုက်နာရမည့် စည်းကမ်းများကို စောင့်ထိန်းကြရန်နှင့်
အစိုးရအဖွဲ့အနေဖြင့် ဝန်ထမ်းများ၏ သွားရေးလာရေး အဆင်ပြေစေရန် ကူညီဆောင်ရွက်ပေးသွားမည်ဖြစ်ကြောင်း ပြောကြားခဲ့သည်။
လုပ်သားအခွင့်အရေးနှင့် ဥပဒေဆိုင်ရာ ဆောင်ရွက်ချက်များ
ဧရာဝတီတိုင်းဒေသကြီးအတွင်း စက်ရုံ၊ အလုပ်ရုံပေါင်း (၂,၇၀၀) ကျော်ရှိပြီး အလုပ်သမားဦးရေ (၃၈,၀၀၀) ကျော်ရှိကြောင်း သိရသည်။ အလုပ်သမားညွှန်ကြားမှုဦးစီးဌာန ညွှန်ကြားရေးမှူး ဒေါ်ဇင်ကေသွယ်က အဆိုပါ အခမ်းအနားတွင် အောက်ပါအတိုင်း ပြောကြားခဲ့သည် –
“အလုပ်သမားအခွင့်အရေးကို ကာကွယ်ဖို့၊ ကျန်းမာရေး စောင့်ရှောက်မှုပေးဖို့နဲ့ လုပ်ငန်းခွင် အငြင်းပွားမှုတွေကို ဖြေရှင်းဖို့အတွက် အလုပ်သမားညွှန်ကြားရေးဦးစီးဌာန၊ လူမှုဖူလုံရေးဦးစီးဌာန အပါအဝင် အဓိက ဦးစီးဌာန (၄) ခုကနေ အလုပ်သမားဥပဒေ (၁၄) ခုနဲ့အညီ ဆောင်ရွက်ပေးနေပါတယ်”
ကွင်းဆင်းအသိပညာပေးမှုများ
အလုပ်ရှင်နှင့် အလုပ်သမားများအနေဖြင့် နောက်ဆုံးထုတ်ပြန်ထားသည့် အလုပ်သမားဥပဒေများကို သိရှိနားလည်စေရန် ဝန်ကြီးဌာန တာဝန်ရှိသူများက စက်ရုံ၊ အလုပ်ရုံများအထိ ကိုယ်တိုင်ကွင်းဆင်း၍ အသိပညာပေး (Awareness) လုပ်ငန်းများကို စဉ်ဆက်မပြတ် ဆောင်ရွက်ပေးနေကြောင်းလည်း သိရသည်။