အီရန်နှင့် ငြိမ်းချမ်းရေးဆွေးနွေးရန် အကြိုညှိနှိုင်းမှုများ အမေရိကန် စတင်နေကြောင်း သတင်းထွက်ပေါ်

အမေရိကန် သမ္မတ ဒေါ်နယ်ထရမ့်၏ အစိုးရအဖွဲ့သည် အီရန်နိုင်ငံနှင့် ငြိမ်းချမ်းရေး ဆွေးနွေးပွဲများ မည်သို့ဖြစ်လာနိုင်သည်ဆိုသည့် အချက်အပေါ် အခြေခံ၍ အကြိုညှိနှိုင်းမှုများ စတင်နေပြီဖြစ်ကြောင်း အမေရိကန်သတင်းဝက်ဘ်ဆိုက် Axios က အစိုးရအရာရှိတစ်ဦးနှင့် နီးစပ်သည့် သတင်းရင်းမြစ်တစ်ခုကို ကိုးကား၍ ဖော်ပြခဲ့သည်။

ပြီးခဲ့သည့် စနေနေ့က Axios ၏ ဖော်ပြချက်အရ ဝါရှင်တန်နှင့် တီဟီရန်အကြား မကြာသေးမီရက်ပိုင်းအတွင်း တိုက်ရိုက်ဆက်သွယ်မှု မရှိသေးသော်လည်း အီဂျစ်၊ ကာတာနှင့် ဗြိတိန် နိုင်ငံတို့မှတစ်ဆင့် နှစ်ဖက်အကြား အမှာစကားများ ပါးလျက်ရှိကြောင်း သိရသည်။

အီဂျစ်နှင့် ကာတာနိုင်ငံတို့၏ အဆိုအရ အီရန်သည် ဆွေးနွေးညှိနှိုင်းရန် စိတ်ဝင်စားသော်လည်း အလွန်တင်းကြပ်သော တောင်းဆိုချက်များကို တင်ပြထားသည်။ ၎င်းတို့အထဲတွင်

• စစ်ပွဲကြောင့် ထိခိုက်မှုများအတွက် လျော်ကြေးပေးရန် နှင့်
• နောင်တွင် စစ်ပွဲပြန်လည်မဖြစ်ပွားစေရန် အာမခံချက်ပေးရန် တို့ ပါဝင်သည်။

အမေရိကန်အစိုးရဘက်ကလည်း အီရန်ဘက်မှ အောက်ပါ အချက် (၆) ချက်ကို လိုက်နာရန် အလိုရှိနေကြောင်း Axios က ဖော်ပြထားသည်။

၁။ လာမည့် ၅ နှစ်အတွင်း ဒုံးကျည်ထုတ်လုပ်မှု အစီအစဉ် မရှိစေရ။

၂။ ယူရေနီယံသန့်စင်မှု လုပ်ငန်းစဉ်များကို သုညအဆင့်ထိ လျှော့ချရန်။

၃။ ပြီးခဲ့သည့်နှစ်က အမေရိကန်နှင့် အစ္စရေးတို့ ဗုံးကြဲတိုက်ခိုက်ခဲ့သော အီရန်အလယ်ပိုင်းရှိ Natanz၊ Isfahan နှင့် Fordow နျူကလီးယားစခန်းများကို အပြီးတိုင် ဖျက်သိမ်းရန်။

၄။ နျူကလီးယားလက်နက် ထုတ်လုပ်ရာတွင် အသုံးပြုနိုင်သည့်စက်များနှင့် ဆက်စပ်စက်ပစ္စည်းများ ထုတ်လုပ်မှုကို ပြင်ပမှ တင်းကြပ်စွာ စောင့်ကြည့်စစ်ဆေးသည့် လုပ်ထုံးလုပ်နည်းများကို လက်ခံရန်။

၅။ ဒေသတွင်းနိုင်ငံများနှင့် လက်နက်ထိန်းချုပ်ရေးစာချုပ် ချုပ်ဆိုရန် (ဒုံးကျည်ပိုင်ဆိုင်မှု အရေအတွက် ၁,၀၀၀ ထက် မကျော်လွန်စေရ)။

၆။ လက်ဘနွန်ရှိ ဟစ်ဇ်ဘိုလာ၊ ယီမင်ရှိ ဟူသီ နှင့် ဂါဇာရှိ ဟားမတ်စ်အဖွဲ့များအား ငွေကြေးထောက်ပံ့မှု လုံးဝမပြုလုပ်ရန်။

သမ္မတထရမ့်၏ အကြံပေးများကမူ အီရန်နိုင်ငံခြားရေးဝန်ကြီး Abbas Araghchi ကို အမှန်တကယ် သဘောတူညီချက်ရအောင် လုပ်ဆောင်ပေးနိုင်သူဟု မယူဆဘဲ အမိန့်ပေးချက်ကိုသာ ပြန်လည်ပို့ဆောင်ပေးသည့် “Fax Machine” (ဖက်စ်စက်) တစ်ခုကဲ့သို့သာ မြင်နေကြကြောင်း အမေရိကန်အရာရှိများက ဆိုသည်။

လက်ရှိတွင် ထရမ့်၏ အကြံပေးများသည် အီရန်နိုင်ငံတွင် အမှန်တကယ် ဆုံးဖြတ်ချက်ချနိုင်သူမှာ မည်သူဖြစ်သည်နှင့် ၎င်းတို့နှင့် မည်သို့ဆက်သွယ်ရမည်ကို သိရှိနိုင်ရန် ကြိုးပမ်းနေကြသည်ဟု သိရသည်။